Rawo Iẹe
Idhere Usiuwoma Ota nọ A Jiroro Rai kẹ Omai
Rehọ iroro-ejẹ obotọ na ruiruo re i fiobọhọ k’owhẹ ruẹrẹ oma họ kẹ efihọ-ada ebe nọ a fodẹ nọ ma ro ru iruo evaọ amara na.
Si Kẹle Jihova
“O rẹ were ahwo buobu nọ a rọwo Ọghẹnẹ re a si kẹle iẹe. Kọ whọ riẹ nọ Ọghẹnẹ o zizie omai re ma si kẹle iẹe? [Se Jemis 4:8.] A ruẹrẹ obe nana họ re u fiobọhọ kẹ ahwo riẹ epanọ a sae rọ rehọ Ebaibol obọ rai si kẹle Ọghẹnẹ.” Se edhe-ẹme 1 eva ẹwẹ-obe avọ 16.
“Ẹdhoguo-okienyẹ ọ da oria kpobi fia nẹnẹ. O nwane rrọ epanọ a jọ etenẹ dhesẹ na. [Se Ọtausiuwoma Na 8:9b.] U bi gbe ahwo buobu unu sọ Ọghẹnẹ ọ be tubẹ daezọ. [Se ihie-eme ivẹ ọsosuọ erọ edhe-ẹme avọ 4 eva ẹwẹ-obe avọ 119 na.] Uzou nana u dhesẹ oware nọ Ọghẹnẹ ọ rọ kẹ ẹdhoguo-okienyẹ uvẹ evaọ umutho oke.”
Wha Hai Rroro!
“Ebẹbẹ ilogbo gbe eware imuozọ nọ e be via nẹnẹ e rrọ ọdawẹ kẹ ahwo buobu. [Fodẹ oriruo jọ nọ a jọ oborai riẹ.] Kọ whọ riẹ nọ eware itieye na yọ abọjọ oka akpọ-soso nọ u dhesẹ nnọ egọmeti Ọghẹnẹ o bi ti su otọakpọ na kẹle? [Kuvẹ kẹ uyo. Who ve se oria ikereakere nọ u fo, wọhọ Matiu 24:3, 7, 8; Luk 21:7, 10, 11; hayo 2 Timoti 3:1-5.] Ibroshọ nana o ta kpahe oware nọ o jẹ mae rrọ oja re ma jaja aro vi kpahe otofa eware nana nọ e be via na.”
“Ahwo buobu nẹnẹ a rrọ ọkora fiki eware imuozọ nọ e be via hayo ikpeware nọ i bi vru mi ai hayo iyoyou rai nọ i whu. U bi gbe ahwo jọ unu oware nọ Ọghẹnẹ ọ gbẹ be rọ jowọ re ọ whaha eware itieye na ha. Ebaibol na e k’omai imuẹro inọ Ọghẹnẹ ọ te jowọ kẹle re o si uye ahwo-akpọ no. [Se Eviavia 14:6, 7.] Muẹrohọ oware nọ ẹdhoguo Ọghẹnẹ o ti ru kẹ ahwo-akpọ. [Se 2 Pita 3:10, 13.] Ibroshọ nana u wo evuẹ efa kpahe ẹme nana nọ o wuzou gaga na.”
Eriariẹ Nọ I Re Su Kpohọ Uzuazọ Ebẹdẹ Bẹdẹ
“Otẹrọnọ a zizie owhẹ nọ whọ rria okegbe owoma otiọna, kọ whọ rẹ jẹ uzizie na rehọ? [Dhesẹ uwoho nọ o rrọ ẹwẹ-obe avọ 4-5 na, re whọ kuvẹ kẹ uyo.] Muẹrohọ oware nọ Ẹme Ọghẹnẹ ọ ta nọ ohwo o re ru re ọ ruẹse reawere oghẹrẹ uzuazọ utiona ribri. [Se Jọn 17:3.] Obe nana u ti fiobọhọ k’owhẹ wo eriariẹ nọ i re su kpohọ uzuazọ ibẹdẹ bẹdẹ.” Ta kẹe inọ wha te ta kpahe idhe-ẹme isoi ọsosuọ erọ uzou 1 na eva iweze ra notha.
Rovie kpohọ uwoho nọ o rrọ ẹwẹ-obe avọ 188-189, rehọ eme nọ a kere fihọ otọ iwoho na rọ nọ ohwo nọ whọ be t’ẹme kẹ na nọ: “Kọ who rẹro nọ whọ te rria Aparadase evaọ okenọ eriariẹ Ọghẹnẹ e tẹ vọ otọakpọ na soso no? [Kuvẹ kẹ uyo. Who ve se Aizaya 11:9.] Obe nana u ti fiobọhọ k’owhẹ wuhrẹ oware nọ Ebaibol na e ta kpahe Aparadase gbe epanọ ma sae rọ jariẹ.” Ta kẹe inọ wha te ta kpahe edhe-ẹme avọ 11-16 ọrọ uzou 1 na eva iweze notha.
Wuhrẹ Mi Owuhrẹ Ologbo Na
“Kọ who roro nnọ akpọ na ọ rẹ mai woma ẹria otẹrọnọ ahwo a ru lele ẹme nana? [Se Matiu 7:12a. Whọ vẹ kuvẹ kẹ uyo.] Ma rẹ jọ obe nana ruẹ eware buobu nọ ma rẹ sai wuhrẹ mi owuhrẹ nọ ọ mae rro nọ ọ rria no na.” Fielo họ iwoho gbe eme nọ i dhesẹ iwoho na vẹ evaọ uzou avọ 17 na.
“Esẹgbini buobu nẹnẹ a be daoma wuhrẹ emọ rai emamọ uruemu. Kọ who roro nọ onana o roja? [Kuvẹ kẹ uyo. Kẹsena who ve se Itẹ 22:6.] Muẹrohọ nnọ a ta udu họ esẹgbini awọ inọ a wuhrẹ emọ rai no emaha ze. A kere obe nana re u fiobọhọ kẹ ai ru ere.” Fielo họ iwoho gbe eme nọ i dhesẹ iwoho na vẹ evaọ uzou avọ 15 hayo 18.
“Ẹsibuobu, enọ nọ emọ rai e rẹ nọ i re gbe esẹgbini unu. Iyo enọ nana jọ e rẹ bẹ ẹza, ogbẹrọ ere? [Kuvẹ kẹ uyo. Kẹsena who ve se Ahwo Ẹfẹsọs 6:4.] Obe nana o rẹ sai fiobọhọ kẹ esẹgbini k’iyo enọ emọ rai nẹnẹ.” Fielo họ iwoho jọ gbe eme nọ i dhesẹ iwoho na vẹ evaọ uzou avọ 11 gbe 12 hayo 34 rite 36.
Ọzae nọ Ọ Mae Rro nọ Ọ Rria No
“Evaọ ezi nana, ahwo buobu a bi roro kpahe Jesu. Dede na, fikinọ eware iyoma buobu e be via evaọ akpọ na kpobi, o sai gbe ahwo jọ unu sọ Jesu ọ be ginẹ daezọ mai. Ẹvẹ who roro kpahe oyena?” Kuvẹ kẹ uyo. Rovie kpohọ uzou avọ 24, jẹ ta kpẹkpẹe kpahe oware nọ o wọ Jesu ziọ otọakpọ. Kẹsena who ve se Jọn 15:13 nọ u dhesẹ uyoyou udidi nọ Jesu o wo kẹ amọfa.
“Nọ ohwo ọ tẹ fodẹ Jesu Kristi, ahwo jọ a re roro kpahe iẹe wọhọ ọmọboba hayo wọhọ ohwo nọ uye o bẹ te uwhu no. Iroro nọ a wo kpahe Jesu kpobi họ oke eyẹ gbe uwhu riẹ. A bi rri obọdẹ eware nọ o ru gbe eme nọ ọ ta okenọ ọ jọ otọakpọ vo. Eware nọ o ru i kpomahọ ohwo kpobi nọ ọ rria akpọ na no. Oye u je wuzou re ma wuhrẹ te epanọ o rẹ lọhọ te kpobi kpahe eware urirẹ nọ o ru kẹ omai.” Se Jọn 17:3. Rovie kpohọ eme emuhọ nọ e rrọ ẹwẹ-obe ọsosuọ na, re who se edhe-ẹme avọ ene na.
Eme Ọghẹnẹ Ọ Gwọlọ Mi Omai?
“Kọ who roro nọ Ọghẹnẹ ọ gwọlọ nọ ma rria uzuazọ avọ ebẹbẹ nọ e wariẹ omai họ wọhọ epanọ o rrọ nẹnẹ na? [Kuvẹ kẹ uyo. Who ve se Matiu 6:10.] Kọ who roro kpahe oware nọ Uvie Ọghẹnẹ o ginẹ rrọ no?” Rovie kpohọ uwuhrẹ avọ 6, re who se enọ nọ e rrọ emuhọ uwuhrẹ na. Jọ uwuhrẹ na mu ẹme họ, hayo ta kẹ ohwo na inọ who ti ru ere evaọ iweze notha.
“Ghelọ ẹnyaharo akpọ inẹnẹ na, ẹyao gbe uwhu e gbẹ be wha uye-oruẹ gbe ọkora se ahwo-akpọ. Kọ whọ riẹ oware nọ Jesu o ti ru kẹ ahwo nọ a be mọ, enọ e kpako no, makọ enọ i whu no dede?” Kuvẹ kẹ uyo. Otẹrọnọ ohwo na ọ gwọlọ riẹ uyo na, rovie kpohọ uwuhrẹ avọ 5, re who se enọ nọ e rrọ kẹ edhe-ẹme avọ 5-6 na. Wha rehọ idhe-ẹme na tẹme kugbe hayo wha fi oke họ nọ wha ti ro ru ere evaọ iweze notha.
Gọ Ọghẹnẹ Uzẹme Ọvo Na
“Diẹse who roro nọ ma rẹ dhẹ kpohọ kẹ obufihọ re ma sai yerikugbe itunyẹ uzuazọ? [Kuvẹ kẹ uyo. Who ve se Ahwo Rom 15:4.] Muẹrohọ nọ Ikereakere nọ a rọ ẹgba ẹzi kere na e k’omai ọkpọvio, omosasọ, gbe ẹruore, nọ e rẹ sae b’omai ga re ma thihakọ ebẹbẹ. Obe nana o kẹ iroro-ejẹ nọ i re fiobọhọ k’omai wo erere ziezi no isase Ebaibol na ze.” Fielo họ igogo-eme ene nọ e rrọ ẹwẹ-obe avọ 30 na.
“No anwọ okenọ Jesu ọ rọ jọ otọakpọ ze, ahwo buobu a be hae lẹ nọ Uvie Ọghẹnẹ o ze. Kọ whọ sai roro kpahe oware nọ ẹtha Uvie yena u ti ru kẹ ahwo-akpọ no ẹdẹjọ? [Kuvẹ kẹ uyo. Who ve se Daniẹl 2:44.] Obe nana u dhesẹ oware nọ Uvie Ọghẹnẹ o rrọ, oware nọ u ti ru gba, gbe epanọ ma sai ro wo erere no esuo okiẹrẹe riẹ ze.” Ta kpahe uwoho nọ o rrọ ẹwẹ-obe avọ 92-93 na.