Mai Yọ Isẹri Jihova Evaọ Oke Kpobi
1. Eme ma rẹ sai wuhrẹ no ikuigbe epanọ Jesu ọ rọ ta usiuwoma kẹ aye jọ kẹle ozae ze?
1 Jesu ọ nya onya anwọ euwa buobu no. Oma o rrọ riẹ no, yọ uruame u bi kpei. Nọ ilele riẹ a nyae dẹ emu, ọ tẹ keria kẹle ozae jọ nọ ọ rrọ otafe okpẹwho Sameria re o serihọ. Orọnikọ Jesu o kpohọ Sameria re ọ ta usiuwoma ha; ọ jẹ nya etẹe vrẹ kpohọ Galili re ọ jọ obei ta usiuwoma. Rekọ, ọ rehọ uvẹ yena ro se isẹri kẹ aye jọ nọ o je vo ame. (Jọn 4:5-14) Fikieme? Keme Jesu ọ jọ “oseisẹri uzẹme” Jihova oke kpobi. (Evia. 3:14) Ma rẹ rọ aro kele Jesu ẹkwoma Isẹri Jihova nọ ma rẹ jọ evaọ oke kpobi.—1 Pita 2:21.
2. Ẹvẹ ma sae rọ ruẹrẹ oma kpahe re ma ta usiuwoma evaọ oke kpobi?
2 Ruẹrẹ Oma Kpahe: Ma sae ruẹrẹ oma kpahe re ma ta usiuwoma evaọ oke kpobi ẹkwoma ebe ukoko na nọ ma rẹ wha lele oma. Iwhowho-uvie buobu a rẹ wha emebe-evẹvẹ mai lele oma a ve fi ai họ ada kẹ ezeki, ahwo nọ a bi ruiruo evaọ eria nọ a jẹ zẹ epẹtiro, gbe amọfa nọ a nyaku evaọ okpẹdẹ na. (Ọtausi. 11:6) Oniọvo-ọmọtẹ jọ nọ o re kperẹ gaga, o re fi Ebaibol ọsese gbe obe ọ Ebaibol Wuhrẹ na họ ẹkpa riẹ ẹsikpobi, ọ vẹ jẹ daoma mu ẹmeọta họ kugbe ahwo nọ a keria kẹle iẹe.
3. Ẹvẹ ma sai ro mu ẹmeọta họ?
3 Mu Ẹmeọta Họ: Ma te bi se isẹri evaọ oke-gheghe, orọnikọ uzoẹme Ikereakere na jọ ma rẹ kaki ro mu ẹme họ họ. Nọ Jesu ọ nyaku aye Sameria na, orọnikọ ọ kaki dhesẹ oma riẹ kẹe wọhọ Mesaya na ha. Ukpoye, ọ ta kẹe nọ ọ kẹe ame da, o tẹ lẹliẹ aye na nọe onọ. (Jọn 4:7-9) Oniọvo-ọmọtẹ jọ ọ ruẹ nọ onaa utioye na u fi obọ họ kẹe mu ẹmeọta họ nọ a nọe sọ o re ru ehaa edẹ-eriosehọ. Orọnikọ oniọvo na ọ nwane ta nọ fikinọ ọyomariẹ yọ omọvo isẹri Jihova o gbe bi ro ru ehaa na ha ha, ukpoye ọ ta nọ, “Mẹ salọ nọ me re ru ehaa na ha.” Ohwo na ọ tẹ nọe inọ fikieme? Onana u rovie uvẹ fihọ kẹ oniọvo na nọ o ro se isẹri.
4. Fikieme Matiu 28:18-20 o rọ rrọ uduotahawọ k’owhẹ?
4 Dede nọ Jesu o ru iruo odibọgba otọakpọ riẹ re, o gbe wo isiuru gaga kpahe iruo usiuwoma ota na nọ ma bi ru nẹnẹ na. (Mat. 28:18-20) Fikiere, evaọ aruorokele Jesu, ma rẹ ruẹrẹ oma kpahe re ma whowho uzẹme na kẹ ahwo kpobi evaọ oke kpobi.—Hib. 10:23.