Kọ Whọ be Ta Usiuwoma Avọ Aruọwha?
1 Dede nọ otu ọwọsuọ a mu rai je guegue ae, Pita avọ Jọn a ruabọhọ ewhowho ovuẹ Uvie na avọ aruọwha. (Iruẹru 4:17, 21, 31) Eme u dhesẹ k’omai nẹnẹ re a ta usiuwoma na avọ aruọwha?
2 Isẹri-Ise Avọ Aruọwha: Ẹme ọfa nọ ọ wọhọ “aruọwha” họ “ẹruọga,” onọ u dhesẹ ewo “ababọ-ozodhẹ, udu, gbe ithihakọ.” Rọkẹ Ileleikristi uzẹme, usiuwoma ota avọ aruọwha u dhesẹ ẹme nọ a rẹ ta ababọ ozọ evaọ oke kpobi nọ uvẹ nọ u fo o tẹ roma via re a ghale emamọ usi na kugbe amọfa. (Iruẹru 4:20; 1 Pita 3:15) U dhesẹ nọ oma emamọ usi na o rẹ vuọ omai hi. (Ol. 119:46; Rom 1:16; 2 Tim. 1:8) Fikiere, aruọwha yọ okwakwa nọ a gwọlọ re ma ru uwou nọ a vi omai orọ ewhowho emamọ usi Uvie na gba evaọ oke urere nana. O rẹ w’omai re ma ghale emamọ usi na kugbe ahwo evaọ oria kpobi nọ a re jo duku ae.—Iruẹru 4:29; 1 Kọr. 9:23.
3 Aruọwha eva Isukulu: Kọ ozodhẹ hayo omovuọ u re ru ei bẹbẹ k’owhẹ re whọ ta usiuwoma na kẹ ibe isukulu ra? Eva ẹsejọ o rẹ lọhọ họ; evaọ uzẹme, o rẹ sae jọ use-abọ ulogbo. Ghele na, Jihova ọ te k’owhẹ ẹgba otẹrọnọ whọ lẹ kẹ aruọwha re whọ ta usiuwoma na kẹ amọfa. (Ol. 138:3) Aruọwha o ti fiobọhọ k’owhẹ dhesẹ oma ra wọhọ omọvo Isẹri Jihova je thihakọ ẹkoko. Fikiere, usiuwoma ota ra eva isukulu o sai siwi enọ e gaviezọ kẹ owhẹ.—1 Tim. 4:16.
4 Aruọwha eva Oria Iruo: Kọ a riẹ owhẹ wọhọ omọvo Isẹri Jihova eva oria iruo ra? Ẹsejọhọ edhere ọvuọvo nọ a sae rọ rehọ emamọ usi na nyate ibe iruiruo ra oma họ ẹkwoma usiuwoma nọ whọ rẹ ta kẹ ae. Aruọwha ra o ti je fiobọhọ k’owhẹ re whọ sai mi uvẹ no iruo ra rọkẹ iwuhrẹ Ileleikristi gbe ikokohọ.
5 Aruọwha eva Otọ Ẹdawọ: Ewo aruọwha o wuzou eva okenọ ma tẹ rẹriẹ aro ku ọwọsuọ. (1 Tẹs. 2:1, 2) U re fiobọhọ k’omai kru ẹrọwọ mai ga eva okenọ ma tẹ r’otọ eguegue, ẹkoko, hayo ukpokpoma dede. (Fil. 1:27, 28) O rẹ thomai oma vẹrẹ re ma dikihẹ ga eva otọ otunyẹ re ma fi ẹmeoyo mai kẹ itee Ọghẹnẹ mai, Jihova, họ otọ. O rẹ k’omai ẹgba yọrọ udhedhẹ mai evaọ okenọ amọfa a tẹ gwọlọ ẹwhọ.—Rom 12:18.
6 Makọ ebẹbẹ nọ ma rẹriẹ ovao ku kpobi, joma thihakọ evaọ ewhowho emamọ usi na avọ aruọwha.—Ẹf. 6:18-20.