Uzou 19
Okenọ Eriariẹ Ọghẹnẹ E te Vọ Otọakpọ Na
1, 2. Ẹvẹ a rọ te raha emama Jihova no?
MA REHỌ iẹe nọ ohwo jọ nọ ọ rẹ drọ eware ziezi ọ drọ oware uwowoma jọ fihotọ. Ọye ọvo ọ tẹ rehọ unu riẹ tae nọ u woma kẹhẹ—a rẹ ruẹ obọ riẹ hẹ! Rekọ aso-hẹrioke ọwegrẹ riẹ jọ fiki ihrieriọ o te siusi rọ raha iẹe no. Eva uzẹme, onana o rẹ wha edada ilogbo se ohwo nọ ọ drọ oware na. Ẹvẹ eva e rẹ were iẹe te re ọ ruẹ nọ a kare ọwegrẹ riẹ na fihọ uwou-odi! Whọ rẹ sai roro epanọ o rẹ jọ ohwo nọ ọ rẹ drọ eware na oma re ọ ruẹ nọ a wariẹ zihe erru oware na ziọ epaọ ọsosuọ riẹ.
2 Wọhọ ọ drọ eware yena, Jihova o ru ona họ eware rọ ruẹrẹ otọakpọ na je fi ohwo-akpọ họ iẹe. Okenọ ọ ma ọzae gbe aye no, o te whowho nọ iruo otọakpọ riẹ kpobi “i re wowoma.” (Emuhọ 1:31) Adamu avọ Ivi a jọ emọ obọ Ọghẹnẹ, yọ o you rai re. O wo irẹro obaro evawere, oruaro kẹ ai. Uzẹme, Setan o su rai kpohọ ọkparesuọ, rekọ emama igbunu Ọghẹnẹ e nwane raha riẹriẹriẹ hẹ.—Emuhọ 3:23, 24; 6:11, 12.
3. Eme họ “uvi uzuazọ” na?
3 Ọghẹnẹ ọ ta mu no nọ ọ rẹ te kpọ eware vi. O ghinẹ riẹ oja gaga re ọ ruẹ nọ ma te rria evaọ edhere nọ ọ jiroro riẹ vẹre. Ẹria ubroke avọ ukpokpoma mai họ “uvi uzuazọ” na ha, keme u kpotọ gaga vi onọ Jihova o wo họ iroro. “Uvi uzuazọ” nọ Ọghẹnẹ ọ gwọlọ k’omai họ “uzuazọ ebẹdẹ bẹdẹ” evaọ otọ eyero ọgbagba.—1 Timoti 6:12, 19.
4, 5. (a) Ẹvẹ ẹruore Aparadase na ọ te rọ ziọ uzẹme? (b) Fikieme ma je roro kpahe ẹruore mai kẹ obaro?
4 Eriariẹ Ọghẹnẹ e rẹ k’omai owha-iruo evaọ aro Jihova. (Jemis 4:17) Rekọ roro kpahe eghale nọ whọ te reawere rai otẹrọnọ who fi eriariẹ eyena họ iruo re who je wo uzuazọ ebẹdẹ bẹdẹ. Evaọ Ẹme riẹ, Ebaibol na, Jihova Ọghẹnẹ ọ k’omai eriwo oghẹrẹ nọ uzuazọ oyena o te wọhọ evaọ otọakpọ Aparadase nọ ọ kẹle gaga no na. Rekọ, wọhọ ahwo Jihova orọnikọ ma be gọ Ọghẹnẹ fiki irẹro osa jọ họ. Ma be gọ Ọghẹnẹ fikinọ ma you rie. (Mak 12:29, 30) Ofariẹ, ma rẹ sai wo osohwa uzuazọ fikinọ ma be gọ Jihova ha. Uzuazọ ebẹdẹ bẹdẹ yọ okẹ Ọghẹnẹ. (Ahwo Rom 6:23) U re ti woma k’omai re ma roro kpahe oghẹrẹ uzuazọ otiọye keme ẹruore Aparadase na o kareghẹhọ omai kpahe oghẹrẹ Ọghẹnẹ nọ Jihova ọ rọ—oyoyou mai nọ ọ “rẹ te hwosa kẹ e nọ e gwọlọ e riẹ.” (Ahwo Hibru 11:6) Ẹruore nọ ọ rọ gaga evaọ iroro gbe idu mai ọ rẹ lẹliẹ omai thihakọ ọbẹwẹ kpobi evaọ akpọ Setan.—Jerimaya 23:20.
5 Obọnana joma rẹriẹ ova mai ku ẹruore Ebaibol na ọrọ uzuazọ ebẹdẹ bẹdẹ evaọ Aparadase otọakpọ obaro. Ẹvẹ uzuazọ o rẹ te jọ evaọ okenọ eriariẹ Ọghẹnẹ e tẹ vọ otọakpọ na no?
AMAGIDỌN Ọ VRẸ NO—KỌ APARADASE OTỌAKPỌ
6. Eme họ Amagidọn, kọ eme u re ti dhesẹ kẹ ahwo-akpọ?
6 Wọhọ epanọ a kaki dhesiẹi no na, Jihova Ọghẹnẹ ọ rẹ te raha eyero eware imuemu enana no kẹle. Akpọ na ọ be dhẹ vẹrẹvẹrẹ kpohọ oware nọ Ebaibol na i se Ha–Magidọn, hayo Amagidọn. Ubiẹme yena o rẹ lẹliẹ ahwo jọ roro kpahe ebọbo errae nọ erẹwho nọ e be họre e rẹ wha tha, rekọ Amagidọn ọ wọhọ ere vievie he. Wọhọ epanọ Eviavia 16:14-16 o dhesẹ, Amagidọn yọ “ẹdẹ ẹmo ologbo Ọghẹnẹ Erumeru na.” Orọ ẹmo nọ u kpomahọ “ivie akpọ na kpobi,” hayo erẹwho na. Ọmọ Jihova Ọghẹnẹ, Ovie nọ a ro mu na, o re ti muọ odhẹ ẹmo họ ẹdhẹ obọnana. Ekuhọ riẹ o rẹ bẹ evuhu hu. Ahwo nọ e be wọso Uvie Ọghẹnẹ kpobi gbe enọ e rọ abọ eyero omuemu Setan a re ti si ai no. Ahwo nọ e be romakpotọ kẹ Jihova ọvo e rẹ te zọ.—Eviavia 7:9, 14; 19:11-21.
7. Diẹse Setan avọ idhivẹri riẹ a rẹ te jọ evaọ Esuo Odu-Ikpe Kristi na, kọ ẹvẹ onana o te rọ jọ erere kẹ ahwo-akpọ?
7 Dai rehọ iẹe nọ whọ zọ no okpẹtu ọyena. Ẹvẹ uzuazọ o te wọhọ eva otọakpọ ọkpokpọ nọ Ọghẹnẹ ọ yeyaa riẹ na? (2 Pita 3:13) U fo re ma mu fodẹ hẹ, keme Ebaibol na e ta k’omai, yọ oware nọ ọ ta urirẹ. Ma wuhrẹ nọ a re ti mi Setan avọ idhivẹri riẹ ogaga rai no, ka rai fihọ ọgọdọ odidi oria nọ okare-iruo evaọ etoke Esuo Odu Ikpe Jesu Kristi. Emama imuemu, iyoma yena a gbe ti dhere kpokpo ahwo ho, wha ukpokpoma tha jẹ daoma lẹliẹ omai họ ru emuemu mukpahe Ọghẹnẹ hẹ. Ufuoma riẹ o tubẹ rro yọ!—Eviavia 20:1-3.
8, 9. Evaọ akpọ ọkpokpọ na, eme ọ te via kẹ uye, ẹyao gbe owho?
8 Nọ oke o be nyaharo na, oghẹrẹ eyao kpobi e vẹ te rayẹ no. (Aizaya 33:24) Enọ e ko i ve ti dikihẹ, nya, dhohrẹ je gbile, avọ awọ nọ e rọ gaga. Avọ ikpe buobu nọ e vrẹ no karọ edo nọ a je yo, enọ i diezọ a ve ti yo ubo oghọghọ nọ o te wariẹ ai họ. U re ti gbe ituaro na unu nọ a te rọ ibiaro rai ruẹ akpọ urirẹ ekọlọ nọ ọ te r’oma via evaọ iraro rai. (Aizaya 35:5, 6) Uwhremuna, a vẹ te ruẹ ova iyoyou rai! Ẹsejọhọ a vẹ te jẹ ruẹ ude ẹvẹvo evaọ ubroke fiki irui oghọghọ.
9 Dai roro iei! Ino e gbẹ riẹ hẹ, ekpọ nọ emo e rẹ rọ nya onya gbe ibiekpọ e gbẹ riẹ hẹ, ibimu e gbẹ riẹ hẹ, oria nọ a rẹ jọ ruẹrẹ ibiakọ gbe esipito kpobi e gbẹ riẹ hẹ! Ẹyao iroro gbe ọkora i gbe ti mi ahwo evawere rai no ho. Ẹyao ọ gbẹ te lahiẹ emaha na ha. Okpẹtu owho a re ti ku ei rẹriẹ. (Job 33:25) Ma re ti wo omamọ oma uziezi. Kohiohiẹ kohiohiẹ ma rẹ te rọwo no owezẹ ọsasa aso tha avọ ẹgba ọkpokpọ, onọ o vọ avọ ẹgba gbe evawere kẹ ẹdẹ ọkpokpọ uzuazọ ojaja gbe iruo nọ e rẹ veva.
10. Didi iruo ahwo nọ a zọ vrẹ Amagidọn a ti ru?
10 Iruo evawere buobu e rẹ te jariẹ nọ ahwo nọ a fa Amagidọn vrẹ a re ti ru. A rẹ te rẹriẹ akpọ na zihe ruọ aparadase. Oka eyero anwae ogbekuo ọnana kpobi a re ti hwere ai kufiẹ. Igege-eriosehọ gbe egbọ e rẹ te rọ oma via evaọ oria nọ izuzu gbe etọ nọ a gbe ku e jọ vẹre. Ahwo kpobi a rẹ te reawere emamọ iwou. (Aizaya 65:21) Nọ oke o be nyaharo na, abọ aparadase otọakpọ eyena e rẹ te rro bẹsenọ akpọ na soso o re ti te ẹgwọlọ owowoma nọ Ọnọma na o fihọ evaọ ogba Idẹn. Ẹvẹ o rẹ te veva te re a wo abọ evaọ iruo ezihetha ọyena!
11. Eme ọ rẹ te jọ usu obaro ohwo-akpọ kugbe okegbe otọakpọ gbe uzuazọ erao na?
11 A re ti ru enana kpobi evaọ otọ ẹruọsa Ọghẹnẹ re a siọ okegbe na ba ẹraha. Ahwo-akpọ a rẹ te jọ udhedhẹ kugbe erao na. Ukpenọ a rọ evega kpe ai no, ohwo ọ vẹ te wariẹ muọ ẹruorote otọakpọ na họ, sẹro rai ziezi. Dai roro arao-ojihẹ avọ omogodẹ, okpohrokpo avọ ọmọ-eruẹ, nọ e te jọ oria ovo riemu kugbe—yọ erao ẹwho na kpobi a wo ufuoma no. Makọ ọmaha ọboba dede ọ rẹ te jọ oma erao ijihẹ enana dhozọ oware ovo ho, hayo kọ ahwo yoma, ugbarugba a be te raha udhedhẹ akpọ ọkpokpọ na ha. (Aizaya 11:6-8) Ẹvẹ akpọ ọkpokpọ ọyena o ti wo ufuoma te!
AHWO-AKPỌ A NWENE NO
12. Ẹvẹ Aizaya 11:9 o bi ro wo orugba nẹnẹ, kọ ẹvẹ o ti ro rugba evaọ Aparadase?
12 Aizaya 11:9 ọ ta k’omai oware nọ o soriẹ nọ a gbe ti ru eyoma ọvo evaọ otọakpọ na ha. Ọ ta nọ: “Akpọ na ọ te vọ avọ eriariẹ ỌNOWO na wọhọ epanọ ame ọ vọ abade na.” Onana o t’ẹme kpahe ahwo keme erao e rẹ sai wo “eriariẹ ỌNOWO na” re a ru inwene he, keme onọ o sa rai oye a re ru. Rekọ eriariẹ Ọnọma omai i re nwene ahwo. Ababọ avro whẹ omara who ru inwene jọ no fiki efihiruo eriariẹ Ọghẹnẹ evaọ uzuazọ ra. Ima ahwo buobu a ru ere no. Fikiere, eruaruẹ nana u muhọ erugba no evaọ oma ahwo nọ e be gọ Jihova. Ghele na, o tẹ jẹ riobọ kpohọ oke nọ ahwo evaọ akpọ na soso a te ba uruemu erao hayo uruemu ozighi no oma a vẹ te jọ dhedhẹ bẹdẹ bẹdẹ.
13. Didi ọruẹrẹfihotọ ewuhrẹ ọ te rehọ oma via evaọ otọakpọ na?
13 Ẹvẹ u re ti gbunu te evaọ okenọ eriariẹ Ọghẹnẹ e tẹ vọ otọakpọ na no! Ọruẹrẹfihotọ ewuhrẹ ologbo ọ rẹ te jọ evaọ otọ ọkpọvio Jesu Kristi Ovie na avọ ibe isu 144,000 riẹ. Iko “ebe” ekpokpọ i ve ti muọ iruo họ. Ẹsejọhọ enana họ ehrẹ nọ Ọghẹnẹ o kere nọ a te jọ wuhrẹ ahwo otọakpọ na. (Eviavia 20:12) Orọnikọ ẹmo ahwo-akpọ a re ti wuhrẹ hẹ, rekọ udhedhẹ. Ekwakwa emo ọraha kpobi e rẹ te vrẹ no riẹriẹriẹ. (Olezi 46:9) Ahwo nọ e te jọ akpọ ọkpokpọ na a re ti wuhrẹ ai re a ru erivẹ rai avọ uyoyou, adhẹẹ, gbe ọghọ.
14. Ẹvẹ akpọ na o ti ro wo ohẹriẹ okenọ ahwo-akpọ a te zihe ruọ uviuwou okugbe ọvo no?
14 Ahwo-akpọ a ve ti zihe ruọ uviuwou okugbe ọvo. Oware nọ o rẹ za okugbe gbe eyere-inievo dhe e gbẹ te jariẹ hẹ. (Olezi 133:1-3) Ohwo ọvo ọ gbẹ te kare ẹthẹ re iji e seba etho ho. Udhedhẹ o rẹ te jọ evaọ udu ohwo kpobi, evaọ uwou kpobi, evaọ abọ akpọ na kpobi titi.—Maeka 4:4.
ẸKPAROMATHA OGHỌGHỌ NA
15. Utu ahwo ivẹ vẹ a rẹ te kpare ziọ otọakpọ?
15 Evaọ etoke Odu-Ikpe ọyena, ẹkparomatha na o je ti muhọ. Ahwo nọ e barosa thuzi mukpahe ẹzi ọfuafo Ọghẹnẹ, hayo ogaga iruo riẹ, ẹkwoma aro koko nọ a jẹ rọ thuzi mukpahe iruo igbunu hayo ọkpọvio riẹ a rẹ te kpare ai hi. (Matiu 23:15, 33; Ahwo Hibru 6:4-6) Dede, Ọghẹnẹ ọvo ọ rẹ ta ohwo nọ ọ thuzi otiọye na. Rekọ ẹko ahwo ivẹ a rẹ te kpare—“enọ ikiete avọ enọ ikiete he.” (Iruẹru 24:15) Nọ ọruẹrẹfihotọ owowoma otiọna ọ be te jariẹ na, a rẹ sai ku ei họ nọ ahwo nọ ikiete na a te kake kpare ziọ uzuazọ evaọ otọakpọ, ahwo nọ e rọ omarokpotọ gọ Jihova.—Ahwo Hibru 11:35-39.
16. (a) Amono a rẹ te jọ usu “enọ ikiete” nọ a te kpare ziọ otọakpọ na? (b) Ahwo ẹrọwọ anwae vẹ whọ mae gwọlọ nọ whọ rẹ te ruẹ, kọ fikieme?
16 Ukpenọ ma yo usi kpahe emo, okpẹtu, gbe uwhu, idibo Jihova a re ti yo iyẹrẹ igbunu ẹkparomatha na. O rẹ te were kẹhẹ re ma yo kpahe ezihetha ezae gbe eyae ẹrọwọ wọhọ Ebẹle, Enọk, Noa, Abraham, Sera, Job, Mosis, Rehab, Rut, Devidi, Elaeja, Ẹsta. Ẹvẹ ikuigbe igbunu uzẹme nọ a rẹ te ta e te were te nọ a te roma kpotọ gbiku kpahe ikerefihotọ Ebaibol buobu! Ababọ avro te ai te ikiẹrẹe efa nọ i whu no kẹle o rẹ te were ai eva re a wuhrẹ kpahe ekuhọ eyero Setan gbe oghẹrẹ nọ Jihova o ro ru odẹ ẹri riẹ fo jẹ kpare esuo riẹ kpehru.
17. Didiọ obufihọ ahwo ẹrọwọ a te kẹ amọfa nọ a kpare ze?
17 Ẹvẹ erọ ẹrọwọ enana a ti fiobọhọ te evaọ etoke abọfa ẹkparomatha na, okenọ ahwo ima-idu erọ “enọ i kiete he” na a ti ro si ai no ifi uwhu! Ahwo-akpọ buobu a wo uvẹ nọ a rẹ rọ riẹ kpahe Jihova ha. Setan o je ‘wuhu iroro rai di no.’ (2 Ahwo Kọrint 4:4) Rekọ a rẹ te raha iruo Ẹdhọ no. Enọ i kiete he na a re ti zihe ziọ otọakpọ nọ ọ whẹ erru gbe udhedhẹ họ. Ahwo nọ a rọ kpatiẹ ziezi aye re ti dede ai rehọ je wuhrẹ ai kpahe Jihova avọ Ọmọ riẹ nọ o bi su, Jesu Kristi. Nọ ima-idu ahwo nọ a kpare ze a be te nyaze te riẹ je you Ọnọma rai na, eriariẹ Jihova e vẹ te vọ otọakpọ na thesiwa.
18. Ẹvẹ who roro nọ oma o rẹ te j’owhẹ okenọ who ti dede iyoyou nọ a kpare ze?
18 Didi oghọghọ ẹkparomatha na ọ rẹ te wha te idu mai! Ono ọ rẹ te ruẹ uye fiki uwhu ọwegrẹ mai na ha? Uzẹme, ono ọ rẹ te ruẹ uye egwegwe he okenọ ẹyao, owho, asidẹnte o bru ọgbakugbe uyoyou hayo usu, hayo ozighi ọ rehọ uzuazọ oyoyou riẹ no? Whọ dai roro kpahe oghọghọ ẹwariẹ kuomagbe evaọ Aparadase. Iniemọ gbe esemọ, emezae gbe emetẹ, egbẹnyusu gbe imoni, a rẹ te dhẹ dede ohwohwo, be hwẹ, be viẹ oviẹ oghọghọ.
UKUHỌ RIẸ ẸGBAGBA!
19. Didi oware igbunu jọ o te via evaọ etoke Odu-Ikpe na?
19 Evaọ etoke Odu-Ikpe na, oware ugbunu ulogbo jọ o rẹ te rehọ oma via. Rọ kẹ ahwo, ẹsejọhọ o rẹ te jọ abọ nọ ọ mai gbunu ọ Esuo Odu-Ikpe Kristi. Jihova ọ rẹ te kpọ Ọmọ riẹ re o fi irere idhe ẹtanigbo riẹ họ iruo rọ kẹ te ọzae te aye nọ i wo ẹrọwọ gbe enọ i y’ẹme kpobi. Ẹkwoma edhere ọyena, a re ti si emuemu kpobi no a vẹ te kpare ohwo-akpọ kpohọ ẹgbagba.—1 Jọn 2:2; Eviavia 21:1-4.
20. (a) Eme u re ti dhesẹ re a jọ gbagba? (b) Okevẹ ahwo nọ e zọ no Amagidọn gbe enọ a kpare ze a ti ro muọ uzuazọ họ ẹria vọvọ?
20 Ẹgbagba! Eme u re ti dhesẹ? U re ti dhesẹ ezihe kpohọ uzuazọ evaọ edhere nọ Adamu avọ Ivi a reawere riẹ taure a tẹ te thuzi mukpahe Jihova Ọghẹnẹ. Evaọ ugboma, iroro, iruẹru, uruemu, ẹzi—evaọ edhere kpobi nọ whọ sae fodẹ—ohwo-akpọ nọ ọ gba no o re ti ru te ẹgwọlọ Ọghẹnẹ. Kọ ahwo kpobi evaọ oke yena a ti tho ohwohwo? Vievie! Emama Jihova—irre, idodo, erao—eyena kpobi i dhesẹ k’omai nọ oghoghẹrẹ eware e rẹ were iẹe. Ahwo-akpọ nọ a te ẹgbagba no a re ti wo uruemu gbe ẹgba. Ohwo kpobi ọ rẹ te reawere uzuazọ wọhọ epanọ Ọghẹnẹ ọ gwọlọ e riẹ. Eviavia 20:5 ọ ta nọ: “Iri nọ i kiọkọ e gbẹ kparoma no uwhu ze he bẹsenọ odu ikpe i ro te.” Wọhọ otu obuobu nọ e zọ no Amagidọn ze, enọ a kpare ze na a vẹ te ghinẹ ziọ uzuazọ ziezi okenọ a te te ẹgbagba ababọ uzioraha no.
21. (a) Eme ọ rẹ te via evaọ ekuhọ Esuo Odu-Ikpe Kristi na? (b) Eme ọ rẹ te via kẹ Setan uwhremuna jegbe ahwo nọ e rọ abọ riẹ kpobi?
21 Ahwo-akpọ nọ a te ẹgbagba no a vẹ te rẹriẹ ova ku odawọ urere. Evaọ ekuhọ Odu-Ikpe na, a ve ti siobọno Setan avọ idhivẹri riẹ no ọgọdọ odidi na ze ubroke a vẹ te kẹ ai uvẹ rọ dao ẹgba urere rai re a ku ahwo rẹriẹ siọ Jihova ba. Ahwo jọ a re ti fi isiuru ethọthọ họ obaro ọ uyoyou Ọghẹnẹ, rekọ ọkparesuọ ọnana ọ rẹ te jọ ubroke ọvo. Jihova o re ti kpe otu oriobọ enana no kugbe Setan avọ idhivẹri riẹ. Erahizi kpobi a vẹ te vrẹ no bẹdẹ bẹdẹ.—Eviavia 20:7-10.
EME WHO TI RU?
22. Eme who bi rẹro nọ who ti ru evaọ Aparadase?
22 Ẹria ebẹdẹ bẹdẹ u re ti te ahwo nọ i you Jihova Ọghẹnẹ obọ gbe ahwo nọ a be rria Aparadase otọakpọ na. Oghọghọ rai o re ti wo ibẹ hẹ, yọ whọ sai wo abọ evaọ onana re. Ikporakporo, ona, iruo-abọ-ohwo—ẹhẹ, ohwo-akpọ nọ o te ẹgbagba no o re ti ru iruo nọ e mai woma kpobi viọ ahwo nọ e mae riẹ ona evaọ akpọ anwae na! Whaọ, ahwo a rẹ te jọ gbagba yọ oke nọ a ti wo evaọ aro rai o basa ha. Dai roro oware nọ whọ sai ti ru wọhọ ohwo ọgbagba. Roro re kpahe oware nọ whẹ gbe erivẹ ra a ti wuhrẹ kpahe emama Jihova—no ima-idu eko-isi nọ e rọ obehru na kpobi nyai te emerae nọ e mae kawo kpobi. Oware nọ ohwo-akpọ o re ti ru kpobi o vẹ te wha oghọghọ viere se udu Ọsẹ oyoyou obọ odhiwu mai na, Jihova.—Olezi 150:1-6.
23. Fikieme uzuazọ evaọ Aparadase o gbe ti ro fou ehoo ha?
23 Uzuazọ evaọ oke yena u re ti fou ehoo ho. U re ti siuru viere nọ uzuazọ o be nyaharo na. Whọ ruẹ, oba o riẹ kẹ eriariẹ Ọghẹnẹ hẹ. (Ahwo Rom 11:33) No ebẹdẹ te ebẹdẹ, eware buobu e rẹ te jariẹ nọ a re wuhrẹ ọvo gbe eware ekpokpọ nọ a te kiẹ via. (Okokahwohọ 3:11) Yọ nọ whọ be te hai wuhrẹ kpahe Jihova Ọghẹnẹ na, whọ vẹ te rria vrẹ ọvo—orọnikọ imikpe jọ kakao ho rekọ bẹdẹ bẹdẹ!—Olezi 22:26.
24, 25. Fikieme whọ jẹ rria enẹna nya lele eriariẹ Ọghẹnẹ?
24 Kọ obaro ogbunu evaọ otọakpọ aparadase u gbe fo onọ a re ru omodawọ hayo raha oke kpobi kẹ? Nwanọ ere! Whaọ, Jihova o ru usiavẹ kpohọ obaro ogbunu ọyena te owhẹ obọ no. Usiavẹ oyena họ eriariẹ Ọghẹnẹ. Kọ whọ te rehọ iẹe ruiruo?
25 Who te you Jihova, whọ rẹ te ruẹ evawere evaọ eruo oreva riẹ. (1 Jọn 5:3) Nọ who bi le edhere ọyena, rri eghale nọ who re ti wo! Who te fi eriariẹ Ọghẹnẹ họ iruo, o rẹ te wha uzuazọ nọ o mai wo evawere se owhẹ makọ evaọ akpọ okpẹtu ọnana dede. Yọ irere obaro riẹ i bu kẹhẹ, keme onana họ eriariẹ nọ i re su kpohọ uzuazọ ebẹdẹ bẹdẹ! Enẹna họ oke nọ whọ rẹ jọ j’owọ. O jọ ọtamuo ra nọ whọ rẹ rria lele eriariẹ Ọghẹnẹ. Dhesẹ uyoyou ra kẹ Jihova. Rọ orro kẹ odẹ ofuafo riẹ re who je dhesẹ Setan fihọ ọtọrue. Who te ru ere, Jihova Ọghẹnẹ, ọnọ ọ rọ Ehri areghẹ gbe eriariẹ uzẹme na, ọ rẹ te rọ udu logbo uyoyou riẹ ghọghọ k’owhẹ. (Jerimaya 31:3; Zefanaya 3:17) O ve ti je you owhẹ bẹdẹ bẹdẹ!
DAWO ERIARIẸ RA
Eme họ “uvi uzuazọ na”?
Nọ Amagidọn ọ tẹ vrẹ no, eme ọ te via evaọ otọakpọ?
Amono a rẹ te kpare ziọ otọakpọ?
Ẹvẹ ohwo-akpọ o ti ro te ẹgbagba, a vẹ jẹ te dawo ai evaọ ukuhọ?
Eme họ ẹruore ra kpahe Aparadase?
[Uwoho nọ o rrọ ẹwẹ-obe avọ 188, 189]
Who wo irẹro nọ whọ te rria Aparadase, evaọ okenọ eriariẹ Ọghẹnẹ e tẹ vọ otọakpọ na?