Uzou 19
Amagidọn Ọvrẹno, kọ Aparadase Otọakpọ
1. (a) Eme ahwo buobu aroro Amagidọn fihọ? (b) Eme Ebaibol eta kpahiẹe?
“AMAGIDỌN” yọ ẹme idudu kẹ ibuobu. Kẹse kẹse isu akpọ na arẹ tẹme tei nọ Ẹmo Akpọ III. Dedena yọ Ebaibol etẹme kpahọ Amagidọn wọhọ oria nọ Ọghẹnẹ oje fi ẹmo okiẹrẹe. (Eviavia 16:14, 16, King James Version) Ẹmo Ọghẹnẹ ọnana, ọye ọ rẹte gbẹ edhere kẹ eyero okiẹrẹe ọkpokpọ na.
2. (a) Amono a re ti kpe evaọ Amagidọn? (b) Fikiere didi iruemu marẹ rehọ areghẹ siobọno?
2 Amagidọn o re ti kpe iyoma ọvo, keme ọwọhọ ẹmo ahwo nọ, o re kpe iwoma gbe iyoma ha. (Olezi 92:7) Jihova Ọghẹnẹ ọye rẹ te jọ Obroziẹ na, yọ o re ti siọ ohwo kpobi nọ ọ barosa ghẹmeeyo kẹ izi ikiẹrẹe riẹ no. Nẹnẹna ahwo buobu a ruẹ oware ovuovo nọ othọ evaọ eware wọhọ igberẹ-ibro, emufia, ọrueọta hayo ofruriọ họ. Rekọ, wọhọ epanọ Ọghẹnẹ ọta, eware enana ethọ. Fikiere evaọ Amagidọn, o re ti siwi enọ egbẹrọ ae eruo ho. (1 Ahwo Kọrint 6:9, 10; Eviavia 21:8) Nọ ariẹ izi Ọghẹnẹ kpahe eware enana no na, orẹ ruaro kẹ ahwo nọ abi ru eware iyoma itieyena, re anwene idhere rai.
3. (a) Eme Jesu ọ rehọ urere akpọ nana dhesẹ? (b) Eme ọ rẹ te via kẹ Ẹdhọ avọ idhivẹri riẹ? (c) Epanọ ikerakere idhesẹ, evaọ ewẹebe nọ erọ aro na, oghẹrẹ uyerakpọ ovẹ a te riawere riẹ evaọ aparadase otọakpọ na?
3 Amagidọn ọvrẹno, abọ ọvuọvo akpọ omuomu ọnana, ore ti kiọkọhọ. Ahwo nọ agọ Ọghẹnẹ ọvo, arẹ te jọ uzuazọ. (1 Jọn 2:17) Jesu Kristi ọrehọ epanọ orẹ te jọ dhesẹ ẹdẹ Noa. (Matiu 24:37-39; 2 Pita 3:5-7, 13; 2:5) Amagidọn ọvrẹno, uvie Ọghẹnẹ ọvo orẹte jọ isuẹsu nọ i reti su otọakpọ na. Yọ Ẹdhọ avọ idhivẹri riẹ avrẹ no. (Eviavia 20:1-3) Rorote eghale jọ nọ Ebaibol idhesẹ nọ ahwo nọ ayoẹme a rẹte riawere rai evaọ ewẹe ebe efa na.
AHWO KPOBI A TE JỌ UDHEDHẸ
“Ayẹ ọmọ kẹ omai, a rehọ ọmọzae kẹ omai; yọ isuẹsu ọmọ ovie erẹ te jọ ikoko riẹ. Yọ a re ti se odẹ riẹ . . . Ọmọ Ovie Udhedhẹ. Oruaro isuẹsu uvie riẹ gbe udhedhẹ ire ti rehe.”—Aizaya 9:6, 7.
“Evaọ edẹ riẹ okiẹrẹe ọ rẹ te vavia gbe udhedhẹ nọ ure ti vihọ bẹsenọ ọvẹre ọgbẹ te jọ họ. O reti wo enọ oresuo nọ abade te abade je no Ethẹ rite oka avọ oka otọakpọ na.”—Olezi 72:7, 8.
ẸMO ỌGBẸRỌ OFAHA
“Wha nyaze, whai ahwo re wha ruẹ iruo Jihova, epanọ o ru eware igbunu evaọ otọakpọ na. O bi ku emo họ ri duwu oka otọakpọ na kpobi.”—Olezi 46:8, 9.
IWOU IWOMA GBE IRUO OMAWERE KẸ, OHWO KPOBI
“Uzẹme nọ arẹ te bọ iwou avẹ ria ae . . . A rẹ te bọ no re omọfa ọte riae he; arẹ te kọ no re omọfa ọ re ẹriọ voho . . . ahwo nọ mẹ salọ a te jọ iruo abọ rao re erere tẹta. A gbẹ te ruẹ uye kufiẹ hẹ, hayo a gbe ti yẹ emọ nọ i re kie ruọ ozighi hi; keme ae họ emọ nọ Jihova ọsalọ gbe emọ iruọmọ rai.”—Aizaya 65:21-23.
OKPẸTU, OGIDI GBE UMUOMU EVRẸNO
“Keme a re ti kpe irumuomu no . . . Ukiọkọ omojọ orumuomu ọ gbẹ te jọ họ; who reti ri oria riẹ nọ ọjọ, rekọ ọ rẹ te jọ họ.”—Olezi 37:9, 10.
“Rọ kpahe irumuomu, a re ti kpe ai no otọakpọ na no; rọ kẹ ahwo okpikpiri, arẹ te rahai no eva riẹ no.”—Itẹ 2:22.
OTỌAKPỌ NA KPOBI OTEJỌ APARADASE
Jesu ọ tanọ: “Who reti lele omẹ jọ evaọ Aparadase.”—Luk 23:43.
“Enọ ikiẹrẹe ae a reti wo otọakpọ na, avẹ te ria eva riẹ bẹdẹ bẹdẹ.”—Olezi 37:29.
EWARE IWOMA BUOBU ETEJỌ KẸ AHWO KPOBI NỌ A TE RIA
“Jihova ogbaẹmo o ti rueha ọ ido emuore nọ ewhri ọda ziezi kẹ . . . ahwo kpobi, eha udi nọ orọ ehru igbudugbu, gbe ido emuore nọ ewhri ọda ziezi, jẹ vọ avọ eriare.”—Aizaya 25:6.
“Ibi erẹte jọ buobu evaọ otọakpọ na; ehru igbehru ọ rẹ te vọ kiọkọ.” “Otọakpọ, na o te rehọ ẹvi riẹ ze; Ọghẹnẹ, Ọghẹnẹ mai ọ vẹ te ghale omai.”—Olezi 72:16; 67:6.
4, 5. (a) Didi uyerakpọ orẹgbẹ sae jọ aparadase otọakpọ na ofaha? (b) Eme ahwo arẹ te sai ruẹ, nọ arẹ sae jọ eria buobu ruẹ nẹnẹ hẹ?
4 Umuẹro nọ whọ gwọlọ ria aparadase otọakpọ na, oghẹrẹ ọgbọ nọ ajọ eva riẹ ma Adamu ohwo ọsosuọ na. (Emuhọ 2:8; Luk 23:43) Dai roriei—ẹmo ọ gbẹ rọhọ, ethube hayo ogidi. Whọ rẹ sae nya koria koria evaọ oke kpobi tuvo taso ababọ ozọ omonwa odhẹ. Orumuomu ọgbẹ te jọ vievie he.—Olezi 37:35-38.
5 Onana udhesẹ nọ isu ofruriọ egbẹ te jọhọ, gbe isu iruo itheruvo nọ i re kienyẹ ahwo. Ofariẹ ahwo agbẹte wha owha osa uzou ulogbo ho, re arọ dẹ ekwakwa ẹmo. Ohwo ọvuọvo ọ gbẹte jọ ababọ emamọ emuore he, gbe emamọ uwou uwoma fikinọ ọ rẹ sae dẹ ae he. Ababọiruo, aghare gbe ẹghare vrẹta egbẹte jọ ofa ha. Ikpokpoma nọ e be wha uye se iviuwou nẹnẹ na egbẹte jọ ofaha. Ahwo kpobi a re ti ru emamọ iruo, arẹ te sae ruẹ erere iruo rai, jẹ re awere rai.
6. (a) Didi iruo enọ evrẹ Amagidọn i ti ruẹ? (b) Ẹvẹ Ọghẹnẹ ọ te rọ ghale iruo nọ a ti ruẹ?
6 Orọsosuọ, enọ evrẹ Amagidọn a reti ru iruo otọakpọ na urufuọ, a ve hwere ekwakwa eyero anwae ọnana nọ eraha na kufiẹ. Kẹsena, ave ti wo uvẹ evaọ otọ ekpakpọ esuo Uvie na, nọ a te rọ ruẹrẹ otọakpọ na, a ve ruei wowoma fihọ oria nọ ufo kẹ ẹria. Who ri epanọ iruo eyena erẹkẹ omawere te! Ọghẹnẹ ọ rẹte ghale oware kpobi nọ aru. Ọ rẹ te rehọ emamọ oke nọ u re woma ekakọ tha gbe erao ithuro, ọ vẹ te ruẹ nọ asẹro rai no ẹyao gbe omanwa.
7. (a) Didi eya Ọghẹnẹ i reti rugba? (b) Eme ahwo Kristi arẹ hẹrẹ epanọ eya Ọghẹnẹ erọ?
7 Eya Ọmemama oyoyou ọnana, nọ ino oma okere olezi Ebaibol ze na, i reti rugba: “Who bi rovie obọ ra, who te bi ru ẹgwọlọ oware kpobi nọ uwo uzuazọ rọ kẹe.” (Olezi 145:16) Ẹhẹ, emamọ ẹgwọlọ ahwo kpobi nọ abe dhozọ-Ọghẹnẹ a re ti rue kai re tẹtẹtẹ. Marẹ sai roro epanọ uzuazọ u ti gbunu te evaọ aparadase otọakpọ họ. Okenọ ọ jẹ takpahe idhe Ọghẹnẹ nọ ọbete rọ ghale ahwo riẹ, Pita ukọ na okere: “Idhiwu ekpokpọ eriẹ gbe otọakpọ ọkpokpọ nọ marẹ hẹrẹ epanọ eya [Ọghẹnẹ] erọ, yọ evaọ enana ẹrẹriokie ọ rẹ te jọ.”—2 Pita 3:13; Aizaya 65:17; 66:22.
8. (a) Fikieme ma gbẹ gwọlọ idhiwu ekpokpọ gheghe he? (b) Emehọ “idhiwu ekpokpọ” na?
8 Eme họ “idhiwu ekpokpọ” enana? Orọnikọ idhiwu ekpokpọ gheghe he. Ọghẹnẹ ọma idhiwu gheghe mai gbagba, etẹ be kẹe oruaro. (Olezi 8:3; 19:1, 2) “Idhiwu ekpokpọ” na idhesẹ isuẹsu ekpokpọ nọ erọkẹ otọakpọ na. “Idhiwu” nọ erọ enẹna họ isuẹsu ahwo akpọ na. Enana erẹ te vrẹ evaọ Amagidọn. (2 Pita 3:7) “Idhiwu ekpokpọ” nọ ete rehọ ẹta rai họ isuẹsu Ọghẹnẹ nọ erobọ odhiwu. Jesu Kristi ọ tejọ ovie riẹ. Rekọ 144,000 i biti leliei suẹ, nọ erọ abọjọ “idhiwu ekpokpọ” na, eyehọ ilele riẹ nọ iwẹrọwọ.—Eviavia 5:9, 10; 14:1, 3.
9. (a) Emehọ “otọakpọ kpokpọ” na? (b) Emehọ otọakpọ nọ a bete raha na?
9 Kọ, emehọ “otọakpọ ọkpokpọ” na? Orọnikọ otọ okpokpọ họ. Ọghẹnẹ ọma Otọakpọ nana ziezi kẹ ahwo, re ariae, yọ orọ oreva riẹ nọ, orẹjọ bẹdẹ bẹdẹ. (Olezi 104:5) “Otọakpọ ọkpokpọ” na, udhesẹ ogbotu ọkpokpọ hayo ukoko ahwo. Edhere otiọye Ebaibol erẹ rehọ ubiẹme ọ “otọakpọ” na tẹme kẹse kẹse. Re ojọ oriruo, etanọ: “Whaọ oke oyena akpọ na ọsoso [koyehọ, ahwo na] ẹrọo unu ọvuọvo a jẹ ta.” (Emuhọ 11:1) “Otọakpọ” nọ a bete raha na, yọ ahwo nọ a ruọ eyero eware omuomu ọnana via. (2 Pita 3:7) “Otọakpọ ọkpokpọ” nọ o te rehọ ẹta rai họ, uvi idibo Ọghẹnẹ enọ ehẹriẹ oma rai no akpọ ahwo omuomu ọnana.—Jọn 17:14; 1 Jọn 2:17.
10. (a) Amono a bi kokohọ enẹna, kpohọ i bovẹ? (b) Epanọ ikerakere nọ erọ ewẹebe enana idhesẹ, eme a re ti ruẹ evaọ aparadase otọakpọ nọ, isuẹsu ahwo erẹ sai ruẹ hẹ?
10 Enẹna a bejọ koko ahwo kuyẹ kuyẹ gbe korẹwho korẹwho họ, enọ ireti ruọ abọjọ “otọakpọ ọkpokpọ” na via kpohọ, ukoko ahwo Kristi. Okugbe gbe udhedhẹ nọ ọrọ udevie rai na, yọ ọtoruẹ kakao gheghe, ọrọ oware nọ utiru uzuazọ were oma evaọ aparadase otọakpọ okenọ Amagidọn ọvrẹno. Uzẹme nọ, uvie Ọghẹnẹ u reti ru eware nọ isuẹsu ahwo evuevo, erẹ sai wo ẹruore kpahe eruo ho. Dai roro umutho eghale itieye na jọ, evaọ ewẹebe enana.
UYOYOU INIEVO ORỌ AHWO KPOBI
“Ọghẹnẹ ọ rẹ jọ abọvoho, rekọ evaọ korẹwho korẹwho ohwo nọ ọdhozọ riẹ, je ru ẹrẹreokie ọ rẹ rehiẹe.”—Iruẹru 10:34, 35.
“Rri! ogbotu obuobu, nọ ohwo ọvo ọ sai kele he, nọ ino erẹwho kpobi ze, gbe erua gbe ahwo gbe erọo-unu . . . Ohọo ugbeti kpe ai ofa ha, hayo uruame ugbeti kpe ai ofaha.”—Eviavia 7:9, 16.
UDHEDHẸ UDEVIE AHWO GBE ERAO
“Arao-ojihẹ o ti ghine lele omogodẹ ria, ẹkpẹ avọ ọmọẹwe a ti ruẹ kugbe, ọmọeruẹ gbe upelẹ okpohrokpo ọzae gbe arao nọ ariẹ yọrọ a te jọ kugbe; ọmọzae ọsese gheghe ọ rẹ te jọ osu kẹ ae.”—Aizaya 11:6; 65:25.
ẸYAO, OWHO HAYO UWHU EGBẸ TEJỌ OFAHA
“Evaọ oke oyena ibiaro enọ ituaro i re ti rovie, gbe ezọ enọ i di i re ti rovie. Evaọ oke oyena ọmo o re ti duola kpehru wọhọ ugbosu ọzae, ẹrọo ọnọ odienu o re ti bovia evaọ oghọghọ.”—Aizaya 35:5, 6.
“Ọghẹnẹ oma riẹ ọ vẹ te jọ kugbe ai. O ve ti ririe irui kpobi no ibiaro rai, uwhu ogbẹte jọ ofaha hayo kọ uweri hi hayo oviẹ hẹ hayo edada egbẹte jọ ofaha. Keme eware anwae evrẹ no.”—Eviavia 21:3, 4.
ATI ZIHE IRI ZE UZUAZỌ
“Ouwa obe tha nọ enọ erọ iki ekareghẹhọ kpobi i re ti yo urru riẹ, avẹ nya via.”—Jọn 5:28, 29.
“Abade ọ te rehọ iri nọ eriẹe eva ze, uwhu avọ Iki a te rehọ iri nọ erọ ae eva ze.”—Eviavia 20:13.
11. Eme ọ rẹ hẹ raha, oghẹrẹ aparadase nọ ahwo aru kẹse kẹse?
11 Ẹvẹ aparadase otọ esuo uvie Ọghẹnẹ, o ti woma viọ oware kpobi te, onọ eyero anwae ọnana ọ rẹ sai ru ze! Uzẹme nọ, nẹnẹna ahwo jọ aru oria nọ arẹ ria kpohọ oware nọ owọhọ aparadase. Rekọ ahwo nọ agbẹbe ria kugbe evaọ eria enana, asae jọ egbogbọ oriobọ, yọ arẹ tubẹ sai mukpahe ohwohwo. Yọ u te viere, avẹ mọ, avẹ who, je whu. Dedena, nọ Amagidọn ọvrẹno eware nọ etejọ aparadase otọakpọ na, etejọ iwou iwoma ọvoho, gbe egbọ avọ itegu.
12, 13. (a) Amagidọn ọvrẹno, didi iyerakpọ udhedhẹ e te jọ? (b) Re iyereakpọ eyena etẹ ze eme ogwọlọ?
12 Dai rorie, ahwo kuyẹ kuyẹ gbe korẹwho korẹwho ati wuhrẹ epanọ arọ ria kugbe wọhọ ekru ọvo, orọ inievo emezae gbe emetẹ. Are ti ghine you ohwohwo. Ọvuọvo o ti wo oriobọ họ hayo omogbẹrọ. Ohwo ọvuọvo o ti mukpahe omọfaha, fiki uyẹ riẹ, ovioma, hayo oria nọ onọze. Oziobro emu, o re ti re. Kohwo kohwo evaọ otọakpọ, o reti ziheruọ emamọ ogbẹnyusu gbe ọrivẹ kẹ omọfa kpobi. Uzẹme nọ, ọ rẹ te jọ aparadase evaọ edhere ẹzi. Orẹ were owhẹ re whọ ria evaọ aparadase ọnana nọrọ otọ “idhiwu ekpokpọ” na?
13 Nẹnẹna, ahwo a ta ẹme buobu kpahọ ẹria kugbe evaọ udhedhẹ, a tubẹ rehọ ukoko “Okugbe Erẹwho” mu. Yọ enẹna, ahwo gbe erẹwho amae hẹrioma viọ anwẹdẹ. Eme ogwọlọ? Ogwọlọ ibiudu ahwo nọ ire nwene. Rekọ orẹ bẹbẹ kẹ isuẹsu akpọ nana re, aru oware ugbunu utioye. Dedena yọ ovuẹ Ebaibol kpahe uyoyou Ọghẹnẹ oye u bi ruei.
14. Eme ọ rẹ via enẹna, nọ a rẹ rehọ dhesẹ nọ a rẹte ruẹ uyerakpọ aparadase enana?
14 Nọ ahwo buobu, awuhrẹ kpahọ eyero okiẹrẹe ọkpokpọ na no, ute bi no ae ibiudu ze re a you Ọghẹnẹ. Fikiere a te je muọ uyoyou họ erukẹ amọfa, wọhọ epanọ Ọghẹnẹ oru. (1 Jọn 4:9-11, 20) Onana udhesẹ enwene ologbo evaọ izuazọ rai. Ibuobu nọ ejẹ gbogbọ, avọ omukpahọ wọhọ erao nọ i re dhuoma, atẹ romakpotọ je wo udhedhẹ. Wọhọ igodẹ ẹmeoyo, a te koko ai fihọ uthuru ahwo Kristi.
15. (a) Eko ahwo Kristi ivẹ evẹ eriẹ? (b) Amono a te jọ ahwo ọsosuọ nọ a ti ruọ “otọakpọ kpokpọ” na via?
15 Ukri vrẹ ikpe 1,900 no, nọ ekokohọ “uthuru osese” na, orọ 144,000 ahwo Kristi, enọ i ti lele Kristi suẹ ọrọ na. Emekakao rai ọvo, ikiọkọ otọakpọ na; ibuobu avọ Kristi a muhọ esuo no evaọ obọ odhiwu. (Luk 12:32; Eviavia 20:6) Rekọ Jesu ọtẹme kpahe ahwo Kristi ọfa inọ: “Me wo igodẹ efa, enọ [erọ evaọ “uthuru osese”] onana ha; eyena Mẹ jẹte rehọ ae tha hrọ, i re ti yo urru mẹ, avẹ te jọ uthuru ovo, othuru igodẹ ọvo.” (Jọn 10:16) “Ogbotu obuobu” ọ “igodẹ efa” enana a bi koko ai họ enẹna. Ae a te jọ ahwo ọsosuọ evaọ “otọakpọ ọkpokpọ” na. Jihova ọte thọ ai no “uye ulogbo na” evaọ oke urere eyero omuomu ọnana, re azọ kpohọ aparadase otọakpọ na.—Eviavia 7:9, 10, 13-15.
16. Oware ugbunu ovẹ, ure ti ruọ ẹria kugbe erao họ omawere?
16 Amagidọn ọvrẹno, oware ugbunu ofa u ti kuomagbe uyereakpọ aparadase na. Erao wọhọ ikpohrokpo, idhilakpo, ekpẹ gbe edaka, nọ erẹ sae suese enẹna, erẹ te jọ dhedhẹ. Ẹvẹ u ti woma te, re whọ nya evaọ udevie ire, re okpohrokpo okuomagbe lele owhẹ nya omojọ, otiẹsejọ adaka ologbo ọ vẹ jẹ nyaze uwhremuriẹ! Ohwo ọvuọvo ọgbẹte dhozọ oware ofajọ nọ, uwo uzuazọ, ofaha.
17, 18. (a) Eme ọ rẹ wha uweri tha nọ, ọ rẹ te gbẹjọ aparadase otọakpọ na ofaha? (b) Fikieme uje mu omai ẹro nọ, ahwo kpobi a te riawere omokpokpọ ogbagba?
17 Dedena, iwou avọ egbọ emaki woma, ahwo amaki wolẹ je you, hayo erao emake rọ egbẹnyusu, uweri orẹ gbẹ jọ ghele, otẹrọnọ marẹ mọ, jẹ who, ma veje whu. Rekọ, ono ọ rẹ sae rehọ omokpokpọ ogbagba se ahwo kpobi? Isuẹsu ahwo esai siọ ẹyao-ọta, erọ ubiudu gbe eyao efa no ho. Yọ, ohẹ jọnikọ aruere oyo, ebo na erọwo nọ, onana ohẹ whaha ahwo ẹwho ho. Mahẹ gbẹ te who. U te viere, ibiaro mai i ve wo otu, iwo mai kọ ẹyẹlẹ, ohọroma mai uve si ikpu ekwakwa nọ erọ evaọ oma mai, evẹ raha no. Ukuhọ riẹ kọ uwhu. Who ri uweri!
18 Amagidọn ọvrẹno, eva aparadase otọakpọ, iruo igbunu ilogbo Ọghẹnẹ, i reti nwene eyena kpobi, keme eya Ebaibol họ: “Ohwo ọvo nọ ọ be riae, nọte tanọ: ‘Mẹ be mọ ọriẹ hẹ.’ ” (Aizaya 33:24) Okenọ Jesu Kristi ọjọ otọakpọ na, odhesẹ ogaga esiwo riẹ, orọ oghẹrẹ kẹyao kẹyao gbe okpomahọ enọ evia fikiọ ukuoriọ uzioraha no obọ Adamu ze. (Mak 2:1-12; Matiu 15:30, 31) A reti si owho no re, evaọ otọ esuo Uvie na. Ọkpako, ọ te wariẹ maha. Ẹhẹ, uwo ‘ohwo orẹ te boba viọ oke upelẹ riẹ.’ (Job 33:25) Kọ, ẹvẹ oghọghọ okioye ote jọ re, nọ whọ rọwọ kohiohiẹ kohiohiẹ whọ vẹ ruẹ nọ omara ozoma kpokpọ viọ epanọ whọ jọ odẹnukpo!
19. Emehọ ọwegrẹ urere nọ a te raha na, kọ edhere ọ vẹ?
19 Uzẹme nọ, ohwo ọvuọvo nọ ọ rẹria, evaọ omokpokpọ ogbagba ovrawha, evaọ aparadase otọakpọ, nọ ọte gwọlọ whẹ ọrọhọ. Yọ ohwo ọvuọvo o reti whẹ hẹ! Erere idhe ẹtanigbo nọ a ti wo evao urere riẹ, ọ tejọ awere ọriọ okẹ ulogbo Ọghẹnẹ, orọ “uzuazọ ebẹdẹ bẹdẹ fiki Jesu Kristi Ọnowo mai.” (Ahwo Rom 6:23) Wọhọ epanọ Ebaibol eta, Kristi “o re su hrọ wọhọ ovie bẹsenọ Ọghẹnẹ ore fi ewegrẹ riẹ kpobi họ otọ evawọ riẹ, uwhu họ ọwegrẹ urere nọ a te raha na.”—1 Ahwo Kọrint 15:25, 26; Aizaya 25:8.
20. Amono, a te riawere aparadase otọakpọ na, uteno ahwo nọ arọ uzuazọ enẹna no, kọ ẹvẹ oyena o te rọ lọhọ?
20 Makọ ahwo nọ awhu no, a te riawere aparadase otọakpọ na. A re ti zihe ze uzuazọ! Fikiere eva okioye na, abiobọno iworo iwhu, kọ ikuigbe oghọghọ etejọ, kpahọ enọ akpare no iwhuowhu ze. Ẹvẹ uti gbunu te, okenọ a ti dede esemọ iwhuowhu n’uki ze, iniemọ, emọ gbe iyoyou efa! Iwou uwhori, egbẹ hayo iki-itho, egbẹ te jọ họ re eraha erru ọ aparadase otọakpọ na.
21. (a) Amono a ti fiobọhọ ruẹ nọ a fi izi gbe ithibro “idhuwu ekpokpọ” na họ iruo? (b) Ẹvẹ marẹ sai ro dhesẹ nọ ma ghinẹ gwọlọ “idhuwu ekpokpọ” na gbe “otọakpọ kpokpọ” na?
21 Ono, o ti su hayo dhesẹ iruẹru ọ aparadase evaọ otọakpọ na? Izi kpobi gbe ithibro i ti no “idhuwu ekpokpọ” obọ ehru tha. Rekọ a te rehọ ahwo iwẹrọwọ muẹ evaọ otọakpọ na, re a ruẹ nọ afi izi enana gbe ithibro na họ iruo. Fiki epanọ ahwo ọnana adikihẹ kẹ uvie odhiwu na evaọ edhere oghẹrẹsa, Ebaibol i te se ai nọ “emọ-ivie.” (Aizaya 32:1, 2; Olezi 45:16) Makọ evaọ ukoko ahwo Kristi nẹnẹ, ẹzi Ọghẹnẹ ọ rehọ ahwo mu re a sẹro jẹ kpọ iruẹru riẹ. (Iruẹru 20:28) Amagidọn ọvrẹno, mare wo imuẹro nọ, Kristi ọ rẹ te ruẹ nọ a rehọ emamọ ahwo mu re adikihẹ kẹ isuẹsu Uvie na, keme okioyena ore ti wobọ kpahọ iruẹru otọakpọ na viọviọ. Ẹvẹ whọrẹ sai ro dhesẹ nọ, orọ owhẹ oja be hẹrẹ “idhiwu ekpokpọ” gbe “otọakpọ kpokpọ” Ọghẹnẹ? Evaọ eruo, ọrọ oware kpobi nọ whọrẹ sai ruẹ, re whọ nyate ẹgwọlọ nọ a rọ ria evaọ eyero okiẹrẹe ọkpokpọ ọyena.—2 Pita 3:14.