Ẹvaha Eriariẹ Nọ I Re Su Kpohọ Uzuazọ Ebẹdẹ Bẹdẹ
1 Jihova họ ọnọ “ọ rọ ahwo [eriariẹ] kpobi ewuhrẹ.” (Ol. 94:10) Ọ be rehọ omai ruiruo ro ru eriariẹ nọ i re siwi uzuazọ te ahwo obọ re a riẹ epanọ a rẹ gọe avọ ọjẹrehọ. Obe na Eriariẹ Nọ I Re Su Kpohọ Uzuazọ Ebẹdẹ Bẹdẹ yọ omamọ okwakwa nọ ẹkwoma riẹ ze ahwo oruọzewọ a sae ro wo otoriẹ ogbagba Ọghẹnẹ no Ẹme riẹ, Ebaibol na ze. (1 Tim. 2:3, 4) Evevẹ gbe ona ewuhrẹ uzẹme obe ọ Eriariẹ na o ti fiobọhọ kẹ ahwo re a wo otoriẹ oware nọ Jihova ọ be gwọlọ wuhrẹ ai. Evaọ amara ọnana ma gwọlọ t’eme kugbe ahwo nọ e rẹ lẹliẹ ai gwọlọ se obe na. Iroro jọ ena. Ukpenọ whọ rẹ gwọlọ se ai uzuzou, daoma re whọ t’ẹme te igogo iroro na evaọ eme obọ ra avọ edhere ẹmeọta kugbe ohwo gheghe.
2 Nọ o rọ nọ ahwo buobu a ku ọnọ a you fiẹ no evaọ uwhu na, who re ku ẹruore ẹkparomatha na kugbe ẹmeọta whọ vẹ kake t’ẹme wọhọ onana:
◼ “Ibuobu mai jọ ohwo mai jọ nọ ma you o whu no. Kọ whọ dina roro no sọ whọ te wariẹ ohwo otiọye na ruẹ? [Kuvẹ kẹ uyo.] Uwhu o jọ abọ ẹjiroro ọsosuọ Ọghẹnẹ kẹ ohwo-akpọ họ. Jesu o dhesẹ nọ enọ ma you a rẹ sae thọ ae no uwhu. [Se Jọn 11:11, 25, 44.] Dede nọ onana o via evaọ ikpe udhusoi buobu nọ e vrẹ no, u dhesẹ oware nọ Ọghẹnẹ ọ yeyaa nọ o ti ru k’omai. [Rovie obe Eriariẹ na kpohọ ifoto nọ ọ rọ ẹwẹ-obe 85 je se uzoẹme na. Dhesẹ ifoto nọ ọ rọ ẹwẹ-obe 86 jẹ t’ẹme kpahiẹe.] Otẹrọnọ whọ gwọlọ gbe se kpahe ẹruore ọbọga ẹkparomatha na, eva e te were omẹ re mẹ nyase obe onana ba k’owhẹ evaọ azọhọ ₦80.”
3 Nọ ẹmeọta ọsosuọ kpahe ẹruore ẹkparomatha ọ tẹ vrẹ no, whọ rẹ sae mu ẹmeọta nọ ọ kẹle riẹ kugbe omọvo na họ evaọ edhere ọnana:
◼ “Whọ rẹ sae kareghẹhọ nọ mẹ ta nọ uwhu o jọ abọ ẹjiroro ọsosuọ Ọghẹnẹ kẹ ohwo-akpọ họ. Otẹrọnọ oyena yọ uzẹme, fikieme ma jẹ be who je whu? Itolo jọ e rẹ rria vi ikpe 100, yọ ire jọ e riẹ nọ e rria ikpe idu buobu no. Keme jabọ nọ ahwo a be rọ rria ikpe 70 hayo 80 ọvo? [Kuvẹ kẹ uyo.] Ma bi whu keme imava ọsosuọ a ghọẹmeeyo kẹ Ọghẹnẹ.” Se Ahwo Rom 5:12. Rovie kpohọ ẹwẹ-obe 53 evaọ obe Eriariẹ na re who se uzoẹme na. Se edhe-ẹme esa ọsosuọ na, whọ vẹ riobọhọ iyo enọ nọ a kere fihiẹe na. Ru ọruẹrẹfihọ nọ who ti ro zihe okiọfa re wha t’ẹme kpahe abọ uzou nọ u kiọkọ na. Tudu họ ohwo na awọ re o sei re no bọo oke yena.
4 Otẹrọnọ whọ tẹ t’ẹme kugbe ohwo nọ ọ wọhọ ohwo egagọ, whọ rẹ sae ta nọ:
◼ “Egagọ nọ e riẹ nẹnẹ i bu te udhusoi ẹko buobu. A re wuhrẹ eghẹrẹ iwuhrẹ nọ e rọwo kugbe he. Ahwo jọ a rẹ ta nọ egagọ kpobi i woma yọ oware nọ ma rọwo u muẹme he. Eme họ ẹjiroro ra? [Kuvẹ kẹ uyo.] Jesu o wuhrẹ egagọ uzẹme na o te je dhesẹ nọ Ọghẹnẹ ọ rẹ jẹ eghẹrẹ egagọ efa rehọ họ. [Se Matiu 7:21-23.] Otẹrọnọ ma gwọlọ ru Ọghẹnẹ eva were, ma rẹ gọe rọwo kugbe oreva riẹ hrọ.” Rovie obe Eriariẹ na kpohọ uzou 5, se uzoẹme na, je dhesẹ izoẹme esese na jọ. Dhesẹ nọ evuẹ enana i re fiobọhọ kẹ ohwo wuhrẹ epanọ a re ro ru Ọghẹnẹ eva were. Fi obe na họ ada evaọ unu azọhọ riẹ.
5 Ahwo nọ a rọ reghereghe fiki egagọ ibuobu a rẹ sae vuhu aghare uyo onọ onana evaọ ozihebro ra:
◼ “Avọ oghoghẹrẹ egagọ buobu nọ e rọ nẹnẹ na, ẹvẹ ma sai ro vuhu ọnọ ọ gba? Eme whọ rẹ jọ oma egagọ gwọlọ? [Kuvẹ kẹ uyo.] Jesu ọ vuẹ omai epanọ ma sae ro vuhu ilele uzẹme riẹ.” Se Jọn 13:35. Se edhe 18 gbe 19 evaọ uzou 5 ọrọ obe Eriariẹ na. Riobọhọ nọ ero ruiruo ekpọvio Ikereakere enana gbe edhere ẹsalọ, ohwo ọ rẹ sae vuhu egagọ uzẹme na. Gbiku kpahe epanọ a riẹ Isẹri Jihova evaọ akpọ na soso kpahe uvi uyoyou rai gbe ute kpehru uruemu ezi rai. Dhesẹ epanọ ewuhrẹ Ebaibol, avọ ero ruiruo obe Eriariẹ na, u ti ro dhesẹ vevẹ oghẹrẹ egagọ nọ Ọghẹnẹ ọ rẹ jẹrehọ.
6 Whọ tẹ nyaku ọyewọ, eme enana e rẹ sae ruiruo:
◼ “Kẹdẹ kẹdẹ, ma re yo kpahe uruemu aghẹmeeyo izoge nọ o wohọ nọ a wo aghare emamọ uruemu hu. Ekpako jọ a rẹ gwọlọ fo eyero isukulu inọ a bi wuhrẹ emọ na ohẹriẹ nọ o rọ udevie uwoma gbe onọ uyoma ha. Ono who roro nọ ọ rẹ kẹ ewuhrẹ ọnana? [Kuvẹ kẹ uyo.] Gaviezọ kẹ ẹme nọ Ebaibol ọ ta kpahe onọ onana. [Se Ahwo Ẹfẹsọs 6:4.] Oyena o vuẹ omai nọ aghare uruemu ọ kọ h’emọ yọ owha-iruo eyewọ na.” Rovie obe Eriariẹ kpohọ ẹwẹ-obe 145, se edhe avọ 16, jẹ t’ẹme kpahe ifoto nọ e rọ ẹwẹ-obe 147. Dhesẹ nọ a ru ona họ obe na kẹ obe uwuhrẹ uviuwou na soso. Nọ whọ be rehọ edhe 17 gbe 18 evaọ ẹwẹ-obe 146 ruiruo na, dhesẹ epanọ ma re ru uwuhrẹ utioye na kugbe iviuwou.
7 Otẹrọnọ who mu uwuhrẹ họ kugbe ọyewọ nọ ọ rọ awa evaọ iweze ọsosuọ ra, whọ sae ru uwuhrẹ na haro evaọ ozihebro whọ vẹ ta nọ:
◼ “Akpọ inẹnẹ o bi fi edawọ buobu họ aro izoge. Onana u bi ru ei bẹbẹ kẹ ai re a dhozọ Ọghẹnẹ nọ a be rro kpako na. Ẹsejọhọ whọ kareghẹhọ nọ evaọ ẹmeọta mai nọ uwhremu, ma tẹro vi igogo eme ivẹ jọ. Wọhọ eyewọ eg’Ọghẹnẹ, ma re fi emamọ oriruo h’otọ kẹ emọ mai, yọ ma re dhesẹ uyoyou mai kẹ ae kẹse kẹse. Oware ofa jọ o riẹ nọ Ebaibol ọ ta nọ emọ a gwọlọ mi esẹ gbe ini rai.” Se Itẹ 1:8. Rovie kpohọ ẹwẹ-obe 148 evaọ obe Eriariẹ na je ru uwuhrẹ na haro, ro no edhe 19-23 ze. Ta nọ whọ te wariẹ zihe tha re who wuhrẹ kugbe uviuwou na soso, muhọ no uzou 1 ze.