Joma Duobọ họ Ugogo Ẹme Na!
1 Nẹnẹ na ahwo jọ a wo ithihakọ họ. A gwọlọ riẹ ohwo nọ ma rrọ gbe oware nọ o wọ omai nya. A tẹ ruẹ nọ ẹjiroro nọ ma ro weze nya họ re ma t’ẹme kpahe Ebaibol na, a rẹ sae seba eyo. Isase Ebaibol gbe eme abọ-ẹzi nọ a rẹ ta yọ eware nọ e r’oja ha evaọ izuazọ ahwo buobu. Kọ ẹvẹ ma sai ro ru re u mu ahwo nọ a wo uwou na ẹro inọ u fo re a rehọ umutho iminiti jọ ro lele omai t’ẹme kpahe Ebaibol na?
2 Oware nọ O rẹ Mai Ruiruo: Usiavẹ na họ re a dhesẹ kẹ ọnọ o wo uwou na inọ Ebaibol na ọ kẹ ifue obọdẹ rọkẹ ebẹbẹ nọ i kpoma họ iẹ je ru ere evaọ umutho eme wọhọ epanọ o rẹ sae lọhọ te. Edhere ẹmeọta nọ ọ mai woma o re wo ugogo onọ jọ nọ o rẹ lẹliẹ ọnọ o wo uwou na roro, oria ikere jọ nọ o k’uyo onọ na u ve lele ie. Whọ sae reawere ọ iroro-ejẹ nana jọ nọ whọ rẹ dawo. A ruẹrẹ e rai họ re i fiobọhọ k’omai duobọ họ ugogo ẹme na vẹrẹvẹrẹ jẹ kpare isiuru ọnọ o wo uwou na.
3 Evaọ ẹkwotọ nọ ahwo a rẹ jọ ta nnọ a wo isiuru hu, nọ onọ jọ nọ u kpomahọ ae:
◼ “Nọ ma be nya kẹle odu-ikpe ọfa na, ẹruore who wo evaọ udu ra manikọ avro? [Kuvẹ kẹ uyo.] Ebaibol na ọ ruẹaro eware ozighi nọ ma be ruẹ nẹnẹ na gbe oware nọ u ti noi ze.” Se 2 Timoti 3:1, 2, 5 gbe Itẹ 2:21, 22.
◼ “Ahwo a wo ọdawẹ kẹ ẹruorote oma gaga evaọ orẹwho onana. Kọ whọ riẹ nọ Ọghẹnẹ ọ y’eyaa nnọ o ti kuọ ebẹbẹ ugboma kpobi họ?” Se Eviavia 21:3, 4.
◼ “Ẹvẹ who roro nọ udogbe mai na u re ro wo erere otẹrọnọ ahwo kpobi nọ a be rria etenẹ a bi fi ehri-izi Ebaibol họ iruo?” Se Matiu 22:37-39.
4 Nọ iruo mai o rrọ ẹta usiuwoma Uvie na, oke kpobi nọ o lọhọ ma rẹ kpọ ovao rri oware nọ Uvie na u ti rugba. Whọ sae ta nọ:
◼ “Kọ whọ riẹ nọ obe nọ o mae kpako evaọ akpọ na, Ebaibol na, o ruẹaro nnọ egọmeti ọvuọvo ọ te jọ kẹ akpọ na soso?” Se Daniẹl 2:44.
◼ “Ẹvẹ who roro nọ eware e rẹ jọ otẹrọnọ Jesu Kristi o te su otọakpọ na?” Se Olezi 72:7, 8.
5 Evaọ ẹkwotọ nọ ahwo a je wo oma-egagọ, whọ sae dao edhere emuhọ ẹme ọnana jọ:
◼ “Ahwo buobu a be ruẹ uye ọ omohẹriẹ fiki ọzae hayo aye nọ a rrọ, oghẹrẹ egagọ, uyẹ, hayo ovioma. Ẹvẹ who roro nọ o rrọ Ọghẹnẹ oma kpahe oghẹrẹ omohẹriẹ utioye na?” Se Iruẹru 10:34, 35.
◼ “Ma riẹ nọ Jesu Kristi o ru iruo igbunu buobu evaọ edẹ riẹ. Otẹrọnọ o lọhọ re whọ yare iẹ nnọ o ru iruo igbunu ofa jọ, ovẹ whọ rẹ yare?” Se Olezi 72:12-14, 16.
6 Otẹrọnọ ọnọ o wo uwou na ọ be gwọlọ rovie ẹthẹ hẹ, whọ sae ta enẹ ro muọ ẹmeọta họ:
◼ “O bẹ ahwo buobu no nẹnẹ re a yo kpahe ebẹbẹ. A gwọlọ yo kpahe ifue. Ababọ avro, ere o rrọ k’owhẹ. Rekọ diẹse ma jẹ sai duku uvi ifue kẹ ebẹbẹ mai?” K’uvẹ kẹ uyo. Se 2 Timoti 3:16, 17.
7 Kọ Whọ Gbẹ Dawo Iẹ? Ẹsibuobu onọ olọlọhọ, nọ o rrọ kpẹkpẹe họ oware nọ o gwọlọ re a kpare isiuru ohwo nọ o wo uwou na. Aye jọ nọ ọ jẹ hai le ahwo vẹre o zizie inievo-emetẹ ivẹ rueva uwou riẹ evaọ okenọ omọvo rae jọ ọ nọe onọ na inọ: “Kọ whọ riẹ Uvie nọ whọ be hae lẹ kẹ evaọ Olẹ Olori na?” Onọ na o tẹ kpare isiuru aye na, ọ tẹ rọwo obe uwuhrẹ Ebaibol. Enẹna ọ rrọ odibo Jihova nọ ọ roma mudhe no!
8 Okenọ whọ tẹ be t’ẹme kẹ ohwo nọ o wo uwou, jọ eme ra i no eva ze. T’ẹme no udu ra ze. Ahwo a rẹ mae kezọ ziezi evaọ okenọ u te mu ae ẹro nọ ma ghine wo isiuru kẹ ae.—Iruẹru 2:46, 47.
9 Iruo ovuẹ emamọ usi na o rrọ use-abọ nẹnẹ. Ahwo buobu nọ i wo iwou a re viẹro kpahe erara. Efa a duoma họ iruo leno yọ umutho oke uvẹ ọvo a wo. Ghele na, o rẹ sai mu omai ẹro nnọ ahwo buobu nọ a wo ẹgwọlọ a gbẹ riẹ nọ a re duku. (Mat. 10:11) Omodawọ mai re ma gwọlọ ae o rẹ sae kparobọ viere otẹrọnọ ma ru ẹmeọta mai kpẹkpẹe je duobọ họ ugogo ẹme na!