Ẹrọkẹ Oma Mai Avọ Unevaze
1 Devidi ọnọ ọ so ilezi na ọ ruẹaro nọ ahwo Jihova a ‘te rehọ omobọ rai kẹ nevaze,’ koyehọ, wọhọ “enọ e rẹ fialoma via evaọ ẹruoke.” (Ol. 110:3) Onana u bi ghine rugba evaọ udevie usu inievo akpọ-soso mai na. Evaọ etoke ukpe ọvuọvo ọrọ ikpe iruo ene nọ e vrẹ na, ahwo Jihova a raha euwa nọ i bu vi ima-odu no evaọ ẹvaha emamọ usi Uvie na. Fiba iruo ewhowho gbe aru-ilele na, idhere buobu efa e riẹ nọ ma sae rọ rehọ omobọ mai kẹ ro fiobọhọ kẹ amọfa.
2 Idhere nọ Ma Sae ro Dhesẹ Unevaze Mai: Ejọ evaọ ukoko na a sae gwọlọ obufihọ re a kpohọ iwuhrẹ na. Keme whọ gbẹ fialoma via re whọ rehọ ae lele oma ha? O sae jọ nọ amọfa a be mọ, ababọ ẹgba, hayo a fi rai họ ẹsipito. Kọ whọ sae rehọ udu-obọra weze bru rai hayo fiobọhọ kẹ ae evaọ edhere jọ? Omọvo hayo uviuwou jọ ọ sae jariẹ nọ ọ gwọlọ uduotahawọ. Kọ who roro kpahe epanọ who re ro zizie ahwo otiọye re a kuomagbe uwuhrẹ uviuwou ra evaọ otiẹsejọ no? Ọkobaro hayo owhowho-uvie ọ sae gwọlọ ibe-oruiruo evaọ odibọgba na. Fikieme jabọ whọ gbẹ fialoma via re wha nya kugbe evaọ iruo na ha? Enana họ idhere jọ nọ ma sae rọ rehọ unevaze ru iruo ezi kẹ otu nọ erọ ẹgba orọwọ na.—Gal. 6:10.
3 Inievo emezae a rẹ sae dhesẹ unevaze rai re a rehọ ae ruiruo evaọ ukoko Jihova ẹkwoma omodawọ re a nyate ute ekpako gbe idibo iruiruo. (1 Tim. 3:2-10, 12, 13; Taitọs 1:5-9) Nọ unu ahwo mai u bi bu haro na, ẹgwọlọ inievo unevaze nọ i te re a kobaro evaọ ewhowho gbe ewuhrẹ gbe ẹruọsa ikoko na ọ riẹ.—1 Tim. 3:1.
4 Ẹsejọhọ ejọ mai a sae fialoma via kẹ iruo Jihova evaọ abọ ologbo ẹkwoma obe fihọ wọhọ ekobaro ubroke noke ruoke. Ofariẹ, avọ umutho enwene nọ u w’iroro evaọ oma iruo mai, ma sae ru erei kẹse kẹse hayo tubẹ rehọ iruo ọkobaro oke kpobi. Kọ eyero mai o rọ epanọ ma sae rọ kwa kpohọ oria nọ ẹgwọlọ obufihọ o mae jọ rro? Kọ ma sae fialoma via re ma sae ruiruo evaọ Ebẹtẹle re ma rehọ erei zọhọ fihọ ẹnyaharo iruo akpọ-soso na? A bi ruiruo buobu evaọ ebabọ Egwa Uvie, Ogege Okokohọ, gbe iwou ogha evaọ akpọ na soso, eria nọ a jọ gwọlọ iruiruo unevaze gaga. Ma wo ovuhumuo gaga kpahe ahwo nọ a rehọ oma rai kẹ iruo ezi enana, yọ a wo efe eghale buobu no!—Luk 6:38.
5 Enana họ oke urirẹ na. Jihova, ẹkwoma ẹzi riẹ, ọ be rehọ ẹkwoma ahwo unevaze riẹ ru iruo igbunu evaọ otọakpọ! Oke kpobi nọ Jihova, ẹkwoma ukoko riẹ, ọ tẹ kẹ uzizie re ma w’abọ evaọ iruo Uvie nọ u bi vihọ na, u fo re ma nọ omobọ mai nọ, ‘Kọ mẹ gbẹ be rehọ omobọ mẹ kẹ avọ unevaze?’ Kẹsena ma vẹ rehọ oma olẹ kiẹ udu gbe eyero mai. Omarọkẹ Ọghẹnẹ mai o te wọ omai re ma ru utho ẹgba mai kpobi evaọ iruo efuafo na, ma vẹ rehọ erei ru udu Jihova ghọghọ gaga!—Zef. 3:17.