Wuhrẹ No Ẹme Ọghẹnẹ ze

Eme Họ Ẹjiroro Ọghẹnẹ Kpahe Otọakpọ Na?

Uzoẹme nana u dhunu te enọ jọ nọ o rẹ sae jọnọ whọ nọ no ẹdẹjọ, u te je dhesẹ oria nọ whọ rẹ sae jọ ruẹ iyo na evaọ Ebaibol ra. O te were Isẹri Jihova re a lele owhẹ ta ẹme kpahe iyo na.

1. Eme họ ẹjiroro Ọghẹnẹ kpahe otọakpọ na?

Otọakpọ na họ uwou ohwo-akpọ. Nọ Ọghẹnẹ ọ ma ikọ-odhiwu fihọ obọ odhiwu no, ọ tẹ ma ohwo-akpọ re ọ reawere otọakpọ na. (Job 38:4, 7) Fikiere, Jihova o fi ọzae ọsosuọ na họ aparadase owowoma nọ a se Idẹn, jẹ kẹe avọ emọ nọ o ti yẹ kpobi uvẹ uzuazọ nọ u wo oba ha evaọ otọakpọ na.—Emuhọ 2:15-17; se Olezi 115:16.

Umutho oria jọ otọakpọ na ọvo ọgbọ Idẹn na ọ jọ. Ẹjiroro Ọghẹnẹ kẹ imava-orọo ọsosuọ na, Adamu avọ Ivi, họ re a yẹ emọ. O jọ ẹjiroro Ọghẹnẹ inọ uviuwou ohwo-akpọ o be rro na, a rẹ rẹrote otọakpọ na je ru ei họ aparadase. (Emuhọ 1:28) A te raha otọakpọ na vievie he.—Se Olezi 104:5.

2. Fikieme akpọ na ọ gbẹ rrọ aparadase obọnana ha?

Adamu avọ Ivi a ghẹmeeyo kẹ Ọghẹnẹ, fikiere o te le ai no ọgbọ Idẹn. Aparadase o te vru, yọ ohwo-akpọ ọvo ọ re sai zihe iei ze he. Ebaibol na ọ ta nọ: “Ọ rehọ akpọ na họ obọ ahwo omuomu.”—Job 9:24; se Emuhọ 3:23, 24.

Dede na, ẹjiroro ọsosuọ Jihova kẹ ohwo-akpọ ọ re thọrọ iẹe ẹro ho, yọ ọ te siẹe ba erugba ha. (Aizaya 45:18) O ti zihe uviuwou ohwo-akpọ kpohọ epanọ ọ jiroro riẹ vẹre.—Se Olezi 37:11.

3. Oghẹrẹ vẹ Ọghẹnẹ o ti ro zihe udhedhẹ ze otọakpọ na?

Re ohwo-akpọ ọ sae reawere udhedhẹ, o gwọlọ nọ Ọghẹnẹ ọ rẹ raha ahwo omuomu na no. Evaọ ẹmo Amagẹdọn, ikọ-odhiwu Ọghẹnẹ e te raha ahwo kpobi nọ e wọso Ọghẹnẹ. A ti fi Setan họ uwou-odi evaọ ikpe odu ọvo (1,000), rekọ ahwo nọ i you Ọghẹnẹ a te zọ jẹ reawere akpọ ọkpokpọ.—Se Eviavia 16:14, 16; 20:1-3; 21:3, 4.

4. Oke vẹ uyẹ-oruẹ u ti ro kuhọ?

Evaọ etoke ikpe odu ọvo na (1,000), Jesu ọ te jọ obọ odhiwu su otọakpọ na je zihe otọakpọ na ruọ aparadase. Ofariẹ, o ti si izieraha ahwo nọ i you Ọghẹnẹ no. Jesu ọ vẹ te rọ ere si ẹyao, owho, gbe uwhu n’otọ.—Se Aizaya 11:9; 25:8; 33:24; 35:1.

Oke vẹ Ọghẹnẹ o ti ro si umuomu no otọakpọ na? Jesu ọ kẹ “oka” jọ nọ u ti dhesẹ nọ urere na o kẹle no. Eware nọ e rrọ akpọ na via nẹnẹ i bi fi uzuazọ ohwo-akpọ họ ọza, yọ i dhesẹ nọ ma be rria etoke “urere akpọ na.”—Se Matiu 24:3, 7-14, 21, 22; 2 Timoti 3:1-5.

5. Amono a te rria Aparadase nọ ọ be tha na?

Jesu o vi ilele riẹ inọ a nyai ru ilele je wuhrẹ ai idhere Ọghẹnẹ nọ e vọ avọ uyoyou. (Matiu 28:19, 20) Wariẹ otọakpọ na soso họ, Jihova ọ be ruẹrẹ ima ahwo họ kẹ uzuazọ evaọ akpọ ọkpokpọ. (Zefanaya 2:3) Evaọ Egwa Uvie Isẹri Jihova, ahwo a re wuhrẹ epanọ a sae rọ jọ emamọ ezae uwou-orọo gbe emamọ esẹ, emamọ eyae uwou-orọo gbe emamọ ini. Te emọ gbe esẹgbini a bi wuhrẹ oware nọ o kẹ imuẹro inọ emamọ uzuazọ o rrọ obaro tha.—Se Maeka 4:1-4.

Whọ te jọ obọ Ọgwa Uvie ruẹ ahwo nọ i gine you Ọghẹnẹ, jẹ be gwọlọ wuhrẹ epanọ a sai ro ru ei eva were.—Se Hibru 10:24, 25.

Rọkẹ evuẹ efa, rri uzou 3 orọ obe nana, Eme Ebaibol na O Gine Wuhrẹ? onọ Isẹri Jihova a kere.