Uzuazọ Evaọ Akpọ Ọkpokpọ Udhedhẹ
Nọ who te rri uwoho nọ o rrọ omobe-ovẹvẹ onana, didi iroro e rẹ j’owhẹ eva? Kọ udu ra o gbẹ gwọlọ udhedhẹ, evawere, gbe ufuoma nọ e rrọ etẹe na? O rẹ ghinẹ were owhẹ. Kọ re a rọwo nọ iyero enana e te ghinẹ jọ otọakpọ yọ ewezẹ, hayo isiuru-iroro gheghe?
Ẹsejọhọ ere ahwo buobu a re roro. Eware nọ ma be ruẹ nẹnẹ họ ẹmo, egbulegbu, ohọo, ẹyao, owho—ma tubẹ fodẹ umutho jọ ọvo. Ghele na uvi iroro kẹ ẹruore o rrọ. Evaọ eriwi kpohọ obaro, Ebaibol na ọ ta nọ “wọhọ epaọ eya [Ọghẹnẹ] ma [be] hẹrẹ ihru ekpokpọ avọ akpọ ọkpokpọ enọ ẹrẹreokie ọ be ria.”—2 Pita 3:13; Aizaya 65:17.
“Ihru ekpokpọ” avọ “akpọ ọkpokpọ” enana, wọhọ epanọ Ebaibol ọ ta, orọnikọ ihru nọ i ruru akpọ na hayo otọakpọ nọ ma bi thihi na ha. A ma otọakpọ nọ ma bi thihi na gbe ihru nọ i ruru akpọ na gbagba, yọ Ebaibol na o dhesẹ nọ e te jọ bẹdẹ bẹdẹ. (Olezi 89:36, 37; 104:5) “Akpọ ọkpokpọ” na ọ te jọ ukoko ahwo okiẹrẹe nọ e be rria otọakpọ, “ihru ekpokpọ” kọ uvie hayo egọmeti ọgbagba obọ odhiwu, onọ u ti su ukoko ahwo otọakpọ onana. Rekọ o rrọ oware iroro re a rọwo nnọ “akpọ ọkpokpọ,” hayo akpọ oruaro ọkpokpọ, ọ te roma via?
Whaọ, roro kpahe uzẹme na inọ emamọ iyero itieye na e jọ abọjọ ẹjiroro Ọghẹnẹ kẹ otọakpọ nana. O fi imava ọ ahwo-akpọ ọsosuọ na họ Aparadase otọakpọ ọrọ Idẹn ọ tẹ kẹ ae obọdẹ iruo: “Wha yẹ, wha vi, re wha vọ evaọ akpọ na re wha wo i.” (Emuhọ 1:28) Ẹhẹ, ẹjiroro Ọghẹnẹ họ re a yẹ emọ je ru Aparadase rai kẹre te akpọ na soso. Dede nọ uwhremu na a salọ aghẹmeeyo kẹ Ọghẹnẹ, rehọ ere dhesẹ nọ a fo kẹ ẹrria ebẹdẹ bẹdẹ hẹ, ẹjiroro ọsosuọ Ọghẹnẹ o nwene he. Yọ o ti ru gba hrọ evaọ akpọ ọkpokpọ na!—Aizaya 55:11.
Evaọ uzẹme, okenọ whọ tẹ be lẹ Olẹ Olori na, hayo Ọsẹ Mai nọ Ọ Rrọ obọ Odhiwu na, be yare nọ Uvie Ọghẹnẹ o ze, yọ whọ be lẹ kẹ egọmeti obọ odhiwu riẹ re u siọ emuemu no otọakpọ na je su akpọ ọkpokpọ nana. (Matiu 6:9, 10) Yọ ma rẹ sai fievahọ inọ Ọghẹnẹ ọ te k’uyo olẹ oyena, keme Ẹme riẹ ọ y’eyaa nnọ: “Ikiẹrẹe e rẹ te rehọ otọ na reuku, a vẹ jẹ ria ae bẹdẹ.”—Olezi 37:29.
Uzuazọ Evaọ Akpọ Ọkpokpọ Ọghẹnẹ
Uvie Ọghẹnẹ o te wha irere otọakpọ nọ i wo ibe he ze, u ve ti ru eware iwoma kpobi nọ Ọghẹnẹ ọ j’iroro rai vẹre rọkẹ ahwo riẹ re a reawere rai evaọ otọakpọ na gba. Omukpahe gbe egrẹ i ti kuhọ, kẹsena ohwo kpobi nọ ọ rrọ otọakpọ ọ vẹ te jọ ogbẹnyusu kẹ ọrivẹ riẹ. Evaọ Ebaibol na, Ọghẹnẹ ọ y’eyaa nnọ o ti ru ‘emo serihọ rite oka akpọ na.’ “Orẹwho o gbẹ te wọ ẹmo bru orẹwho ho, hayo wuhrẹ kpahọ ẹmo-ofio ofa ha.”—Olezi 46:9; Aizaya 2:4.
A ve ti ru akpọ na soso zihe ruọ aparadase wọhọ ọgbọ ezi. Ebaibol na ọ ta nọ: “Enọ e rọ igbrẹwọ gbe etọ eyaya a rẹ te ghọghọ, e rọ idhude e [rẹ te] ghọghọ avọ idodo . . . Ame ọ [rẹ te] va no ẹwọ tha, gbe iko evaọ idhude; Etọ eyaya i [re ti] zihe ruọ etẹre, etọ nọ i wo ame he i [ve ti] zihe ruọ eyeri ame.”—Aizaya 35:1, 6, 7.
Ẹjiroro ọ te jariẹ nọ a re ro wo evawere evaọ otọakpọ Aparadase na. Ohọo u gbe ti kpe ahwo fiki ababọ emuore he. “Kẹsena otọ o vẹ te kẹ ẹvi riẹ,” ere Ebaibol na ọ ta. (Olezi 67:6; 72:16) Ahwo kpobi a te reawere iruo rai, yọ wọhọ epanọ Ọnọma omai ọ y’eyaa na: “A rẹ te kọ ọgbọ-evaene a vẹ re ibi riẹ . . . a gbẹ te kọ no re omọfa ọ re he.”—Aizaya 65:21, 22.
Evaọ akpọ ọkpokpọ Ọghẹnẹ, ahwo a gbẹ te keke oma họ ibruwou hayo iwou nọ i kie no ho, keme Ọghẹnẹ ọ jiroro no inọ: “A rẹ te bọ iwou a vẹ ria ae tọ . . . A gbẹ te bọ iwou no re omọfa ọ ria e he.” Ebaibol na ọ tẹ jẹ y’eyaa inọ: “Iruo rai i gbe ti vrẹ hẹ.” (Aizaya 65:21-23) Fikiere ahwo a ti wo iruo erere, enọ e rẹ v’eva. Uzuazọ u ti fo ehoo ho.
Evaọ obaro, Uvie Ọghẹnẹ u ti tube zihe usu udhedhẹ nọ o jọ ogba ọ Idẹn evaọ udevie erao, gbe udevie erao avọ ahwo na ze. Ebaibol na ọ ta nọ: “Arao-ojihẹ o ti lele omogodẹ ria, ẹkpẹ avọ ọmọẹwe a ti ruẹ oria ovo, ọmọ-eruẹ gbe okpohrokpo a te jọ kugbe ọmaha o veti su ai.”—Aizaya 11:6-9; Hosia 2:18.
Dai roro iei, evaọ otọakpọ Aparadase na a ti siwi eyao gbe oma-oko kpobi no! Ẹme Ọghẹnẹ ọ k’omai imuẹro inọ: “Ohwo ọvo nọ ọ be ria eva riẹ nọ ọ rẹte ta [nọ], ‘Mẹ be mọ,’ ọ rọ họ.” (Aizaya 33:24) “Ọghẹnẹ o ve ti ririe irui kpobi no aro rai; uwhu o gbẹte jọ ofa ha, hayo kọ uweri hi, hayo oviẹ hẹ, hayo edada ọvuọvo ho, keme eware anwae evrẹ no.”—Eviavia 21:4.
Epanọ O rọ Lọhọ k’Owhẹ
Ababọ avro eyaa Ọghẹnẹ kpahe uzuazọ evaọ akpọ ọkpokpọ okiẹrẹe riẹ na i duobọte owhẹ udu. Yọ dede nọ ahwo jọ a re roro nọ eghale itieye i woma vi epanọ e sae rọ via, o rrọ ere he evaọ obọ Ọnọma oyoyou mai na.—Olezi 145:16; Maeka 4:4.
Uzẹme, eware jọ e rrọ nọ ma re ru otẹrọnọ ma rẹ rria bẹdẹ bẹdẹ evaọ Aparadase otọakpọ nọ ọ be tha na. Jesu o dhesẹ oviede rai, okenọ ọ ta evaọ olẹ se Ọghẹnẹ nọ: “Onana họ uzuazọ ebẹdẹ bẹdẹ, re a riẹ owhẹ nọ whẹ ọvo họ uvi Ọghẹnẹ, gbe Jesu Kristi ọnọ who vi.”—Jọn 17:3.
Fikiere otẹrọnọ ma ghinẹ gwọlọ rria evaọ akpọ ọkpokpọ Ọghẹnẹ, ma rẹ kaki wuhrẹ oreva Ọghẹnẹ hrọ ma ve je ru ei. Keme uzẹme o rrọ inọ: “Akpọ [ọnana] avọ urusio riẹ e rẹ te vrẹ, rekọ ohwo nọ o re ru oreva Ọghẹnẹ ọ rẹ jọ bẹdẹ,” re ọ reawere eghale nọ Ọnọma oyoyou mai o ti tunye tha bẹdẹ bẹdẹ.—1 Jọn 2:17.
Ajokpanọ a dhesẹ ofa jọ, a rehọ isase ọ Ebaibol na kpobi no Ebaibol Ẹri Na ze.