Epanọ Ma Sai ro Wo Onaa Ziezi Evaọ Usiuwoma Ota—Mu Usiuwoma Ota Oke-Gheghe Họ

Oware nọ U ro Wuzou: Nọ ma tẹ rrọ usiuwoma n’uwou ruọ uwou, ma re di ahwo buobu họ uwou ẹsejọ họ. Rekọ ma rẹ sae nyaku ahwo nana jọ nọ ma tẹ rrọ omoto bi kpohọ erẹ, ma tẹ be hẹrẹ edọkita evaọ obọ ẹsipito, nọ ma tẹ rrọ ibreki evaọ oria iruo hayo evaọ obọ isukulu, gbe eria efa. Jihova ọ gwọlọ nọ ohwo kpobi o re yo usi Uvie na. (1 Tim. 2:3, 4) Re ma sae ta usiuwoma kẹ ae, o gwọlọ nọ ma rẹ daoma mu ẹme jọ họ kugbe ai.

Epanọ A re ro Ru Ei:

Fi ẹro h’otọ. Kọ who rri ohwo na wọhọ ohwo nọ ọ te gwọlọ lele owhẹ ta ẹme? Kọ who roro nọ usiuwoma ota u ti kiehọ evaọ oke yena? Iwhowho-uvie jọ a rẹ kaki rri ohwo na a ve ru unu ohwohwẹ kẹe. Ohwo na o te ru epọvo na, a vẹ daoma mu ẹme họ kugbei.
Lẹ h’eva kpẹkpẹe otẹrọnọ udu o be dina bru owhẹ.—Neh. 2:4; Iruẹru 4:29.
Whọ sai mu ẹme na họ avọ uyere. Nọ Jesu o je mu ẹme họ kugbe aye Sameria na, orọnọ ẹme Uvie na o ro muhọ họ. (Jọn 4:7) Ẹsejọ whọ sai tube jiri ohwo na dede, wọhọ: “Whọ riẹ emọ ra na yọrọ kẹhẹ.” Ma rẹ sae jẹ rọ onọ mu ẹme na họ, wọhọ: “Kọ whọ ruẹ oware nọ a jọ etẹlẹvisiọno dhesẹ odẹnukpo na?”
Whọ tẹ sai mu ẹme họ kugbei no, rọ areghẹ kpọ ẹme na kpohọ Ebaibol, rekọ whọ rọ okpakpa ru ei hi. Wha gbẹ dina gbiku na haro omojọ. Whọ sai gbolo ẹme jọ fihotọ nọ o rẹ lẹliẹ ohwo na nọ owhẹ onọ. Wọhọ oriruo, otẹrọnọ wha be ta ẹme kpahe uviuwou, whọ sae ta nọ, “Me se ku ohrẹ jọ nọ o rẹ sai fiobọhọ evaọ emọ eyọrọ.” Otẹrọnọ wha be ta kpahe usi jọ nọ wha yo evaọ etẹlẹvisiọno, whọ sae ta nọ, “Kẹle na me se ku emamọ usi jọ nọ o ta kpahe inwene nọ e te romavia.” Jọ o kẹ owhẹ uye he otẹrọnọ whọ sae ta usiuwoma kẹ ohwo na taure ọvuọ oboriẹ ọ tẹ te nya ha.
Wha emebe-evẹvẹ hayo emagazini lele oma nọ whọ rẹ rọ kẹ ohwo nọ o dhesẹ isiuru.

Dao Onana Evaọ Amara Na:

Koka koka, daoma mu ẹme họ kugbe ohwo jọ nọ o rẹ sai su kpohọ usiuwoma ota oke-gheghe.