Dao Edhere Ọlọlọhọ

Uvi isiuru nọ ma re wo kpahe ahwo o rẹ w’omai nọ ma jẹ gwọlọ riẹ ẹgwọlọ rai, je dhesẹ kẹ ae epanọ Uvie na u ti ro ku ebẹbẹ kpobi nọ a rẹriẹ ovao dhe họ riẹriẹriẹ. (Fil. 2:4) Edhere ọlọlọhọ jọ nọ iwhowho-uvie buobu a ruẹ no nọ o wo ẹgba họ re a ta kẹ ohwo nọ a bi lele ta ẹme na re ọ ta kpahe iwoho Aparadase nọ e rrọ ebe mai, wọhọ enọ a fodẹ evaọ abọ emamobọ ẹwẹ-obe nana. Whọ sae rehọ eme emuhọ jọ nọ e rrọ obotọ na ro ru onana:

◼ “Kọ who roro nọ uviuwou ohwo-akpọ o te sae reawere uyero nọ a dhesẹ evaọ etenẹ na ẹdẹjọ?”

◼ “Mai kpobi ma rẹ gwọlọ nọ emọ mai a reawere oghẹrẹ akpọ nọ a jọ etenẹ dhesẹ na. Kọ eme who roro nọ o gwọlọ re onana o sae roma via?”

◼ “Onana yọ uwoho ọrọ oghẹrẹ nọ akpọ na ọ te jọ eva okenọ a te jọ otọakpọ na ru oreva Ọghẹnẹ wọhọ epanọ a rrọ obọ odhiwu ru na. Kọ who muẹrohọ oware jọ nọ u wo ohẹriẹ no akpọ inẹnẹ na?”

◼ “Kọ o rẹ were owhẹ re whọ rria evaọ otọ oghẹrẹ uyero nọ a jọ etenẹ dhesẹ na? [Kuvẹ kẹ uyo.] Kọ who roro nọ onana o te roma via evaọ etoke uzuazọ mai?”

Gaviezọ ziezi kẹ uyo nọ ohwo na ọ te kẹ, jẹ daoma riẹ iroro riẹ ẹkwoma onọ ovo hayo ivẹ efa nọ whọ rẹ nọe. Otẹrọnọ ahwo jọ a ta nọ a gwọlọ rria otọ uyero nọ o rrọ obe na ha, hayo inọ a rọwo nọ oware utioye o sae via ha, whọ nwani ku ei họ họ inọ a wo isiuru hu. Rọ edhere areghẹ nọ ae oware nọ a je roro ere. Eme nọ a te ta e sai dhesẹ ọdawẹ odidi nọ a wo kpahe ebẹbẹ nọ e rẹriẹ ovao dhe ahwo-akpọ nọ e wọhọ nọ a sai kuhọ họ na.—Izik. 9:4.

Nọ who vuhu ọdawẹ ohwo nọ whọ be t’ẹme kẹ no na, whọ kpọ ẹme ra lele ere. Fielo họ abọ ovuẹ Uvie na nọ o mae ta ẹme kpahe ẹgwọlọ riẹ. Se ikere ọvo hayo ivẹ nọ e ta kpahe oware nọ u kpomahọ iẹe na kẹe. (Rri iroro-ejẹ nọ e rrọ ofẹ emamobọ na.) Jọ ọ rọ ẹro riẹ ruẹ oware nọ Ẹme Ọghẹnẹ ọ ta. O te dhesẹ isiuru, fi obe na họ ada kẹe, re whọ ta kẹe nọ whọ te wariẹ zihe bru ei oke ofa. Ruabọhọ isiuru ohwo na nọ whọ rẹ bọ ga.

[Box on page 5]

Eria jọ nọ Iwoho nọ A ro Dhesẹ Aparadase E Rrọ

Obe Owuhrẹ Ologbo Na: ẹwẹ-obe 251-254

Obe Eriariẹ: ẹwẹ-obe avọ 4-5, 188-189

Ibroshọ Gwọlọ: ẹwẹ-obe avọ 11, 13

Obe ọ Gọ Ọghẹnẹ: ẹwẹ-obe avọ 92-93

[Box on page 5]

Eware nọ E Rrọ Ọdawẹ kẹ Ahwo

Ahwo a be raha akpọ na

Eviavia 11:18

Egọmeti ahwo-akpọ nọ i bi ru iruo rai gba ha

Olezi 146:3, 4;

Daniẹl 2:44

Ekiekpo emamọ uruemu

2 Timoti 3:1-5

Erao nọ a be lahiẹ

Itẹ 12:10

Ethube, ozighi

Olezi 37:10, 11;

Itẹ 2:21, 22

Ẹbẹbẹ Iwou gbe ẹbẹbẹ ugho

Aizaya 65:21, 22

Ẹmo, ozighi ọkparesuọ

Olezi 46:8, 9;

Maeka 4:3, 4

Ẹyao, ọmo

Aizaya 33:24; 35:5, 6

Ogbekuo, ẹdhoguo-okienyẹ

Aizaya 9:6, 7;

2 Pita 3:13

Ohọo, Emamọ emu nọ a be ruẹ re doma ha

Olezi 72:16;

Aizaya 25:6

Ọkora

Olezi 34:8;

Aizaya 65:17-19

Ọriẹwẹ, ohẹriẹ

Aizaya 11:3-5;

Iruẹru 10:34, 35

Uvuhu, okienyẹ

Olezi 72:12-14;

Ọtausiuwoma Na 8:9

Uwhu, uweri

Aizaya 25:8;

Eviavia 21:3, 4