Uwuhrẹ 5
Eme Họ Ẹjiroro Ọghẹnẹ Kpahe Otọakpọ Na?
Fikieme Jihova ọ jẹ ma otọakpọ na? (1, 2)
Fikieme otọakpọ na o gbẹ rọ aparadase enẹna ha? (3)
Eme ọ te via kẹ ahwo omuomu? (4)
Evaọ obaro, eme Jesu o ti ru kẹ enọ ebe mọ? ekpako? iwhuowhu? (5, 6)
Re whọ sai w’obọ evaọ eghale obaro, eme o gwọlọ nọ who re ru? (7)
1. Jihova ọ ma otọakpọ ọnana re ahwo a reawere ẹria riẹ bẹdẹ bẹdẹ. Ọ gwọlọ nọ ahwo ikiẹrẹe avọ evawere a rria otọakpọ na ẹsikpobi. (Olezi 115:16; Aizaya 45:18) A te raha otọakpọ ọnana ha; ọ te jọ bẹdẹ bẹdẹ.—Olezi 104:5; Okokahwohọ 1:4.
2. Taure Ọghẹnẹ ọ tẹ te ma ohwo, Ọ salọ abọ ọsese otọakpọ na jọ o te ru ei zihe ruọ aparadase owowoma. O se riei ogba Idẹn. Etenẹ o fi ọzae avọ aye ọsosuọ, Adamu avọ Ivi họ. Ẹjiroro Ọghẹnẹ rọ kẹ ai họ re a y’emọ re avọ otọakpọ na kpobi. Ẹmẹrera a jẹ hae ti ro ru otọakpọ na kpobi fihọ aparadase.—Emuhọ 1:28; 2:8, 15.
3. Adamu avọ Ivi a raha uzi ẹkwoma aro koko ọ rọ th’uzi Ọghẹnẹ. Fikiere Jihova o te le ai no ogba Idẹn. Aparadase o te vru. (Emuhọ 3:1-6, 23) Rekọ ẹjiroro Jihova kpahe otọakpọ na ọ re thọriẹe ẹro ho. Ọ yeyaa inọ o ti ru ei fihọ aparadase, eria nọ ahwo-akpọ a te rria bẹdẹ bẹdẹ. Ẹvẹ o ti ro ru onana?—Olezi 37:29.
4. Taure otọakpọ ọnana o te ti zihe ruọ aparadase, a re si ahwo omuomu no hrọ. (Olezi 37:38) Onana o te via evaọ Amagidọn, oye họ ẹmo Ọghẹnẹ nọ ọ te rọ rehọ emuemu te oba. Ofariẹ, a ve ti fi Setan họ uwou-odi ikpe 1,000. Onana u dhesẹ nọ a te nyase ohwo omuomu ọvo ba re ọ raha akpọ na ha. Ahwo Ọghẹnẹ ọvo a te zọ.—Eviavia 16:14, 16; 20:1-3.
5. Oke oyena Jesu Kristi o ve ti su akpọ ọnana wọhọ Ovie evaọ ikpe 1,000. (Eviavia 20:6) Ọ vẹ te rehọ ẹmẹrera si uzioraha no iroro gbe oma mai. Ma ve ti zihe ruọ ahwo egbagba wọhọ epanọ Adamu avọ Ivi a jọ taure a tẹ te raha uzi. Oke oyena ẹyao, owho, gbe uwhu e gbẹ te jọ họ. A ti siwi enọ e be mọ, ahwo nọ ewho no a te wariẹ zihe ruọ emoha.—Job 33:25; Aizaya 33:24; Eviavia 21:3, 4.
6. Evaọ etoke Esuo Odu Ikpe Jesu, ahwo nọ iwo ẹrọwọ a ti ruiruo re a zihe otọakpọ na kpobi ruọ aparadase. (Luk 23:43) Ofariẹ, ima ahwo nọ i whu no a vẹ te kpare ae ze uzuazọ evaọ otọakpọ na. (Iruẹru 24:15) A te ru oware nọ Ọghẹnẹ ọ gwọlọ mi ai, a rẹ te rria akpọ na bẹdẹ bẹdẹ. Ogbẹrọ ere he, a vẹ te raha ae kufiẹ bẹdẹ bẹdẹ.—Jọn 5:28, 29; Eviavia 20:11-15.
7. Ẹjiroro ọsosuọ Ọghẹnẹ kpahe otọakpọ na ọ vẹ te rehọ ere kparobọ. Kọ whọ gwọlọ w’obọ evaọ eghale obaro enana? Otẹrọ ere, u fo nọ who re gbe he wuhrẹ kpahe Jihova je yoẹme kẹ ẹgwọlọ riẹ. Ekpohọ iwuhrẹ evaọ Ọgwa Uvie Isẹri Jihova u ti fiobọhọ k’owhẹ ru ere.—Aizaya 11:9; Ahwo Hibru 10:24, 25.
[Picture on page 10]
Aparadase nọ o vru
[Picture on page 10]
Amagidọn ọ tẹ vrẹ no, a ve ti ru otọakpọ na zihe ruọ aparadase