Kọ Whọ Sae Ro ‘Ẹthẹ Ologbo Iruo Nọ O Rovie Fihọ’?
1. Didi ‘ẹthẹ ologbo iruo’ o rovie fihọ kẹ omai?
1 Nọ ‘ẹthẹ ologbo iruo’ o rovie fihọ kẹ Pọl ukọ na, ọ rọ ọwhọ rehọ uvẹ yena wha isiuru Uvie na haro ghelọ ọwọsuọ ewegrẹ buobu. (1 Kọr. 16:9) Nẹnẹ, oware wọhọ iwhowho-uvie 642,000 wariẹ akpọ na họ a ro ẹthẹ ologbo iruo nọ o rovie fihọ no ẹkwoma iruo ọkobaro oke-kpobi nọ a rehọ.
2. Fikieme u je woma re ma kiẹ uyero mai riwi noke ruoke?
2 Uyero U re Nwene: Dede nọ uyero ahwo jọ o rẹ sae kẹ ai uvẹ ru te epanọ a gwọlọ họ, uyero u re nwene. Fikiere, u re woma re ma kiẹ uyero mai riwi noke ruoke, orọnikọ ma rẹ keria hẹrẹ bẹsenọ eware kpobi i re woma re no ho. (Ọtausi. 11:4) Kọ whẹ yọ uzoge nọ o bi ti nwrotọ no ekọleji kẹle? Kọ whẹ yọ ọsẹ hayo oni nọ o wo emọ nọ i bi ti mu isukulu họ? Kọ whọ be kẹle oke eriosehọ no iruo nọ whọ rrọ no? Inwene itieye na e rẹ sae lẹliẹ owhẹ wo uvẹ nọ whọ rẹ rọ ro iruo odibọgba oke-kpobi na. Oniọvo-ọmọtẹ jọ nọ ọ kpako te ikpe 89 no yọ o wo ebẹbẹ ẹyao ọ jiroro nọ o re ru iruo ọkobaro. Fikieme? Fikinọ o vrẹ ukpe ososo no nọ o ri gbe kpohọ ẹsipito ho, o lẹle riẹ roro nọ oma riẹ o te kẹe uvẹ ru ọkobaro.
3. Didi inwene jọ ahwo jọ a ru no re a sai ru ọkobaro oke-kpobi?
3 Pọl ọ jiroro vẹre nọ o re weze bru inievo riẹ evaọ obọ Kọrint. Ghele na, o nwene omaa riẹ fiki emamọ usi na. Ahwo buobu nọ a bi ru ọkobaro oke-kpobi nẹnẹ na a ru inwene jọ re a sai ru iruo ọkobaro na. Ahwo jọ a siobọno eware buobu evaọ uzuazọ te epanọ a rọ ruẹ nọ iruo ubroke họ oware nọ a gwọlọ re a sae rọ rẹrote umutho eware nọ a re ro yeri uzuazọ. A be jọ uvẹ iruo nọ u te rai obọ na ruẹ oghọghọ. (1 Tim. 6:6-8) Ahwo jọ nọ a rọo no a ru inwene jọ nọ ọzae na ọvo o re ro ru iruo, re aye na ọ sae ruẹ uvẹ ro ru iruo ọkobaro.
4. Eme ma rẹ sai ru otẹrọnọ u gbe mu omai ẹro nọ ma sae nyate utee euwa na ha?
4 Whọ nwani ku ei họ vẹrẹ vẹrẹ hẹ inọ whọ sai ru iruo ọkobaro ho fikinọ whọ te sae nyate utee euwa na ha. Euwa ivẹ-gbọ họ oware nọ o gwọlọ mi owhẹ evaọ okpẹdẹ. Otẹrọnọ u gbe mu owhẹ ẹro nọ whọ sai ru ei hi, dao ọkobaro obufihọ evaọ amara ọvo hayo ivẹ rekọ avọ utee euwa 70 nọ who re fihọ kẹ omobọ ra. Onana o te lẹliẹ owhẹ wo omaweromẹ iruo ọkobaro. (Ol. 34:8) Ta iroro ra kẹ ahwo nọ a bi ru ọkobaro enẹna. Keme, ẹsejọhọ a fi ebẹbẹ jọ nọ e wọhọ era na kparobọ no. (Itẹ 15:22) Lẹ se Jihova re ọ ghale omodawọ ra nọ whọ rọ gwọlọ ru odibọgba ra kẹre.—1 Jọn 5:14.
5. Fikieme iruo ọkobaro oke-kpobi o jẹ rrọ oware erere?
5 Iruo Nọ E rẹ Kẹ Erere: Re whọ jọ ọkobaro oke-kpobi o rẹ wha irere buobu ze. U re fiobọhọ k’owhẹ wo oghọghọ ulogbo nọ u re no okẹ nọ a rẹ kẹ ze. (Iruẹru 20:35) Iruo ọkobaro e te lẹliẹ owhẹ wo ẹnyaharo evaọ ona nọ who re ro wuhrẹ amọfa Ẹme Ọghẹnẹ ziezi. (2 Tim. 2:15) U ti rovie uvẹ buobu fihọ nọ whọ te rọ ruẹ uketha Jihova. (Iruẹru 11:21; Fil. 4:11-13) Iruo ọkobaro i ti je fiobọhọ k’owhẹ wo ekwakwa abọ-ẹzi, wọhọ ithihakọ, yọ o te lẹliẹ owhẹ si kẹle Jihova ziezi. (Jem. 4:8) Kọ whọ sae ruọ ẹthẹ iruo ologbo nana re whọ jọ ọkobaro oke-kpobi?