Kọ Ono Ọ Te Gaviezọ kẹ Ovuẹ Mai?
1 Rro vi epaọ anwẹdẹ evaọ ikuigbe ohwo-akpọ, evuẹ i bi tuye bru ahwo ze, ibuobu rai i fioka ha yọ i re tube su ahwo thọ dede. Fiki oyena, oma u re mu ahwo buobu, yọ o rẹ jọ use-abọ k’omai re ma ru ai gaviezọ kẹ ovuẹ kpahe Uvie Ọghẹnẹ. A wo ovuhumuo kpahe ewoma nọ ezọgaziẹ kẹ Ẹme Ọghẹnẹ ọ rẹ wha te ai hi.—Luk 11:28.
2 Eva e were omai inọ evaọ abọ akpọ na buobu, ahwo idu buobu a be gaviezọ kẹ ovuẹ oyena yọ a be jẹ ebe iwuhrẹ Ebaibol nọ ma be kẹ ae rehọ. Ghele, evaọ ekwotọ efa ezọgaviẹ na o rro te erei hi. Izihebro buobu nọ ma re ru evaọ odibọgba na e kare emamọ iyẹrẹ, yọ ma rẹ sae ruawa kpahe ohwo nọ ọ te gaviezọ kẹ ovuẹ mai.
3 Ma rẹ yọrọ oma mai kpahe oyẹlẹ hrọ. Pọl o dhesẹ nọ: “ ‘Kohwo kohwo nọ ọ be fa odẹ [Jihova] a re ti siwi ei.’ Rekọ kẹvẹ ahwo a re ti ro se odẹ ohwo nọ . . . a ti yo usi riẹ hẹ? Ẹvẹ a re ro yo ababọ ọtusiuwoma? . . . Wọhọ epanọ a kere nọ: ‘Kinọ eru awọ ahwo nọ a be ta usiuwoma!’ ” (Rom 10:13-15) Otẹrọnọ ma rehọ oma totọ kọ ubi Uvie, Ọghẹnẹ o re ru ei rro evaọ udu ahwo oruọzewọ.—1 Kor. 3:6.
4 Usiavẹ na Họ Eruo Ozihebro Kẹse Kẹse: Evaọ ekwotọ nọ e wọhọ nọ umutho ahwo ọvo a be gaviezọ kẹ ovuẹ mai, o gwọlọ nọ ma roma totọ bọ isiuru kpobi nọ ma duku, o tẹ make rọ nọ ma fi obe họ ada hayo ma fihọ họ. Fikieme ma jẹ nwane kaki ku ei họ nọ oware ovo u ti noi ze he? Okenọ ma tẹ kọ ubi, ma rẹ riẹ oria nọ u ti je woma ha. (Otausi. 11:6) Otẹrọnọ ma ruẹrẹ oma kpahe ziezi re ma t’ẹme no Ikereakere na ze nọ ma te zihe, o tẹ make rọ kpẹkpẹe, ma rẹ sae nyate udu ohwo na. Ma rẹ sae nyase omobe-ovẹvẹ ba hayo fi emagazini ọkpokpọ họ ada. Ukuhọriẹ, ma rẹ sae dhesẹ uwuhrẹ Ebaibol. O rẹ sai gbe omai unu avọ evawere nọ ma tẹ ruẹ epanọ Jihova ọ te ghale omodawọ mai bu te.—Ol. 126:5, 6.
5 A nyase omobe-ovẹvẹ ba kẹ aye jọ nọ o dhesẹ isiuru. A gbe diei họ uwou viere he bẹsenọ emerae ivẹ e rọ vrẹ no, yọ o wo uvẹ nọ a rẹ rọ t’ẹme kugbei hi. A tẹ wariẹ nyase omobe-ovẹvẹ ovona ba kẹe. Dede nọ owhowho-uvie na ọ daoma gaga re o diei họ uwou, o rehọ emera esa efa re ọ tẹ te rue riẹ, ọ tẹ te ruẹ nọ ọ jẹ mọ. Oniọvo ọmọtẹ na ọ tẹ wariẹ zihe evaọ oka nọ o kẹle riẹ, a tẹ t’ẹme kpẹkpẹe kpahe omobe-ovẹvẹ na. Okenọ oniọvo ọmọtẹ na o zihe evaọ oka nọ u lele i riei, aye na o te dhesẹ obọdẹ isiuru kpahe ovuẹ Uvie na. Enwene evaọ eyero uzuazọ riẹ u te ru ei vuhu ẹgwọlọ ẹzi riẹ mu. A te mu uwuhrẹ Ebaibol họ, yọ no oke oyena vrẹ o te je wuhrẹ k’oka k’oka avọ ajọwha.
6 Wọhọ oware kpobi nọ ma gwọlọ ruẹ nọ o rro, te idodo, ẹbe, hayo isiuru kpahe ovuẹ Uvie na, o gwọlọ ẹruorote. Oyena o rẹ rehọ oke, ẹgba, uruemu ẹruorote, gbe ọtamuo re ma se erri ba esehọ. Evaọ ukpe n’ukpo, ahwo nọ i bu vi abasa ima-odu nọ ubi Uvie na o jọ oma rai t’owọ muotọ no eye e họ-ame! Otẹrọnọ ma be gbẹ hẹ ta usiuwoma na, ma ti wo imuẹro nọ ma ti duku amọfa buobu nọ e te gaviezọ kẹ ovuẹ mai.—Wawo Ahwo Galesha 6:9.