Gọ Egagọ Efuafo Taso Tuvo
1 A rehọ ọkwa-iruo obọdẹ k’omai no. Oye họ re ma jọ isẹri Jihova. Ma rọ abọ ukoko etusiuwoma akpọ-soso nọ Jihova o bi ro ruiruo re ọ rehọ iruo nọ e mae rro kpobi nọ e rọ otọ ewhowho Uvie na ze orugba! (Mak 13:10) Fiki ẹkpata oke mai na, kọ ma bi wo abọ evaọ iruo enana vọvọ te oghẹrẹ nọ o sae lọhọ kpobi?
2 Ukuhọ riẹ ma riẹ unu ahwo nọ a ti kurẹriẹ fiki usiuwoma ota mai hi. Jihova ọ k’omai imuẹro nọ e te jọ “otu obuobu,” nọ a vuhumu ẹkwoma ‘egagọ fuafo rai taso tuvo.’ (Evia. 7:9, 15) Isẹri nọ i bu vi ima isoi ae a bi ruiruo ababọ eriosehọ evaọ iruo Ọghẹnẹ orọnikọ a wo isiuru kpahe ezọgaviẹ ọvo ho, hayo kọ e kpohọ ewuhrẹ ọvo ho. Ae yọ iruiruo nọ i re whowho emamọ usi na nya akpọ-wariẹ!
3 Kẹdẹ kẹdẹ, uvẹ buobu e riẹ nọ a re ro jiri Jihova, evaọ usiuwoma ota hayo evaọ oke ọnyakuo. Dai roro kpahe isẹri logbo nọ a rẹ sai se otẹrọnọ omomọvo mai ọ be ghale uzẹme na kugbe omọvo evaọ ẹsikpobi. Ovuhumuo mai rọ kẹ Jihova o rẹ w’omai re ma ta kpahiẹe avọ ajọwha.—Ol. 92:1, 2.
4 Fiobọhọ kẹ Amọfa re a Gọ Egagọ Efuafo: Jihova ọ gbẹ be rehọ ẹvi ghale omai. (Hag. 2:7) Evaọ etoke ukpe iruo nọ o vrẹ na evaọ Nigeria, a ru iwuhrẹ Ebaibol 272,954 evaọ ẹghale rai kamara kamara. Ẹjiroro nọ ma bi ro wuhrẹ kugbe ahwo enana họ re ma fiobọhọ kẹ ai jọ ilele Jesu. (Mt. 28:19, 20) Ibuobu rai a ru emamọ ẹnyaharo no vẹre ẹkwoma ekpohọ iwuhrẹ kẹse kẹse. A mu egbẹrioma rai họ ẹta kẹ no kpahe ‘iruo ilogbo nọ Ọghẹnẹ o ru’ nọ a wuhrẹ no. (Iruẹru 2:11) Kọ a sae zizie ai enẹna re a wo abọ evaọ odibọgba obọ otafe?
5 Evaọ etoke ọ April u ti fo re ma ru omodawọ obọdẹ re ma zizie ahwo kpokpọ nọ i te, re a kuomagbe omai evaọ usiuwoma ota. Kọ ọmọ-uwuhrẹ ra o dhesẹ ẹgwọlọ re o ru onana no? Otẹrọ ere, kọ o te ute Ikereakere na? (Rri obe ọ Our Ministry ewẹ-obe 97-99.) Okenọ ọmọ-uwuhrẹ na o te wo isiuru nọ o re w’abọ evaọ usiuwoma ota, t’ẹme kpahiẹe kugbe ọsẹro ukoko na, nọ ọ rẹ ruẹrẹ ekpako ivẹ họ re a rri ẹme na. Otẹrọnọ ọmọ-uwuhrẹ na o te ọnọ a rẹ rehọ wọhọ owhowho-uvie nọ ọ re họ-ame he, zizie ei re o kuomagbe owhẹ evaọ obọ otafe. Maero esẹro usiuwoma gbe iwuhrẹ obe ukoko a re woi họ iroro re a fiobọhọ kẹ ahwo nọ i te re a muhọ ewhowho evaọ April.
6 Esẹ gbe ini a rẹ sae roro sọ emọ rai a te re a jọ iwhowho-uvie nọ e re te họ-ame he. (Ol. 148:12, 13) Otẹrọnọ ọmọ ra ọ gwọlọ nọ ọ rẹ ta usiuwoma evaọ iruo Uvie na yọ o wo omamọ uruemu, whọ sae nya bru omọvo ekpako na nọ e rọ ogbẹgwae iruo na re a t’ẹme kpahe onana. Nọ a tẹ ruẹ owhẹ avọ ọmọ na no, ekpako ivẹ a rẹ kiẹ jọ ọmọ ra o te re a kele iei wọhọ owhowho-uvie. Oware obọdẹ o riẹ nọ a rẹ rọ ghọghọ nọ emọ i te kuomagbe omai evaọ ejiro Ọghẹnẹ!
7 Jihova ọvo o te kẹ egagọ efuafo mai. (Luk 4:8) Jọ mai omomọvo ọ rehọ uvẹ ọvọvọ igbunu mai ro jiri iei ‘ziezi.’—Ol. 109:30; 113:3.