Enọ I Bi Se Ebe Mai A Nọ Inọ . . .

Bovẹ Aparadase nọ A Jọ Ebaibol Ya Eyaa Riẹ na Ọ te Jọ?

▪ Jesu ọ ya eyaa kẹ ọzae jọ nọ o te uwhu no nọ o fi ẹrọwọ họ iẹe inọ: “Who re ti lele omẹ jọ obọ Paradais.” (Luk 23:43) Diẹse ọzae na ọ te jọ? Kọ obọ odhiwu Aparadase na ọ te jọ, otọakpọ na, hayo oria jọ evaọ idedeghe na nọ ahwo-akpọ a te jọ hẹrẹ ẹdhoguo?

Ọsẹgboni ọsosuọ mai a jọ Aparadase. Ebaibol e ta kẹ omai nọ: “Ọghẹnẹ, ỌNOWO na, ọ tẹ kọ ọgbọ fihọ eva Idẹn, eva obọ ovatha-ọre; kọ etẹe o fi ohwo nọ ọ ma na họ. . . . ỌNOWO na, Ọghẹnẹ, ọ tẹ rehọ ohwo fihọ ogege Idẹn, re o kporo iei, re ọ jẹ sẹro riẹ.” (Emuhọ 2:8, 15) Nọ a jẹ fa eme yena fihọ ẹvẹrẹ Griki, a fa ẹme nọ a jọ etenẹ se “ọgbọ” na pa·raʹdei·sos, onọ ẹme Oyibo nọ a fa “aparadase” na o no ze.

Wọhọ epanọ eyewọ e rẹ bọ uwou rai rro nọ emọ rai i bi bu na, ere ọsẹgboni ọsosuọ mai a hai ti ru uwou Aparadase rai kẹre vrẹ ọgbọ Idẹn nọ uviuwou ahwo-akpọ u te muhọ ẹrro no. Ọghẹnẹ ọ ta kẹ ae nọ: “Wha vọ evaọ akpọ na re wha wo i.”—Emuhọ 1:28.

Fikiere, ẹjiroro Ọnọ ọ ma omai họ re ahwo-akpọ a yẹ emọ jẹ rria evaọ Aparadase evaọ otọakpọ na. A hae rria bẹdẹ bẹdẹ evaọ otọakpọ soso nọ o hae te jọ ọgbọ owowoma ababọ oria jọ nọ a ruẹrẹhọ nọ a re ki ahwo họ. Ẹjiroro Ọghẹnẹ họ re otọakpọ na o jọ uwou ebẹdẹ bẹdẹ kẹ ahwo-akpọ. Agbẹta nọ ughe orọ eware sa-sa nọ Ọghẹnẹ ọ ma fihọ otọakpọ na o rẹ rọ kẹ omai omawere gaga na! A ma omai re ma rria otọakpọ na.

Kọ ẹjiroro Ọghẹnẹ o nwene no? Ijo. Keme Jihova ọ kẹ omai imuẹro nọ: “Ere ẹme nọ o no unu mẹ ze ọ rọ; o re zihe bru omẹ tha ababọ họ, rekọ o re ru epanọ mẹ ta gba je ru oware nọ mẹ rehọ fiki riẹ vi ei na gba.” (Aizaya 55:11) Nọ ikpe idu esa (3,000) e vrẹ no rono okenọ a rọ ma ohwo-akpọ, Ebaibol na e ta kpahe “ọnọ o ru akpọ na” inọ “ọ ma riẹ kẹ ozighi hi,” rekọ “ọ ma ae re a ria ae.” (Aizaya 45:18) Ẹjiroro Ọghẹnẹ o ri nwene he. Otọakpọ na o te jọ aparadase ẹdẹjọ.

O rrọ oware nọ a re muẹrohọ inọ eria Ebaibol buobu nọ a jọ ta ẹme kpahe Aparadase i dhesẹ uzuazọ uyero evaọ otọakpọ obonẹ. Wọhọ oriruo, eruẹaruẹ Aizaya e ta nọ: “A rẹ te bọ iwou a vẹ ria ae tọ, a rẹ te kọ ọgbọ-evaene a vẹ re ibi riẹ.” (Aizaya 65:21) Bovẹ a rẹ jọ bọ iwou jẹ kọ egbọ-evaene? Bovẹ a rẹ jọ re ibi ire? Evaọ otọakpọ na. Itẹ 2:21 o ta gbiae inọ: “Okiẹrẹe ọ rẹ te ria otọ na.”

Jesu ọ ta kpahe aparadase otọakpọ re. Uzẹme, ọ ya eyaa kpahe aparadase obọ odhiwu re, rekọ oyena o rrọ kẹ umutho ahwo jọ ọvo. (Luk 12:32) Nọ ahwo nana a te whu no, a te kpare ae kpohọ Aparadase obọ odhiwu, a ve ti kuomagbe Kristi su Aparadase otọakpọ. (Eviavia 5:10; 14:1-3) Ahwo nana nọ a ti lele Kristi su evaọ obọ odhiwu na a te roma totọ su Aparadase otọakpọ na jẹ ruẹ nọ a rẹrotei ziezi nya lele utee Ọghẹnẹ.

Jesu ọ riẹ nọ onana họ oreva Ọghẹnẹ kẹ otọakpọ na. O rrọ ere keme ọyomariẹ ọ jọ obọ odhiwu kugbe Ọsẹ riẹ evaọ okenọ a ma ọgbọ Idẹn na. Uvẹ uzuazọ evaọ aparadase otọakpọ u rovie fihọ kẹ ohwo kpobi nọ o fi ẹrọwọ họ iẹe nẹnẹ. (Jọn 3:16) Jesu ọ ya eyaa kẹ ahwo otiọye na nọ: “Who re ti lele omẹ jọ obọ Paradais.”—Luk 23:43.

[Ọnọ o wo uwoho nọ o rrọ ẹwẹ-obe avọ 26]

© FORGET Patrick/SAGAPHOTO.COM/Alamy