Ruabọhọ Ewhowho Ẹme Ọghẹnẹ
avọ Aruọwha
1 Wọhọ egbodibo Ileleikristi, ma riẹ nọ orọnikọ ahwo kpobi a ti dede usiuwoma ota mai rehọ họ. (Mat. 10:14) Ghele na, ma rẹ kuvẹ hẹ re isiuru nọ amọfa a dhesẹ hẹ i ru omai siuke kpemu evaọ ewhowho emamọ usi na. (Itẹ 29:25) Eme o re fiobọhọ k’omai ruabọhọ ewhowho ẹme Ọghẹnẹ avọ aruọwha?
2 Pọl ukọ na o wo ovuhumuo kẹ “aghare ologbo ọrọ eriariẹ kpahe Kristi Jesu.” Onana o wọ riẹ tẹme avọ ‘imuẹro’ egaga. (Fil. 3:8; 1 Tẹs. 1:5) Dede nọ ahwo jọ a rri usiuwoma nọ ọ jẹ ta wọhọ nọ u wo ẹgba ha je fioka ha, ọ riẹ nọ “oye họ ogaga usiwo Ọghẹnẹ nọ u te enọ e rọwo.” (Rom 1:16) Fikiere, makọ okenọ ọ rẹriẹ ovao dhe ọwọsuọ, ọ ruabọhọ “jẹ ta ẹme Ọnowo na ududu.”—Iruẹru 14:1-7; 20:18-21, 24.
3 Oria nọ Ẹgba Mai O bi No Ze: Orọnikọ ẹgba obọriẹ Pọl o je ro se isẹri avọ aruọwha ha. Be ta kpahe omariẹ gbe Saelas, Pọl ọ ta nọ: ‘Dede nọ ma make ruẹ uye gaga, a te je ru omai oma vo eva obọ Filipai, . . . ma wo udu eva Ọghẹnẹ mai no ma re ro dhesẹ usiuwoma Ọghẹnẹ kẹ owhai eva evie ẹbẹbẹ na ghele.’ (1 Tẹs. 2:2; Iruẹru 16:12, 37) Ofariẹ, evaọ okenọ ọ jọ uwou odi evaọ obọ Rom, Pọl ọ yare inọ inievo na a lẹ roro iei re Ọghẹnẹ ọ kẹe ẹgba nọ ọ rẹ rọ ruabọhọ ewhowho emamọ usi na “avọ aruọwha wọhọ epanọ u fo nọ ọ rẹ tae.” (Ẹf. 6:18-20, NW ) Ẹkwoma Jihova nọ ọ rọ ẹro so viukpọ omobọ riẹ, Pọl ọ sae ruabọhọ ewhowho ẹme Ọghẹnẹ avọ aruọwha.—2 Kọr. 4:7; Fil. 4:13.
4 Ere ọvona o rrọ nẹnẹ re. Oniọvo-ọmọzae jọ nọ o jọ bẹbẹ kẹ re o dhesẹ oma riẹ wọhọ omọvo Isẹri Jihova eva oria iruo riẹ, re ọ jẹ ta usiuwoma kẹ ibe-iruiruo riẹ, ọ lẹ se Jihova kpahe ẹme na, o te mu usiuwoma họ ẹta. Ibe-oruiruo riẹ jọ ọ kake se usiuwoma nọ oniọvo na ọ gwọlọ ta kẹe, rekọ nọ oniọvo na ọ tẹme fodẹ ẹruore ẹkparomatha na kẹ ọzae na, u te su kpohọ obe-uwuhrẹ Ebaibol. No oke yena vrẹ, oniọvo na ọ rehọ uvẹ kpobi nọ u rovie fihọ ta usiuwoma. Eva oria ofa nọ o je jo ru iruo, o fiobọhọ kẹ ibe-iruiruo riẹ nọ i bu te 34 họ-ame evaọ ikpe 14. Ma rẹ sai wo imuẹro inọ Jihova ọ te bọ omai ga epọvo na ‘re ma ruabọhọ ewhowho ẹme riẹ avọ aruọwha.’—Iruẹru 4:29.