Iruo Ọkobaro—Edhere Areghẹ nọ Ma rẹ rọ Rehọ Oke Mai Ruiruo!

¹ ‘Iruo i bu omẹ abọ hrọ no! Kọ o te ghinẹ jọ oware areghẹ k’omẹ re me muọ iruo ọkobaro họ enẹna?’ Ere oniọvo-ọmọtẹ jọ o roro evaọ okenọ ọ jẹ k’ezọ kẹ ọkpako-ọkobaro jọ nọ ọ jẹ t’ẹme ọ abọ okokohọ jọ nọ o ta nọ “Tunye Haro Evaọ Odibọgba Ọkobaro Na.” Uzoge oniọvo-ọmọzae jọ nọ ọ jọ ogbotu na re o te roro nọ: ‘Ẹvẹ o ro ru uvẹ kẹ iruo ọkobaro? Mẹ yọ ọkpako ho, rekiyọ iruo e da uzuazọ mẹ fia no!’

² Nọ ọkpako na o bi dhesẹ eghale ọ iruo ọkobaro haro na, ọ tẹ kiẹ ekobaro buobu riwi nọ i no okogho na ze enọ e ta kpahe inwene nọ a ru no re a ruẹsi ruiruo ọkobaro gbe epanọ Jihova ọ rọ ghale omodawọ rai gaga. Ọjọ ọ ko, ọjọ o wo ọrivẹ-orọo nọ o kurẹriẹ hẹ, yọ ọjọ o tube siobọno ute okọ akpọ nọ o je le rekiyọ ọ be sae ruẹ ugho ko unu riẹ. Nọ a yo epanọ ekobaro enana i bi ro fikparobọ ẹkwoma obufihọ Jihova, oniọvo-ọmọzae gbe ọrọ ọmọtẹ nọ e jọ ogbotu na a tẹ wariẹ kiẹ iroro gbe iyero rai riwi. Ma zizie owhẹ re who ru ere re, maero nọ ute euwa nọ a sikpotọ kẹ ekobaro na o kawo te umuo ẹgba ọ iwhowho-uvie emamọ usi efa buobu na.

³ Ma riẹ nọ Jihova họ Ọnọma gbe Osu Okpehru ọ Ehrugbakpọ na gbe nnọ izuazọ mai e rrọ obọ riẹ. (Dan. 4:17; Iruẹru 17:28) U re vevẹ k’omai inọ ukoko ọvuọvo Jihova o bi ro ruiruo. O rrọ uvẹ-ọghọ k’omai nọ ma be rọ jariẹ gọ avọ omarokpotọ, be tha ‘ọrigbo ẹrọwọ avọ areghẹ’ na uke evaọ isẹri-ise Uvie na taure urere na o tẹ te ze. (Mat. 24:45; 25:40; 1 Pita 2:9) Nọ ma rria rueva ọ “edẹ urere” na didi no na, ma vuhumu nnọ oke nọ a rẹ rọ vuẹ ovuẹ na u bi re no. (2 Tim. 3:1) Bọo oke oye, o gwọlọ nọ ma rẹ tha iviuwou mai uke evaọ abọ-iwo. (1 Tim. 5:8) Unuigho nọ ohwo o bi wo u gbe bi te ko uviuwou na te epanọ o jọ vẹre he. Utiẹsejọ oma mai o gbẹ ga te epanọ o jọ vẹre he. Yọ evaọ uzẹme, ma gwọlọ umutho oke gbe ekwakwa jọ nọ ma rẹ raha k’omobọ mai. (Ọtausi. 3:12, 13) Fikiere o sai gbomai unu sọ ezọgaviẹ kẹ uzizie iruo ọkobaro o ghinẹ rọ oware areghẹ.

⁴ O rrọ owha mai omomọvo re ma roma totọ kiẹ iyero mai riwi jẹ j’iroro sọ ma sai ru iruo ọkobaro na. (Rom 14:12; Gal. 6:5) O rrọ uduotahawọ re a muẹrohọ eviharo unu ahwo nọ a k’uyo kẹ use iruo ọkobaro na no. Ghelọ ọyawọ gbe ebẹbẹ ọ edẹ urere nana, iyẹrẹ iruo nọ a nẹ evaọ 1999 Yearbook u dhesẹ nọ enwenọ 700,000 erọ ahwo Jihova evaọ akpọ-soso a bi tunye haro evaọ odibọgba ọkobaro na. Makinọ a be gọ evaọ otọ iyero egaga ugho, ababọ ofa, eyao, hayo a be rẹriẹ ovao dhe ebẹbẹ gbe ẹgaga efa, oma o be rrọ inievo enana evaọ oware uwoma uruo ho, yọ onana u fo ujiro. (Gal. 6:9) A jẹ ayare Jihova rehọ re a dawo iẹ rri. (Mal. 3:10) A rehọ e riẹ nọ iruo ọkobaro yọ edhere areghẹ nọ a rẹ rọ rehọ oke gbe ekwakwa rai ruiruo gbe nnọ Jihova ọ ghinẹ ghale ai no fikinọ a ru inwene nọ i fo re a rueva jẹ daji iruo ọkobaro na.

⁵ A Be Ghale Ekobaro: Oniọvo-ọmọtẹ obọ Cameroon jọ nọ o wo ọmọtẹ nọ ọ maha gaga ọ ta nọ: “No anwọ oke eyẹ riẹ ze, ọmọtẹ mẹ ọ be hai lele omẹ evaọ odibọgba na. Taure o te tube wuhrẹ onya dede, mẹ jẹ hae rehọ ohọ so iẹe h’uke. Evaọ ohiohiẹ ẹdẹjọ nọ mẹ jọ usiuwoma, mẹ tẹ wẹriẹ umuwou eki jọ evaọ akotọ-edhere. Ọmọ mẹ o te no abotọ mẹ, avọ emagazini buobu nọ ọ tọlọ evaọ ẹkpa mẹ. Ọ tẹ dẹdẹ kpohọ uwou-eki nọ o kẹle etẹe. Dede nọ ọ sae t’ẹme ziezi hi, o se aye jọ ọ tẹ rehọ emagazini kẹe. U te gbe aye na unu nọ ọ ruẹ ọmọboba otiọye na nọ o bi w’obọ evaọ iruo nana. Ọ tẹ nwane rehọ emagazini na jẹ rọwo obe uwuhrẹ Ebaibol!”

⁶ Evaọ uyo kẹ use ọ iruo ekobaro ubroke efa na, ọkpako ukoko jọ nọ ọ rrọ ọsẹ uwou evaọ obọ Zambia nọ iruo riẹ e rẹ rehọ okpẹdoke soso ọ j’iroro nọ o re ru ọkobaro ubroke dede nọ uvẹ riẹ o rrọ kakao. Ọ gwọlọ jọ oriruo kẹ ukoko na gbe uviuwou riẹ. Evaọ ẹsejọ, ọ rẹ dhẹ omoto riẹ fihọ akotọ edhere o ve muọ ekasẹte ọ Edidi Evawere Uviuwou na họ ekporo je zizie ahwo nọ a be nya edhere vrẹ re a te gaviezọ kẹ eme nọ a bi se do via na. Edhere ọyena, ọ tẹ sai fi ebe 16 erọ Evawere Uviuwou gbe 13 erọ Eriariẹ na họ ada, o te no ere muọ iwuhrẹ Ebaibol ivẹ họ.

⁷ A muẹrohọ emamọ ẹzi ọ iruo ọkobaro evaọ orẹwho ekẹloma ọ Zimbabwe. Evaọ April 1998, ukoko jọ nọ u wo iwhowho-uvie 117 o n’iyẹrẹ ọ ekobaro ubroke 70 gbe ekobaro oke-kpobi 9. Ukoko ofa jọ nọ u wo iwhowho-uvie 94 u wo ekobaro ubroke 58 nọ e n’iyẹrẹ. Ọfa jọ nọ o wo iwhowho-uvie 126, o n’iyẹrẹ nọ ahwo 58 a lele ekobaro oke-kpobi 4 nọ a wo ruiruo ọkobaro ubroke. Ukpe iruo n’ukpo o jọ orọ obọdẹ evaọ Zimbabwe. Dedenọ iruo uviuwou, iruo ukoko, gbe ebabọ uwou-ogha e vọ inievo obei abọ, a tẹro vi oke rai nọ a rẹ raha avọ areghẹ evaọ odibọgba na.

⁸ Ekobaro a vuhumu nnọ orọnikọ ẹgba obọrai a re ro muọ iruo ọkobaro họ jẹ yọrọ iẹ hẹ. Ae họ ahwo ọsosuọ nọ a rẹ kake ta nọ oware kpobi nọ a sai ru o lọhọ fiki “ogaga nọ Ọghẹnẹ [ọ] kẹ” rae. (1 Pita 4:11) Ẹrọwọ rai ọ be lẹliẹ ai ru odibọgba rai haro n’ẹdẹ t’ẹdẹ. Ukpenọ a gwọlọ ewoma gbe omosasọ obọrai, ekobaro nọ e be kparobọ a vuhumu nnọ re a tunye haro, o rẹ sae gwọlọ ‘omahrou ogaga eva udevie ẹbẹbẹ,’ rekọ fiki oyena a re wo eghale buobu.—1 Tẹs. 2:2.

⁹ Oriruo Pọl O fo Aruorokele: Ebaibol na ọ n’iyẹrẹ obokparọ Pọl ukọ na evaọ odibọgba na gbe obọdẹ obufihọ nọ ọ kẹ ahwo buobu. Ghele na, otẹrọnọ ohwo jọ ọ rrọ nọ iruo i bu abọ hrọ, kiyọ Pọl. O thihakọ ukpokpoma gbe ẹgaga re ọ ruẹse vuẹ emamọ usi na jẹ bọ ikoko na ga. O te je thihakọ ẹbẹbẹ ẹyao ọgaga. (2 Kọr. 11:21-29; 12:7-10) Ọ gba riẹ mu re ọ raha oke riẹ avọ areghẹ. O vuhumu nọ o ruiruo riẹ kpobi ẹkwoma obufihọ Jihova. (Fil. 4:13) Uvumọ ohwo ọ rrọ họ evaọ usu enọ Pọl o fiobọhọ kẹ na nọ o re ku ei họ nọ oke gbe omodawọ riẹ evaọ iruo Jihova ivrẹvru hayo inọ ọ hae rehọ oke riẹ ruiruo woma viere. Whaọ, ma gbe bi wo erere no oke nọ Pọl o ro ruiruo avọ areghẹ ze nẹnẹ! Ẹvẹ ma wo ovuhumuo te kẹ uthubro riẹ nọ u re fiobọhọ k’omai kiẹ eware nọ e mae rrọ omai oja via jẹ dadamu uzẹme na evaọ etoke ọbẹbẹ nana!

¹⁰ Enẹna vi epaọ anwẹdẹ kpobi, ‘oke nọ u kiọkọ nọ a rẹ rọ vuẹ emamọ usi na o rẹ kpẹkpẹe.’ (1 Kọr. 7:29; Mat. 24:14) Fikiere, u fo re ma nọ oma mai nọ, ‘Otẹrọnọ uzuazọ mẹ u re serihọ idudhe odẹ n’ọtha, kọ mẹ sae ta kẹ Jihova nẹnẹ na inọ mẹ rehọ oke mẹ ruiruo avọ areghẹ?’ (Jem. 4:14) Kọ eme whọ gbẹ t’ẹme kẹ Jihova evaọ olẹ enẹna ha, re whọ kẹe imuẹro nọ whọ gwọlọ rehọ oke ra ruiruo avọ areghẹ wọhọ omọvo Isẹri riẹ? (Ol. 90:12) Lẹ kẹ obufihọ Jihova re u ru uzuazọ ra lọhọ. Dede nọ ẹsejọhọ who ku rie họ no inọ whọ sai ru ei hi, kọ o sae jọ nọ enẹna whọ ruẹ no inọ iruo ọkobaro e sai kiehọ uzuazọ ra?

¹¹ Rehọ Iyero Ra Ruiruo Vọvọ: O rrọ vevẹ inọ, fiki iyero jọ, orọnikọ ahwo kpobi nọ a gwọlọ a rẹ sae m’oma ọ euwa 70 evaọ amara re a ruiruo wọhọ ọkobaro oke-kpobi hi. Dede na, iwhowho-uvie buobu a rẹ m’omaa re a raha euwa 50 evaọ amara evaọ odibọgba na wọhọ ọkobaro ubroke n’oke ruoke wọhọ epanọ o lọhọ te hayo ababọ eriosehọ. Otẹrọnọ iyero ra e rrọ enọ e rẹ j’owhẹ ruiruo ọkobaro ubroke hayo ọrọ oke-kpobi enẹna ha, kru udu ga. Gbẹ hae lẹ re iyero ra i nwene. Bọo oke oyena, otẹrọnọ o lọhọ re inwene e roma via ha, wo omosasọ ẹkwoma eriariẹ na inọ utho nọ whọ sai ru no ẹwẹ-kpobi ze evaọ iruo Jihova o be were iẹe. (Mat. 13:23) O bi muẹrohọ inọ who dikihẹ abọ riẹ whawha gbe nnọ whọ be ya gaga re whọ jọ owhowho-uvie ẹrọwọ nọ ọ be k’uvẹ re amara soso ọ vrẹ hẹ ababọ uvẹ isẹri-ise. Utiẹsejọ whọ sae nyaharo ẹkwoma ona ọ isẹri-ise ra nọ who re ru woma viere, daoma re whọ jọ ọgba ọtausiuwoma gbe owuhrẹ ọ emamọ usi na.—1 Tim. 4:16.

¹² Nọ “ẹdẹ ologbo avọ idudu ỌNOWO na” ọ kẹle gaga no na, o gwọlọ re ma rehọ oke nọ u kiọkọ na ruiruo avọ areghẹ re ma sai ruiruo nọ a mu h’omai obọ na kuhọ. (Joẹl 2:31) Setan ọ riẹ nnọ oke riẹ o rẹ kpẹkpẹe, yọ vi epaọ anwẹdẹ, ọ be dao ẹgba riẹ kpobi re o ru izuazọ mai kpakre kpakre je ru ei bẹbẹ k’omai re ma tẹro vi eware nọ e ghinẹ r’oja. (Fil. 1:10; Evia. 12:12) Who rri isiuru nọ Ọghẹnẹ o wo k’owhẹ vo ho. Jihova ọ rẹ sai fiobọhọ k’owhẹ ru uzuazọ ra lọhọ re who ru utho ẹgba ra evaọ odibọgba na. (Ol. 145:16) Avọ evawere, evaọ ẹkiẹriwi iyero rai, ahwo buobu a be ruẹ nnọ a rẹ sai kuomagbe utu ọ ekobaro obufihọ hayo erọ oke-kpobi na. Uzẹme, ekobaro e be ghinẹ ruẹ evevọwẹ evaọ oke rai nọ a bi ro ruiruo avọ areghẹ. Kọ whọ te jọ omọvo rai jọ?