Oke U Nwene No
1 Ebaibol na ọ vuẹ omai inọ “eyero akpọ na o bi nwene.” (1 Kọr. 7:31, NW ) Ẹvẹ oyena o rọ uzẹme te nẹnẹ! Makọ evaọ etoke uzuazọ mai dede, ma ruẹ inwene ilogbo no evaọ iroro gbe uruemu ahwo evaọ udevie oghoghẹrẹ ikoko ohwo-akpọ. Otẹrọnọ ma re wo obokparọ re ma rehọ usi Uvie na se ai, oghẹrẹ nọ ma be rọ kẹ ovuẹ na u re lele inwene etoke na hrọ. Ma gwọlọ dhesẹ emamọ usi na evaọ edhere nọ u re ro si ahwo urru je te idu rai.
2 Ikpe buobu nọ e vrẹ, evaọ ekuotọ buobu iruo isẹri ise na i wo ohẹriẹ keme, evaọ abọ buobu, ahwo a jẹ rria izuazọ udhedhẹ vi enẹna, a te je wo omofowẹ. Egagọ u kru oria ofuafo evaọ izuazọ rai. A riwi Ebaibol na ghaghae gaga. Evaọ oke oyena isẹri ise enwenọ ẹsikpobi u kugbe ẹsiọ avro kpahe iwuhrẹ. Nẹnẹ, izuazọ ahwo evọ avọ ikpokpoma. A bi se egagọ ẹkoko evaọ erẹwho jọ. Umutho ahwo a wo ẹrọwọ kpahe Ebaibol na. Evaọ eria enana, ewuhrẹ uzuazọ-umurọ o raha ẹrọwọ rai kpahe Ọghẹnẹ no.
3 Ọsẹro ọnyawariẹ jọ o muẹrohọ inọ: “Enẹna, o wọhọ nọ ebẹbẹ gbe eyawọ buobu e rọ izuazọ ahwo te epanọ ma re ro wuhrẹ ai oghẹrẹ nọ a rẹ rọ rria no.” Ọdawẹ ahwo obọnana o whaliẹ omobọ rai, iviuwou rai, gbe awaruọ rai. Enana họ eware nọ a rẹ mae t’ẹme kpahe nọ a te kokohọ. U fo re ma wo oyena họ iroro evaọ iruo isẹri ise mai.
4 Uvie Ọghẹnẹ Ọvo họ Ẹruore Imuẹro kẹ Obaro: Ahwo buobu a fieva họ esuo ohwo-akpọ ziezi hi. A roro nọ ẹruore nọ a te rọ ruẹ akpọ nọ ọ mai woma evaọ etoke uzuazọ rai ọ gbẹ rọ họ. Egagọ erue e sae kẹ ai ẹruore he. Oyejabọ nọ ẹgwọlọ ohwo-akpọ nọ o mae rro họ re o yo emamọ usi kpahe Uvie Ọghẹnẹ. Dhesẹ epanọ ọ te rọ rehọ ifue ebẹbẹ nọ e rẹriẹ ova dhe ahwo-akpọ ze.
5 Ebaibol na Ọvo họ Ehri Ọkpọvio Evaifihọ: Isu nọ i fievahọ ereghẹ ohwo-akpọ gbe eriariẹ-ifofe akpọ a su ogbotu ahwo buobu thọ no nẹnẹ. Ahwo a re riẹ vuhumu hu inọ “ohwo o wo ogaga nọ o ro su oma obọ riẹ hẹ.” (Jer. 10:23) Uwuhrẹ nọ o mai wo aghare nọ a re wuhrẹ họ a rẹ ‘rehọ ẹrorọsuọ rai kpobi kpahe Jihova a gbẹ rehọ eva kpahe ẹriẹ omobọ rai hi.’ (Itẹ 3:5) Nọ oke na u nwene no na, Ebaibol na o ri nwene he. Fikiere, evaọ odibọgba mai ma rẹ riobọhọ Ẹme Ọghẹnẹ ẹsikpobi, wuhrẹ amọfa re a vuhu ẹgba nọ Ọghẹnẹ ọ rẹ rọ kpọ eware riẹ. (2 Ti. 3:16, 17) Re ma ru ẹjiroro ọyena gba, ma re dhesẹ epanọ Ebaibol na o wuzou te kẹ ahwo na ẹkwoma erovie nọ ma re rovie kpohiẹe evaọ ẹmeọta mai, rehiẹe kẹ iyo enọ rai, je dhesẹ ẹgwọlọ re a wuhriẹe je fi areghẹ egbagba riẹ họ iruo.
6 Makọ evaọ enwene etoke inẹnẹ dede, ẹjiroro mai evaọ odibọgba na o gbẹ rọ oghẹrẹ ovo na. Ma re whowho emamọ usi Uvie na, tudu họ ahwo re a fievahọ Ẹme Ọghẹnẹ, je fiobọhọ kẹ amọfa re a ruẹ oware nọ a je wuhrẹ Ebaibol na kugbe omai. Ẹme nọ ma rẹ ta i re kiekpahe ẹgwọlọ ọgbọna ọrọ ahwo nọ ma bi sisẹi kẹ na. Ẹkwoma enẹ oruo, ma vẹ jọ enọ e be ghale emamọ usi na kugbe amọfa ma vẹ ruẹse wo ahwo buobu.—1 Kọr. 9:19, 23.