Eriariẹ Ọghẹnẹ Uzẹme na I Re Su Kpohọ Uzuazọ
1 “Onana họ uzuazọ ebẹdẹ bẹdẹ, re a riẹ owhẹ nọ whẹ ọvo họ uvi Ọghẹnẹ,” erei Jesu ọ ta evaọ olẹ se Ọsẹ riẹ. (Jọn 17:3) Ẹvẹ osa-ohwa oyena o rro te! Ẹkwoma obe ọ Eriariẹ Nọ I Re Su Kpohọ Uzuazọ Ebẹdẹ Bẹdẹ na o ro ruiruo, ma sai fiobọhọ kẹ amọfa wuhrẹ oware nọ u fo nọ a re ru re a rria bẹdẹ bẹdẹ. Eme ma rẹ sae ta re o kpare isiuru rai je ru ai re a gwọlọ se obe ọ Eriariẹ na?
2 Whọ sae rehọ ẹmeọta nọ o ru Ebaibol na via wọhọ ehri ọkpọvio ro ruiruo, whọ vẹ ta nọ:
◼ “Ma be t’ẹme kugbe erivẹ mai kpahe oria nọ a rẹ sae jọ ruẹ ehri ọkpọvio nọ a re ro yeri kugbe ebẹbẹ uzuazọ. Evaọ oke nọ ukpemu ahwo buobu a jẹ nekpẹ Ebaibol na. Rekọ enẹna iruemu ahwo i nwene no; ibuobu a wo avro kpahe Ebaibol na, a bi rri riei wọhọ obe gheghe nọ ahwo a kere. Ovẹ họ iroro ra? [Kuvẹ kẹ uyo.] Uvi iroro o riẹ nọ a sae rọ ta nọ Ebaibol na u w’iruo evaọ edẹ mai na. [Se 2 Timoti 3:16, 17.] Ehri-izi Ebaibol i w’iruo te epanọ e jọ evaọ okenọ Ọghẹnẹ ọ rọ rehọ ẹgba riẹ kpọ ekere Ebaibol na.” Rovie kpohọ ẹwẹ-obe 16 evaọ obe Eriariẹ na, jẹ t’ẹme kpẹkpẹe kpahe uvi ọkpọvio nọ ma ruẹ evaọ Ovuẹ Jesu obọ Ugbehru na. Se ẹme nọ a kpoka wariẹ họ evaọ edhe-ẹme 11 hayo ọnọ ọ rọ edhe-ẹme 13. Fi obe na họ ada, jẹ ruẹrẹ kpahe kẹ ezihetha re whọ kẹ uyo onọ na, Ẹvẹ ma sai ro wo erere no eriariẹ nọ e rọ Ebaibol na ze?
3 Nọ olẹ o rọ ẹme isiuru kẹ ahwo buobu na, whọ sae gwọlọ t’ẹme kpahiẹe, whọ vẹ nọ nikọ:
◼ “Avọ ebẹbẹ egaga nọ ma be rẹriẹ ova dhe evaọ uzuazọ ọgbọ na, who roro nọ olẹ o sae ghine fiobọhọ k’omai? [Hẹrẹ kẹ uyo.] Ahwo buobu a roro nọ a sikẹle Ọghẹnẹ no ẹkwoma olẹ nọ a rẹ lẹ sei gbe nọ erei oruo o kẹ rai ẹgba ugboma no, yọ ghinọ oye họ oware nọ Ebaibol na ọ tubẹ yeyaa riẹ. [Rovie obe Eriariẹ na kpohọ ẹwẹre-obe 156, je se Ahwo Filipai 4:6, 7.] Ghele, o sae jọ ohwo oma ẹsejọ nọ a be k’uyo kẹ elẹ riẹ hẹ. Uzou onana o t’ẹme kpahe ‘Epanọ Whọ rẹ sae ro Si Kẹle Ọghẹnẹ.’ [Fi obe na họ ada evaọ unu azọhọ riẹ.] Uzou onana u dhesẹ epanọ ma sae rọ gaviezọ kẹ Ọghẹnẹ re, nọ ẹmeọta kugbei o rẹ jọ abọ-ọvo ho na. Ma sae t’ẹme kpahe oyena oke ọfa nọ mẹ tẹ nyaze.”
4 Kọ whọ gwọlọ rehọ ọnyaruọ ovavo ro muọ ewuhrẹ họ? Ojọ orọ etenẹ nọ o sae ruiruo k’owhẹ:
◼ “Ma be rehọ obe uwuhrẹ Ebaibol ọvọvẹ kẹ ahwo. Kọ who ru uwuhrẹ Ebaibol okejọ no vẹre? [Kuvẹ kẹ uyo.] Jọ me dhesẹ oware obọfihọ uwuhrẹ nọ ma re ro ruiruo k’owhẹ.” Dhesẹ obe Eriariẹ na, rovie kpohọ ẹwẹre-obe 3 re ohwo nọ o wo uwou na ọ ruẹ eware nọ e riẹe eva, jẹ nọ inọ, “Kọ whọ roro no ẹdẹjọ rọ kpahe oware nọ Ebaibol ọ ta kpahe izou-eme enana?” Rovie kpohọ uzou nọ ohwo nọ o wo uwou na ọ mai wo isiuru kpahe, re who se izou-eme na. Dhesẹ nọ whọ gwọlọ ru odhesẹvia kpẹkpẹe epanọ ma re ru evuẹ enana evaọ uwuhrẹ mai. Te a mu uwuhrẹ họ hayo a muhọ ha, fi obe na họ ada evaọ unu azọhọ riẹ.
5 Nẹnẹ ahwo gbidigbidi a be gaviezọ kẹ eriariẹ egbagba Ọghẹnẹ uzẹme na. (Aiz. 2:2-4) O rọ uvẹ mai re ma fiobọhọ kẹ ahwo buobu nọ ma sae fiobọhọ kẹ kpobi re a wuhrẹ kpahe Jihova re a sae su ai kpohọ uzuazọ.—1 Tim. 2:4.