Whowho Emamọ Usi na Avọ Aruọwha
1 No ikuigbe ze, a riẹ Ileleikristi rọ kẹ aruọwha rai. Ikọ na Pita avọ Jọn yọ obọdẹ iriruo evaọ onana. Dede nọ a gbolo i rai fihọ uwou-odi je guegue ai, ikọ enana avọ aruọwha gbe ababọ ozodhẹ a tẹ ruabọhọ ẹta uzẹme na. (Iruẹru 4:18-20, 23, 31b) Pọl omariẹ ọ rọ aruọwha ruabọhọ odibọgba riẹ evaọ ẹkuotọ ọgaga dede nọ ọ nyaku ukpokpoma buobu.—Iruẹru 20:20; 2 Kọr. 11:23, 28.
2 Fikieme o jẹ rọnọ makọ avọ idabolo ilogbo, ikọ na gbe Ileleikristi efa evaọ ikuigbe kpobi a gbẹ be rọ aruọwha ruabọhọ ewhowho emamọ usi na? Pọl ukọ na ọ k’uyo onọ oyena eva 1 Ahwo Tẹsalonika 2:2, oria nọ ọ jẹ ta nọ: “Ma wo udu eva Ọghẹnẹ mai no ma re ro dhesẹ usiuwoma Ọghẹnẹ kẹ owhai.” Evaọ edhere ọnana, Pita avọ Jọn jegbe ilele efa a sai ro whowho emamọ usi na avọ aruọwha. Nọ a si ai no uwou-odi no, Pita avọ Jọn a te zihe bru ibe ilele rai. Evaọ olẹ a tẹ lẹ Jihova re ọ kẹ ai udu gbe ogaga re ‘a ruabọhọ ẹta ẹme riẹ avọ aruọwha kpobi.’ Ọghẹnẹ ọ tẹ nwani yo olẹ na nọ ‘ẹzi ọfuafo ọ vọ ai kpobi oma, a tẹ jẹ rọ aruọwha ta ẹme Ọghẹnẹ.’—Iruẹru 4:29, 31.
3 Edhesẹ Evaifihọ Jihova: Ikọ na a wo evaifihọ inọ Jihova ọ be thae uke. Eyaa kpobi nọ Jihova ọ yaa ẹkwoma Ẹme riẹ i je rugba. Yọ Jesu Kristi ọ kẹ imuẹro kpahe enọ i re ti rugba. Kọ ma wo oghẹrẹ evaifihọ ọvo ọyena re ma rọ aruọwha whowho emamọ usi na? Dede nọ ma be jẹ evẹravẹrẹ je siwi ahwo nọ e be mọ họ, ghele ma wo imuẹro buobu ọrọ uketha Jihova. Nọ ma tẹ ruẹ orugba eruẹaruẹ Ebaibol, kọ o gbẹ be wọ omai re ma ta emamọ usi Uvie Ọghẹnẹ na avọ aruọwha?
4 Dede o rọ oware nọ a re rẹro riẹ inọ usiuwoma ota aruọwha otiọye na o te nyaku ọwọsuọ. (Jọn 15:20) Ere o jọ kẹ Jesu gbe Ileleikristi ikpe-udhusoi ọsosuọ na. Rekọ onana o whaha e rai hayo dina lẹliẹ ai sienẹ h’emu hu. Evaọ uzẹme, ọwọsuọ itieye na ọ kẹ rai uvẹ viere nọ a rẹ rọ vaha emamọ usi Uvie na. (Iruẹru 4:3, 8-13a) Fiki omarokpotọ Ileleikristi mai kẹ Ẹme Ọghẹnẹ evaọ avro nọ i wuzou, ẹsibuobu a re s’omai re ma dhesẹ ẹjiroro edikihẹ mai. Ma re riwi oke otiọye na wọhọ uvẹ nọ ma re ro whowho emamọ usi na avọ aruọwha. Ẹkwoma ere oruo, yọ ma be raro kele Jesu Kristi gbe ikọ riẹ.
5 Iruo ọkobaro ubroke ọ rẹ kẹ uvẹ ulogbo nọ ma re ro whowho emamọ usi na. Ahwo buobu a ti ru iruo ọkobaro ubroke na evaọ etoke November. Kọ oke ra o te k’owhẹ uvẹ fi obe họ? Ẹkwoma omodawọ nọ who re ru re who w’abọ evaọ iruo ọkobaro ubroke na, ma sai ro dhesẹ oma mai wọhọ Pọl avọ Banabas. Obe Iruẹru 14:3 o ta nọ ‘a rria oke krẹkri, jẹ ta ẹme Jihova ududu.’ Otẹrọnọ ma rẹ sae dẹ oke no iruo efa ze re ma sae daoma raha euwa 60 evaọ odibọgba na evaọ etoke amara ọvo, ababọ avro eghale mai i re ti vihọ.
6 Re ma wo aruọwha evaọ odibọgba na o rẹ mai wo obọfihọ evaọ oke nọ ma te bi fi emagazini họ ada, bi ru ahwo vi ebe, gbe ebe efa ukoko na. I wo ovuẹ nọ o rẹ kẹ uzuazọ nọ i wo ehri no Ẹme Ọghẹnẹ ze. Fikiere wha j’oma sienẹ h’emu hu rekọ hae ta usiuwoma na avọ aruọwha evaọ aruorokele Oriwiruo mai, Jesu, gbe ikọ riẹ.