Ẹmeọta Kugbe Ọwhẹwhẹtiẹ O rẹ Sae Te Udu Na
1 A rẹ sae dhesẹ ẹmeọta wọhọ “ekpeze iroro ẹme-unu.” Re a mu ẹmeọta ọwhẹwhẹtiẹ họ kpahe uzoẹme nọ u kpomahọ amọfa o rẹ sae kpare isiuru je fiobọhọ k’omai re ma rehọ ovuẹ Uvie na nyate idu rai. Eware nọ e via no i dhesẹ nọ o rẹ mae w’ẹgba re a sae t’ẹme kugbe ahwo evaọ edhere ọwhẹwhẹtiẹ avọ udu nọ u totọ vi edhere ewuhrẹ.
2 Epanọ A re ro Mu Ẹmeọta Kugbe Ọwhẹwhẹtiẹ Họ: Re ma sae t’ẹme kugbe amọfa u dhesẹ nọ ma rẹ fodẹ ikpeme ikereakere jọ họ. U dhesẹ nọ ma re ru ohwo ọdekọ na re ọ t’ẹme kugbe omai. Wọhọ oriruo, okenọ ma be t’ẹme ọwhẹwhẹtiẹ kugbe ọrivẹ nọ ọ kẹle omai, o rẹ jọ kekeke he rekọ o rẹ jọ wowolẹ. Ma re roro kpahe ẹme ọfa nọ ma te ta ha rekọ ma rẹ k’uyo na owowa kpahe iroro nọ ọ be jẹ na. Ma te dhesẹ obọdẹ isiuru kpahe oware nọ ọ be ta na o rẹ sae tudu hiẹe awọ re ọ gbẹ t’ẹme kugbe omai. Epọvona o rẹ jọ okenọ ma te bi se isẹi kẹ amọfa.
3 Izoeme wọhọ emuemu, ebẹbẹ uzoge, ẹme-avro omoma, eware nọ e be via kẹle omai, hayo makọ epanọ ova-ehru na orọ dede a rẹ sae rehọ ae mu ẹmeọta ọwhẹwhẹtiẹ họ. Izoeme nọ i kpomahọ izuazọ ahwo i wo ẹgba gaga nọ e rẹ rọ kpare isiuru rai. Nọ ẹmeọta ọ tẹ nwani muhọ no, ma rẹ sae rehọ ẹmẹrera kpọe kpohọ ovuẹ Uvie na.
4 Re a ru ẹmeọta owowolẹ u dhesẹ nọ a re du ruẹrẹ oma kpahe ha ha. O r’oja. Ghele na, u du fo re a ruẹrẹ oma-ẹmeọta hayo se eme na fihọ uzou hu, nọ o rẹ wha ẹmeọta nọ o nya owowa ha tha hayo nọ u fo eyero nọ a nyaku hu. (Wawo 1 Ahwo Kọrint 9:20-23.) Emamọ edhere nọ a rẹ rọ ruẹrẹ oma họ họ ẹsalọ uzoẹme Ikereakere ọvo hayo ivẹ, avọ irẹro eme nọ a rẹ ta wariẹ ai họ. Ẹkiẹriwo izoẹme nọ e rọ obe ọ Reasoning na i ti fiobọhọ evaọ onana.
5 Iruemu nọ E r’Oja kẹ Ẹmeọta Kugbe Ọwhẹwhẹtiẹ: Okenọ ma tẹ be t’ẹme kugbe amọfa, u fo re ma jọ ruọruọruọ avọ eva efuafo. Ehwẹ gbe eriwo ọjajaja i re fiobọhọ re ma dhesẹ iruemu enana. Ma wo ovuẹ nọ o mae woma evaọ akpọ na; u re wo isiuru kẹ ahwo udu oruọzewọ. A tẹ ruẹ nọ isiuru mai kpahe ae u no eva efuafo ze re ma ghale emamọ usi kugbe ai, okioye a jẹ gwọlọ gaviezọ.—2 Kọr. 2:17.
6 Ẹmeọta kugbe ahwo o rẹ jọ oware omawere. Fikiere, ma rẹ jọ wowou avọ areghẹ nọ ma tẹ be vuẹ ovuẹ Uvie na. (Gal. 5:22; Kọl. 4:6) Daoma nyase ohwo ọdekọ na ba avọ omamọ ẹro nọ o re ro riwi omai. Evaọ erei, makọ otẹrọnọ ma wo obokparọ evaọ ẹnyate udu riẹ hẹ, ọ sae te gaviezọ okiọfa nọ Osẹri jọ ọ tẹ be t’ẹme kugbei.
7 Emuhọ ẹmeọta ọwhẹwhẹtiẹ orọnikọ ese fihọ uzou ona uwuhrẹ hẹ. O rọ edhere ẹkpare isiuru ọvo kpahe uzoẹme nọ u kpomahọ ohwo na. Nọ ma tẹ kake ruẹrẹ oma fihọ no, okioye ma jẹ sae t’ẹme ọwhẹwhẹtiẹ kugbe ahwo. Joma daoma te idu ahwo nọ ma nyaku ẹkwoma ẹghale emamọ usi nọ o mae woma, ọrọ eghale ebẹdẹ bẹdẹ Uvie na.—2 Pita 3:13.