Kọ Whọ jọ Ọkobaro Oke-Kpobi Vẹre?

1. Uvẹ-ọghọ vẹ ibuobu a be reawere riẹ, kọ eme ọ via kẹ inievo jọ no?

¹ Anwọ ikpe buobu ze na, idu ahwo buobu a wo uvẹ-ọghọ nọ a bi ro wuhrẹ je whowho emamọ usi na wọhọ egbodibo oke-kpobi. (Iruẹru 5:42) Dede na, iyero jọ e gba inievo jọ họ siobọno iruo ọkobaro na. Otẹrọnọ whọ jọ ọkobaro oke-kpobi vẹre, kọ whọ kiẹ iyero ra riwi no enẹna sọ whọ rẹ sae wariẹ mu iruo na họ?

2. Fikieme u ro fo re enọ e jọ ọkobaro vẹre a roro kpahe uyero rai enẹna?

² Eware E rẹ Sai Nwene: Ẹsejọhọ oware nọ o soriẹ ze nọ who ro siobọno iruo ọkobaro na o gbẹ riẹ hẹ. Wọhọ oriruo, otẹrọnọ whọ siọ iruo ọkobaro ba fikinọ whọ jẹ sae nyate utee euwa 90 amara na ha, kọ whọ sae wariẹ muhọ nọ orọnọ euwa 70 o rrọ enẹna? Kọ ewha-iruo okọ gbe uviuwou ra i vori vi epanọ e jọ anwẹnọ who ro siobọno iruo ọkobaro na? Oniọvo-ọmọtẹ jọ nọ ọ siọ iruo ọkobaro ba fiki ẹyao ọ wariẹ muhọ nọ ọ kpako te ikpe 89 no. Fikinọ o vrẹ ukpe soso no nọ o te ẹsipito, o te rri oma riẹ nọ ọ sae wariẹ mu ọkobaro họ!

3. Ẹvẹ uviuwou o sai ro fi obọ họ kẹ ohwo jọ evaọ uviuwou rai ru ọkobaro?

³ O sae jọnọ whọ jọ ọkobaro vẹre he, rekọ ohwo uviuwou ra jọ o no ọkobaro re ọ sae rẹrote ohwo jọ evaọ uviuwou na, wọhọ ọsẹ hayo oni nọ ọ kpako no. (1 Tim. 5:4, 8) O tẹ rrọ ere, kọ whẹ hayo amọfa uviuwou na wha sai fi obọ họ vi epaọ anwẹdẹ? Kọ wha gbẹ rọ ẹme na jiroro kugbe? (Itẹ 15:22) Nọ ahwo uviuwou a tẹ be tha ohwo uviuwou na jọ uke re ọ sai ru ọkobaro, yọ o wọhọ ẹsenọ aikpobi a bi ru iruo na.

4. Eme who re ru otẹrọnọ whọ gbẹ sae wariẹ mu iruo ọkobaro họ enẹna ha?

⁴ Jọ o kẹ owhẹ uye ga hrọ họ nọ uyero ra enẹna o gbẹ kẹ owhẹ uvẹ wariẹ mu iruo ọkobaro họ họ. Unevaze ra nọ whọ rọ gwọlọ ru ere o da Jihova ẹro fia. (2 Kọr. 8:12) Rehọ onaa nọ who wo no iruo ọkobaro ze ro ru iruo odibọgba ra enẹna. Lẹ kpahe isiuru ra, je fiẹrohotọ kẹ uvẹ kpobi nọ whọ sai ro nwene uyero ra. (1 Jọn 5:14) Ẹsejọhọ nọ oke o be nyaharo na, Jihova o ti ru re “ẹthẹ iruo o rovie fihọ” kẹ owhẹ re whọ wariẹ reawere ọkobaro oke-kpobi na.—1 Kọr. 16:9.