A Ruẹaro Eware nọ E be te Via Kẹle Na

NỌ Ọ jẹ ta kpahe oware nọ o te via kẹ otọakpọ na gbe ahwo-akpọ, Pita ukọ na o kere nọ: “Wọhọ epaọ eya [Ọghẹnẹ], ma rẹ hẹrẹ ihru ekpokpọ avọ akpọ ọkpokpọ enọ ẹrẹreokie ọ be ria.” (2 Pita 3:13) Ọghẹnẹ ọ rọ ẹkwoma Aizaya ọruẹaro na yaa eyaa “idhiwu ekpokpọ gbe akpọ ọkpokpọ” no vẹre. (Aizaya 65:17; 66:22) Ẹkwoma eyaa nana nọ ọ wariẹ, Pita o dhesẹ via inọ evaọ oke riẹ eyaa na i ri rugba totọ họ.

Uwhremuna, oware wọhọ ukpe 96 C.E., Eviavia nọ a kẹ Jọn ukọ na ro se ukoko Ileleikristi na i dhesẹ nọ “akpọ ọkpokpọ” yena o wobọ kugbe eghale nọ Uvie Ọghẹnẹ o te wha ze. (Eviavia 21:1-4) Eware nọ Jesu gbe Pọl ukọ na a ta nọ e te via evaọ otọakpọ taure Uvie Ọghẹnẹ o tẹ ze e be via enẹna. Fikiere, ma rẹ sai rẹro nọ Uvie yena o te rọ akpọ ọkpokpọ na ze kẹlena. Ẹvẹ akpọ ọkpokpọ yena ọ te jọ? Obe Aizaya o vuẹ omai.

Eghale Akpọ Ọkpokpọ Na

Udhedhẹ Akpọ-Soso gbe Okugbe Egagọ. “A ve ti duwu egbọdọ rai zihe ruọ etọẹkpẹ gbe izuẹ rai zihe ruọ ubru-ebe; orẹwho o gbẹ te wọ ẹmo bru orẹwho ho, hayo wuhrẹ kpahọ ẹmo-ofio ofa ha.”—Aizaya 2:2-4.

Udhedhẹ O te Jọ Udevie Erao gbe Ahwo. “Arao-ojihẹ o ti lele omogodẹ ria, ẹkpẹ avọ ọmọẹwe a ti ruẹ oria ovo, ọmọ-eruẹ gbe okpohrokpo a te jọ kugbe ọmaha o veti su ai. Eruẹ avọ adaka a te re ẹbe kugbe, emọ rai i ti ruẹ kugbe. Okpohrokpo ọ te re ẹbe wọhọ eruẹ-ọzae. . . . Eva ugbehru ẹri mẹ na a te jọ ariẹ nwaoma hayo ekpe he, keme akpọ na ọ te vọ avọ eriariẹ ỌNOWO na wọhọ epanọ ame ọ vọ abade.”—Aizaya 11:6-9.

Ahwo Kpobi A te Ruẹ Emu Re Kiọkọ. “Ehru ugbehru itho nana ỌNOWO Ogbaẹmo na ọ jẹ te rehọ emamọ emu kuọ ahwo riẹ, gbe emamọ idi, te elọlọhọ te egaga nọ a there ziezi.”—Aizaya 25:6.

Uwhu O gbẹ te Jọ Họ. “Ọ vẹ lọ uwhu no ri bẹdẹ, Ọnowo na ỌGHẸNẸ o veti ririe irui oviẹ no aro rai, gbe ekela no oma ahwo riẹ nọ e rọ evaọ akpọ na kpobi; keme na ỌNOWO na ọ ta no.”—Aizaya 25:8.

A te Kpare Ahwo No Uwhu Ze. “Ahwo nọ i whu no a rẹ te zọ, a rẹ te kpare oma. O whai enọ e be ria evaọ akpọ na, wha rọwo ze wha so ole oghọghọ! . . . Otọ o vẹte rehọ enọ iwhu no na rọ ze.”—Aizaya 26:19.

Mesaya O ti Bruoziẹ Okiẹrẹe. “Ọ rẹte rọ ẹro-ọruẹ, hayo a tanọ bruoziẹ hẹ; rekọ ọ rẹte rehọ ẹrẹreokie guẹdhọ iwhrori, o veti bruoziẹ udhedhẹ kẹ enọ e rọ oma kpotọ, eva akpọ na.”—Aizaya 11:3, 4.

A ti Siwi Ahwo nọ A Tuaro gbe Enọ I Diezọ. “Aro enọ itu i veti rovie, ezọ enọ i di i veti rovie.”—Aizaya 35:5.

Etọ Eyaya I ti Wo Ẹvi. “Enọ e rọ igbrẹwọ gbe etọ eyaya a rẹ te ghọghọ, e rọ idhude e rẹte ghọghọ avọ idodo; . . . ọ rẹte mọ buobu, jẹ ghọghọ avọ ile esuọ.”—Aizaya 35:1, 2.

Akpọ Ọkpokpọ. “Mẹ [be] ma idhiwu ekpokpọ [egọmeti ọkpokpọ nọ o ti su no odhiwu ze] gbe akpọ ọkpokpọ [uyerakpọ okpokpọ orọ ahwo okiẹrẹe]; a gbẹ te kareghẹhọ eware anwae he hayo a gbe ti roro ai hi. Rekọ eva e were owhẹ re whọ ghọghọ bẹdẹ evaọ oyena nọ omẹ ma na . . . [Ahwo nọ a te rria akpọ ọkpokpọ nọ Ọghẹnẹ ọ ya eyaa riẹ na] a rẹ te bọ iwou a vẹ ria ae tọ, a rẹ te kọ ọgbọ-evaene a vẹ re ibi riẹ. A gbẹ te bọ iwou no re omọfa ọ ria e he, a gbẹ te kọ no re omọfa ọ re he. Epanọ ire e rẹ tọ te na ere ahwo mẹ a rẹ te tọ te, jegbe esanọ mẹ na a rẹ te re erere iruo abọ rai krẹkri. Iruo rai i gbe ti vrẹ hẹ, hayo a gbe ti yẹ emọ nọ e rẹ rioja ha; keme a rẹ te jọ emọ ahwo nọ ỌNOWO na ọ ghale no, jegbe emọ rai. Nọ a ti bo ho yọ ome yo no, nọ a gbẹ rọ ẹta yọ ome yo no.” “’Wọhọ epanọ odhiwu ọkpokpọ gbe akpọ ọkpokpọ nọ mẹ rẹte ma na e rẹte jọ kẹ omẹ na; ere emọ rai gbe odẹ rai e rẹte jọ bẹdẹ,’ ere ỌNOWO na ọ tae.”—Aizaya 65:17-25; 66:22.

Eruẹaruẹ Kpahe Eghale Ilogbo nọ E Rrọ Obaro

Orọnikọ obe Aizaya ọvo a jọ ruẹaro kpahe obaro ho. Eruẹaruẹ buobu e vọ Ebaibol na nọ i dhesẹ eware iwoma buobu nọ Ọghẹnẹ o ti ru ẹkwoma Uvie riẹ nọ Kristi o ti su.a Kọ whọ gwọlọ rria aparadase otiọye? Uvẹ na u rovie fihọ k’owhẹ! Daoma kiẹ oware nọ Ebaibol na o gine wuhrẹ kpahe ẹjiroro owoma nọ Ọghẹnẹ o wo kẹ obaro na, re who je wuhrẹ epanọ eghale na e sai ro te owhẹ re. O te were Isẹri Jihova re a fi obọ họ kẹ owhẹ ru onana.

[Oruvẹ-obotọ]

[Uwoho nọ e rrọ ẹwẹ-obe avọ 8]

Udhedhẹ o te jọ udevie ahwo-akpọ kpobi gbe erao

[Uwoho nọ e rrọ ẹwẹ-obe avọ 9]

Ahwo nọ a whu no a te kparoma ze uzuazọ

[Uwoho nọ e rrọ ẹwẹ-obe avọ 10]

Otọakpọ na soso o te jọ aparadase