Abọ 8
Rria Bẹdẹ Bẹdẹ Eva Otọakpọ Aparadase
1, 2. Oghẹrẹvẹ uzuazọ o rẹ te jọ evaọ otọ esuo Uvie Ọghẹnẹ?
1 Oghẹrẹvẹ uzuazọ o te jọ nọ Ọghẹnẹ o te si emuemu gbe uye oruẹ no otọakpọ na no jẹ rehọ akpọ ọkpokpọ riẹ ze eva otọ ọkpọvio uyoyou Uvie odhiwu riẹ? Ọghẹnẹ ọ yaa nọ o ti ‘rovie abọ riẹ, je ru ẹgwọlọ eware nọ i wo uzuazọ kpobi rọ kẹ ae.’—Olezi 145:16.
2 Eme họ uvi isiuru ra? Ogbẹrọnọ re who wo uzuazọ evawere, emamọ iruo ẹgwọlọ, eyero akpọ obuobu, okegbe erru, udhedhẹ eva udevie ahwo kpobi, gbe ufuoma no okienyẹ, ẹyao, uye oruẹ, gbe uwhu? Kọ ẹvẹ kpahe eyero oghọghọ ẹzi? Eware eyena kpobi e te ziọ uzẹme kẹle evaọ otọ esuo Uvie Ọghẹnẹ. Muẹrohọ oware nọ eruẹaruẹ Ebaibol e ta kpahe eghale nọ e te tha eva akpọ ọkpokpọ na.
Ohwo eva Udhedhẹ Ogbagba
3-6. Imuẹro vẹ e riẹ nọ ahwo a re ti wo udhedhẹ evaọ akpọ ọkpokpọ na?
3 ‘[Ọghẹnẹ] o ru ẹmo serihọ rii te oka akpọ; o te wiri uzei na, o te bru ehi [ẹmo] na ibribro, ọ tẹ rehọ errae mahe ekẹkẹ na!’—Olezi 46:9.
4 “A ve ti duwu egbọdọ rai zihe ruọ etọẹkpẹ gbe izuẹ rai zihe ruọ ubru-ebe; orẹwho o gbẹ te wọ ẹmo bru orẹwho ho, hayo wuhrẹ kpahọ ẹmo-ofio ofa ha.”—Aizaya 2:4.
5 “Enọ e rọ oma kpotọ, e rẹ te rọ otọ na reuku; oma o rẹ te were ae evaọ omofọwẹ.”—Olezi 37:11.
6 “Oma o tẹ fọ akpọ na kpobi avọ udhedhẹ, a tẹ jẹ suọile oghọghọ.”—Aizaya 14:7.
Ohwo gbe Erao a rọ Udhedhẹ
7, 8. Udhedhẹ vẹ o rẹ te jọ evaọ udevie ahwo gbe erao?
7 ‘Arao-ojihẹ o ti lele omogodẹ rria, ẹkpẹ avọ ọmọ-ẹwe a ti ruẹ oria ovo, ọmọ-eruẹ gbe okpohrokpo a te jọ kugbe, ọmaha o veti su ai. Eruẹ avọ adaka a te re ẹbe kugbe, emọ rai i ti ruẹ kugbe. Okpohrokpo ọ te re ẹbe wọhọ eruẹ-ọzae. Ọmọ-unuevie ọ te jọ eghogho araomuomu nọ a re se ọrẹwọkpẹwọ zaharo, ọmọ nọ ọ whẹro uno o ti dhe obọ họ unu obi. A te jariẹ nwaoma ha hayo ekpe he.’—Aizaya 11:6-9.
8 “Me re ti ru owhẹ avọ erao ẹwọ gbe evra obọ ehru, te emerao nọ i re siẹ eva otọ rria kugbe eva ẹdẹ ọyena . . . Me veti ru owhai keria avọ omofọwẹ.”—Hosia 2:18.
Omokpokpọ Ogbagba, Uzuazọ Ebẹdẹ Bẹdẹ
9-14. Dhesẹ kpahe oghẹrẹ omokpokpọ nọ o te jọ akpọ ọkpokpọ na.
9 “Kẹsena aro enọ itu i veti rovie, ezọ enọ i di i veti rovie; kẹsena ọmo o veti duola wọhọ uyo, ẹrọo ọnọ o dienu ọ rẹte so ole oghọghọ.”—Aizaya 35:5, 6.
10 “Ọghẹnẹ o ve ti ririe irui kpobi no aro rai; uwhu o gbẹte jọ ofa ha, hayo kọ uweri hi, hayo oviẹ hẹ, hayo edada ọvuọvo ho.”—Eviavia 21:4.
11 “Ohwo ọvo nọ ọ be rria eva riẹ nọ ọ rẹte ta nọ, ‘Mẹ be mọ,’ ọ rọ họ.”—Aizaya 33:24.
12 “Jọ oma riẹ uzihe ruọ oboba wọhọ oma ọmaha, re o zihe ruọ ọmoha avọ ogaga epaọ oke ọsosuọ riẹ.”—Job 33:25.
13 “Okẹ Ọghẹnẹ họ uzuazọ ebẹdẹ bẹdẹ, fiki Jesu Kristi Ọnowo mai.”—Ahwo Rom 6:23.
14 “Kohwo kohwo nọ ọ rọwo riẹ . . . [o re] wo uzuazọ ebẹdẹ bẹdẹ.”—Jọn 3:16.
A Zihe Iwhuowhu ziọ Uzuazọ
15-17. Ẹruore vẹ ọ riẹ kẹ enọ i whu no?
15 “Ẹkparomatha enọ ikiete avọ enọ ikiete he e rẹ te jarọ.”—Iruẹru 24:15.
16 ‘Oke o be tha nọ enọ e rọ eva iki ekareghẹhọ kpobi [ekareghẹhọ Ọghẹnẹ] i je ti yo urru riẹ, a vẹ te nya via.’—Jọn 5:28, 29.
17 “Abade o te siobọno enọ i whu fihọ iẹe, uwhu avọ ẹri [uki na] i te siobọno enọ e jọ eva rai.”—Eviavia 20:13.
Otọakpọ, Aparadase Eware Buobu
18-22. Eme a re ti zihe otọakpọ na kpobi fihọ?
18 “Me reti vi iso rose ai eva ezi rai; e rẹte jọ iso oghale. Ire otọ na e rẹte mọ ibi rai, otọ na o rẹte kẹ ẹvi riẹ, a reti wo omofọwẹ eva otọ rai.”—Izikiẹl 34:26, 27.
19 “Kẹsena otọ o vẹ te kẹ ẹvi riẹ, Ọghẹnẹ, Ọghẹnẹ mai, ọ rẹ te ghale omai.”—Olezi 67:6.
20 ‘Enọ e rọ igbrẹwọ gbe etọ eyaya a rẹ te ghọghọ, e rọ idhude e rẹte ghọghọ wọhọ idodo.’—Aizaya 35:1.
21 ‘Igbehru-itho avọ ikpehru a te va ruọ ile-esuọ, ire udhude kpobi e rẹte tehe abọ rai. Ukpe ọ enwẹnwẹ, urre jonipa o vẹ te dhẹ fihọ orria riẹ, ukpe ọ urre inwe, urre ododo o rẹ dhẹ fihọ orria riẹ.’—Aizaya 55:12, 13.
22 “Who re ti lele omẹ jọ obọ Aparadase.”—Luk 23:43.
Emamọ Iwou kẹ Ahwo Kpobi
23, 24. Didi imuẹro ma wo nnọ emamọ iwou buobu e te jọ kẹ ahwo kpobi?
23 “A rẹ te bọ iwou a vẹ rria ae tọ . . . A gbẹ te bọ iwou no re omọfa ọ rria e he, a gbẹ te kọ no re omọfa ọ re he . . . esanọ mẹ na a rẹ te re erere iruo abọ rai krẹkri. Iruo rai i gbe ti vrẹ hẹ, hayo a gbe ti yẹ emọ nọ e rẹ rioja ha.”—Aizaya 65:21-23.
24 “Ohwo kpobi ọ rẹ te keria otọ ekakọ gbe otọ urre fig riẹ, ozọ ohwo ọvo u gbe ti mu ai hi.”—Maeka 4:4.
Whọ Sae Rria Bẹdẹ Bẹdẹ eva Aparadase
25. Eriwo ogbunu vẹ ma wo kpahe obaro?
25 Ẹvẹ eriwo obaro yena o gbunu te! Diodẹ uvi ẹjiroro uzuazọ o rẹ sai wo enẹna nọ u te wo ẹruore nnọ evaọ akpọ Ọghẹnẹ ebẹbẹ mai kpobi nẹnẹ na i re ti zihe ruọ eware anwae no! “A gbẹ te kareghẹhọ eware anwae he hayo a gbe ti roro ai hi.” (Aizaya 65:17) Yọ ẹvẹ o rẹ sasa oma te re ma riẹ nọ uzuazọ eva okioye o te jọ bẹdẹ: “ [Ọghẹnẹ] ọ vẹ lọ uwhu no rii bẹdẹ.”—Aizaya 25:8.
26. Eme họ usiavẹ ẹrria ibẹdẹ evaọ akpọ ọkpokpọ Ọghẹnẹ?
26 Kọ whọ gwọlọ rria Aparadase ọyena bẹdẹ bẹdẹ evaọ akpọ ọkpokpọ nọ ọ kẹle gaga no na? Whọ rẹ sae nọ nọ, ‘Eme me re ru re me wo aruoriwo Ọghẹnẹ eva ekuhọ akpọ ọnana re mẹ jẹ rria vrẹ nyae ruọ akpọ ọkpokpọ riẹ?’ Who re ru oware nọ Jesu o dhesẹ evaọ olẹ riẹ se Ọghẹnẹ: “Onana họ uzuazọ ebẹdẹ bẹdẹ, re a riẹ owhẹ nọ whọ ọvo họ uvi Ọghẹnẹ, gbe Jesu Kristi ọnọ who vi.”—Jọn 17:3.
27. Eme who re ru hrọ re who wo abọ evaọ ẹjiroro Ọghẹnẹ?
27 Fikiere, gwọlọ Ebaibol wo, re who rri sọ eware nọ whọ jọ omobe onana se na uzẹme. Gwọlọ amọfa nọ i bi se je wuhrẹ izẹme Ebaibol nana. Kẹnoma kẹ egagọ eviẹwẹ kpobi nọ i bi wuhrẹ je bi ru eware nọ i mukpahe Ebaibol na. Wuhrẹ oghẹrẹ nọ whẹ, gbe ima ahwo efa nọ i muọ oreva Ọghẹnẹ họ eruo no, e rẹ sai wo abọ kugbe evaọ ẹjiroro Ọghẹnẹ nnọ ahwo a rria bẹdẹ bẹdẹ eva aparadase ọ otọakpọ. Re who fi udu họ oware nọ Ẹme Ọghẹnẹ nọ o gie ẹwolo ku o whowho kpahe obaro na: “Akpọ na avọ urusio riẹ e rẹ te vrẹ, rekọ ohwo nọ o re ru oreva Ọghẹnẹ ọ rẹ jọ bẹdẹ.”—1 Jọn 2:17.
[Uwoho nọ o rrọ ẹwẹ-obe avọ 31]
Ẹjiroro Ọghẹnẹ re o zihe aparadase ziọ otọakpọ na o ti ru gba kẹle