Idhere nọ Who re ro Ru Odibọgba Ra Kẹre

NỌ OKE u te nọ Jesu o re ro vi ilele riẹ re a nyai whowho Uvie na, ọ ta kẹ ae nọ: “Ivuẹvu na e rrọ ruaro, rekọ iruiruo na e rrọ kakao.” Iruo nọ e jọ otọ e jọ buobu, fikiere o te fibae nọ: “Wha lẹ Olori ivuẹvu na re o vi iruiruo ziọ ivuẹvu riẹ.” (Mat. 9:37, 38) Jesu ọ vuẹ ilele na oghẹrẹ nọ a re ro ru iruo odibọgba rai. Eme nọ ọ ta i dhesẹ nọ a re ru iruo na kpata kpata, ọ ta nọ: “Wha te sae ta usi uwoma na nya okogho ikpewho Izrẹl kpobi duwu vievie he bẹsenọ Ọmọ ohwo ọ te nyaze.”​—Mat. 10:23.

² Nẹnẹ re, iruo buobu e riẹ nọ ma re ru evaọ iruo usi uwoma ota na. Oke u bi re no, yọ o gba omai họ nọ ma rẹ ta usi uwoma Uvie na taure urere na o tẹ te ze. (Mak 13:10) Nọ orọnọ udhu na họ akpọ na, ma rẹriẹ ovao ku uyero nọ o wọhọ orọ Jesu avọ ilele riẹ, rekọ omai o mae rro. Ma bu hu nọ a tẹ rehọ omai wawo ahwo ima-idu nọ e rrọ akpọ na, rekọ u mu omai ẹro nọ Jihova o bi fiobọhọ kẹ omai. A ti whowho usi uwoma Uvie na evaọ akpọ na soso, yọ urere na o te ze evaọ oke nọ Jihova o fihọ. Kọ ma be rọ Uvie Ọghẹnẹ karo evaọ uzuazọ mai re ma ruẹsi ru iruo odibọgba mai gba ziezi? Itee vẹ ma rẹ sai le evaọ ukoko na re ma ruẹsi ru ere?

³ Nọ Jesu ọ jẹ ta oware nọ Jihova ọ gwọlọ mi idibo riẹ nọ e roma mudhe no, ọ ta nọ: “Whọ rẹ rehọ udu ra kpobi gbe uzuazọ ra kpobi gbe iroro ra kpobi gbe ẹgba ra kpobi ro you Jihova Ọghẹnẹ ra hrọ.” (Mak 12:30) O gwọlọ nọ ma rẹ rehọ uzuazọ mai kpobi ru iruo nọ ma bi ru kẹ Ọghẹnẹ. Koyehọ ma rẹ rehọ ẹgba mai kpobi ru iruo Jihova ro dhesẹ epanọ ma you rie te gbe inọ omauromudhe mai u gine no omai eva ze. (2 Tim. 2:15) Uvẹ sa-sa u rovie fihọ kẹ omai omomọvo, wọhọ epanọ uyero gbe ẹgba mai e sae kẹ omai uvẹ ru te. Joma ta kpahe uvẹ sa-sa jọ nọ e riẹ, re whọ jiroro itee nọ who ti le evaọ ukoko na nọ i re fiobọhọ kẹ owhẹ ru iruo odibọgba ra gba.

OWHOWHO-UVIE UKOKO

⁴ Ahwo kpobi nọ a jẹ uzẹme na rehọ a wo uvẹ-ọghọ nọ a re ro whowho usi uwoma na. Onana họ ugogo iruo nọ Jesu ọ kẹ ilele riẹ nọ a ru. (Mat. 24:14; 28:19, 20) Wọhọ epanọ o rẹ mae jọ, nọ olele Jesu Kristi ọ tẹ nwani yo usi uwoma na no, o re mu ei họ ẹta kẹ amọfa. Ere Andru, Filip, Kọniliọs gbe amọfa a ru. (Jọn 1:40, 41, 43-45; Iruẹru 10:1, 2, 24; 16:14, 15, 25-34) Kọ onana u dhesẹ nọ ohwo ọ sae ta usi uwoma na kẹ amọfa taure ọ tẹ te họ-ame dede? Ee! Nọ ohwo ọ tẹ nwani te owhowho-uvie nọ ọ re họ-ame he no evaọ ukoko na, yọ uvẹ nọ ọ rẹ rọ ta usi uwoma no uwou ruọ uwou u rovie kẹe no. Ofariẹ, ọ sai wobọ evaọ abọ efa iruo usi uwoma ota na wọhọ epanọ ẹgba gbe uyero riẹ o rrọ.

⁵ Nọ owhowho-uvie ọ tẹ họ-ame no, o rẹ jariẹ oja inọ ọ rẹ dawo ẹgba riẹ kpobi re o fiobọhọ kẹ amọfa yo usi uwoma na. Te ezae te eyae e rẹ sai wobọ evaọ iruo usi uwoma ota na. Oghale o rrọ nọ o tẹ make rọnọ amabọ gheghe ma bi wo evaọ ẹwhaharo iruo Uvie Ọghẹnẹ. Ohwo kpobi nọ ọ daoma re o wobọ evaọ idhere efa nọ ma bi ro ru iruo Uvie na o ti gine wo evawere.

ORIA NỌ ẸGWỌLỌ Ọ MAE RRỌ

⁶ O sae jọ nọ a be jọ ẹkwotọ ukoko ra ta usi uwoma ziezi kẹse kẹse. O tẹ rrọ ere, whọ sae jiroro nọ who re ru odibọgba ra kẹre ẹkwoma ẹkwa kpohọ oria nọ ẹgwọlọ ọ mae rrọ. (Iruẹru 16:9) Whọ tẹ rrọ ọkpako hayo odibo oruiruo, ukoko ofa jọ o sae jariẹ nọ eva e te were nọ whọ tẹ nyai fiobọhọ kẹ ae. Ọsẹro okogho ra ọ sae ta eware jọ kẹ owhẹ kpahe oghẹrẹ nọ whọ sai ro fiobọhọ kẹ ukoko ofa evaọ okogho na. Whọ tẹ gwọlọ kwa kpohọ oria ofa evaọ orẹwho ra fiki iruo Uvie na, uwou ogha o sae vuẹ owhẹ eware nọ i re fiobọhọ.

⁷ Kọ whọ gwọlọ nọ who re kpohọ orẹwho ofa fiki iruo Uvie na? O tẹ rrọ ere, o gwọlọ nọ whọ rẹ romatotọ roro kpahe iẹe. Kọ whọ gbẹ ta ẹme na kugbe ekpako ukoko ra? Ababọ avro, ẹkwa otiọye u ti kpomahọ owhẹ gbe ohwo kpobi nọ o lele owhẹ. (Luk 14:28) Otẹrọnọ o rrọ owhẹ iroro nọ whọ te rria oria na kri hi, o te mai woma re who roro kpahe ẹkwa kpohọ ẹwho jọ evaọ orẹwho ra.

⁸ Evaọ erẹwho jọ, inievo nọ a be rọ rẹrote eware evaọ ukoko a ri kri tere evaọ ukoko na ha. Nọ ekpako nọ i kri ukoko na no a tẹ kwa kpohọ oria utioye, o rẹ were inievo oria yena nọ i wo omaurokpotọ re a kẹ ekpako nọ e kwa ze na uvẹ kobaro evaọ ẹruorote iruẹru ukoko na. Whọ tẹ rrọ ọkpako nọ ọ be jiroro nọ ọ rẹ kwa kpohọ orẹwho otiọye na, woi họ iroro nọ orọnikọ whọ be nyae rehọ iruo inievo nọ e rrọ obei hi. Ukpoye, who re lele ai ru iruo. Tuduhọ ae awọ re a daoma te kẹ iruo, re a jẹ jẹ ewha-iruo ukoko rehọ. (1 Tim. 3:1) Wo odiri otẹrọnọ a bi ru eware jọ wo ohẹriẹ no epanọ a re ru ai evaọ obọ orẹwho ra. Rehọ eriariẹ ọkpako nọ whọ rrọ na ro fiobọhọ kẹ inievo na ziezi. Uwhremu na nọ o tẹ gwọlọ nọ who re zihe kpohọ orẹwho ra, ekpako nọ e rrọ ẹwho yena a vẹ te sae rẹrote ukoko na.

⁹ Taure uwou ogha o tẹ te kẹ owhẹ edẹ ikoko nọ whọ rẹ sae nyai fiobọhọ kẹ, Ogbẹgwae Iruo Ukoko ra u re kere ileta ro dhesẹ owhẹ. O gwọlọ nọ a re kere ileta nana o tẹ make rọnọ whẹ yọ ọkpako, odibo oruiruo, ọkobaro, hayo owhowho-uvie. Ogbẹgwae iruo na u ti vi ileta nọ a bi ro dhesẹ owhẹ na kugbe ileta nọ whọ be rọ nọ kpahe eria nọ ẹgwọlọ ọ rrọ na se uwou ogha orẹwho nọ whọ gwọlọ kpohọ na.

USI UWOMA OTA EVAỌ ẸVẸRẸ ỌFA

¹⁰ Re whọ ruẹsi ru odibọgba ra kẹre, whọ sae jiroro nọ who bi wuhrẹ ẹvẹrẹ ọfa, o sae jọ ẹvẹrẹ obọ rọ t’ẹme. Who te wo utee inọ who re wuhrẹ epanọ whọ rẹ rọ ta usi uwoma evaọ ẹvẹrẹ ọfa, kọ whọ gbẹ ta ẹme na kẹ ekpako na gbe ọsẹro okogho ra? A sae ta epanọ who re ro ru ei kẹ owhẹ jẹ tuduhọ owhẹ awọ. Lele epanọ uwou ogha o ta, ikogho jọ a ru ọruẹrẹfihotọ eklase evẹrẹ jọ nọ a bi ro wuhrẹ iwhowho-uvie gbe ekobaro epanọ a rẹ rọ rehọ ẹvẹrẹ ọfa ta usi uwoma.

IRUO ỌKOBARO

¹¹ U fo nọ iwhowho-uvie kpobi a rẹ riẹ eware nọ a gwọlọ mi ohwo nọ ọ rẹ jọ ọkobaro obufihọ, ọrọ oke-kpobi, gbe ọrọ obọdẹ jegbe abọ efa iruo odibọgba oke-kpobi na. Ọkobaro ọ rẹ jọ Oleleikristi nọ ọ họ-ame no nọ ọ rrọ emamọ oriruo, nọ uyero riẹ o sae kẹe uvẹ rehọ unu euwa nọ a gwọlọ mi ekobaro ta usi uwoma. Ogbẹgwae Iruo Ukoko na u re kuenu kẹ ebe nọ a fihọ kẹ ọkobaro obufihọ gbe erọ oke-kpobi, rekọ uwou ogha o rẹ rehọ ekobaro obọdẹ mu.

¹² A sai kuenu kẹ ahwo re a ru ọkobaro obufihọ evaọ amara ọvo, evaọ unu emerae jọ nọ i lele ohwohwo, hayo nọ a rẹ ruabọhọ ru vrẹ ọvo ababọ umuoke nọ a fihọ, wọhọ epanọ uyero rai o rrọ. O rẹ were iwhowho-uvie buobu re a ru ọkobaro obufihọ evaọ etoke sa-sa, wọhọ ezi Ekareghẹhọ na hayo amara iweze ọsẹro okogho. Ahwo jọ a rẹ rehọ oke ilivi rai ro ru ọkobaro. Iwhowho-uvie nọ e họ-ame no nọ e rrọ isukulu, a sai fi obe họ kẹ ọkobaro obufihọ evaọ oke ehọlide. Iwhowho-uvie a sae salọ sọ unu euwa nọ a bru kpotọ a gwọlọ ro ru ọkobaro obufihọ evaọ amara Asa gbe Ane kukpe kukpe gbe evaọ amara iweze ọsẹro okogho. Oghẹrẹ kpobi nọ uyero ra o rrọ kẹhẹ, otẹrọnọ who bi yeri uzuazọ ofuafo je wo emamọ uruemu, yọ whọ sai ru epanọ who re ro ru unu euwa na gba, yọ u mu owhẹ ẹro nọ whọ sai ru ọkobaro obufihọ evaọ amara ọvo hayo bu vi ere, o te were ekpako na re a ta ẹme kpahe obe nọ who fihọ kẹ uvẹ-iruo nana.

¹³ Re whọ sai te kẹ ọkobaro oke-kpobi, whọ rẹ jọ ohwo nọ o wo uvẹ nọ ọ sai ro ru unu euwa ẹgbukpe na gba. Ọkobaro oke-kpobi o re lele ọruẹrẹfihotọ ukoko nọ ọ rrọ. Ekobaro nọ i wo ajọwha yọ oghale kẹ ukoko, a re ru amọfa wo ajọwha kẹ iruo odibọgba na jẹ tubẹ tuduhọ amọfa awọ re a ruọ iruo ọkobaro na. Rekọ taure who te ti fi obe họ nọ whọ gwọlọ jọ ọkobaro oke-kpobi, whọ rẹ jọ owhowho-uvie nọ ọ rrọ emamọ oriruo nọ ọ họ-ame te emerae ezeza no o tẹ kawo.

¹⁴ Wọhọ epanọ o rẹ mae jọ, usu ekobaro oke-kpobi nọ i dhesẹ via no inọ a wo ọwhọ gbe onaa evaọ odibọgba na a rẹ jọ salọ ekobaro obọdẹ. A rẹ jọ ahwo nọ a rẹ sae kwa kpohọ oria kpobi nọ uwou ogha u vi rai nya. Evaọ ẹsibuobu, o rẹ jọ oria nọ u siomano nọ a sae jọ ruẹ ahwo nọ a wo isiuru jẹ sae tuọ ikoko ekpokpọ họ. Evaọ ẹsejọ, a re vi ekobaro obọdẹ kpohọ ikoko nọ e gwọlọ obufihọ nọ a sai ro ru ẹkwotọ rai re. A be hai vi ekobaro obọdẹ jọ nọ e rrọ ekpako ukoko kpohọ ikoko esese nyai fiobọhọ kẹ ae, o tẹ make rọnọ a wo etausiuwoma nọ e be sai ru ẹkwotọ na. A rẹ kẹ ekobaro obọdẹ umutho ugho jọ rọkẹ araha rai. A rẹ rehọ ahwo jọ mu ekobaro obọdẹ ubroke.

IMISHỌNARE USI UWOMA OTA

¹⁵ Ogbẹgwae Iruo Ukoko orọ Utu Ẹruorote na o rẹ rehọ imishọnare usi uwoma ota mu, kẹsena Ogbẹgwae Uwou Ogha obonọ a vi rai nya u ve dhe ai kpohọ ewho nọ ahwo a rrọ buobu. A re fiobọhọ fi ajọwha họ iruo usi uwoma ota na je ru nọ iruẹru ukoko e rẹ rọ nya kpatiẹ. Evaọ ẹsibuobu, Isukulu Rọkẹ Etausiuwoma Uvie Na a rẹ jọ wuhrẹ imishọnare usi uwoma ota na. A rẹ kẹ ae oria nọ a rẹ rria jẹ kẹ ae umutho ugho jọ rọkẹ araha rai.

ỌSẸRO OKOGHO

¹⁶ Taure Utu Ẹruorote na o tẹ te rehọ ahwo mu esẹro okogho, a rẹ kake jọ ethabọ ọsẹro okogho tao re a rọ ere wuhrẹ jẹ riẹ iruo na. Ezae nana yọ ahwo nọ a romakẹ iruo odibọgba na je you inievo rai. Ekobaro nọ i wo ajọwha a rrọ, a re se jẹ romatotọ wuhrẹ Ebaibol na kẹ omarai, a riẹ ẹme ẹta jẹ riẹ epanọ a re ro wuhrẹ amọfa. O rẹ jọ vevẹ inọ a be mọ ubi ẹzi na, yọ a rẹ jọ ahwo nọ a re rri je ru eware owowa, dhesẹ ororokẹ gbe orimuo. Otẹrọnọ oniọvo-ọmọzae na ọ rọo no, aye riẹ nọ ọ rrọ ọkobaro ọ rẹ jọ emamọ oriruo evaọ uruemu riẹ gbe oghẹrẹ nọ o re yerikugbe amọfa. Ọ rẹ riẹ usi uwoma ta ziezi. Ọ rẹ jẹ jọ aye nọ ọ be romakpotọ, orọnikọ ọ rẹ jọ amiunugu ọzae riẹ hẹ hayo o rẹ jọ nọ unu riẹ ọvo a re yo nọ a tẹ be ta ẹme he. Iruo esẹro okogho avọ eyae rai e rrọ gaga, fikiere ahwo nọ a be daoma re a nyate utee iruo nana a rẹ jọ ahwo nọ oma rai o rrọ gaga. Ekobaro a re fi obe họ kẹ iruo ọsẹro okogho ho. Ukpoye, a rẹ vuẹ ọsẹro okogho rai inọ a gwọlọ nọ a rẹ jọ ọsẹro okogho, ọ vẹ te vuẹ ae eware nọ a rẹ sai ru kpahe iẹe.

ISUKULU UKOKO NA

¹⁷ Isukulu Rọkẹ Etausiuwoma Uvie Na: Ma gwọlọ etausiuwoma Uvie na efa buobu nọ e rẹ ta usi uwoma evaọ ekwotọ nọ a rẹ kake jọ ta usi uwoma ha je fiobọhọ kẹ ikoko dikihẹ ziezi. Fikiere, inievo-emezae gbe inievo-emetẹ nọ e re rọo ho, gbe ezae-avọ-eyae nọ e rọo no a sai fi obe họ re a wuhrẹ ai evaọ Isukulu Rọkẹ Etausiuwoma Uvie Na. A re vi ahwo nọ a nwrotọ no isukulu na ze kpohọ eria nọ ẹgwọlọ ọ mae rrọ evaọ orẹwho rai wọhọ ekobaro oke-kpobi. Rekọ, a rẹ sae rehọ iruo Uvie na efa kẹ ahwo nọ a rẹ sae jẹ iruo itieye rehọ evaọ orẹwho rai hayo orẹwho ofa. A sai vi umutho jọ wọhọ ekobaro obọdẹ ubroke hayo ekobaro obọdẹ oke-kpobi. Ekobaro nọ e gwọlọ kpohọ isukulu nana a rẹ sae riẹ eware nọ a gwọlọ mi ai nọ a te kpohọ ẹgwae nọ a ruẹrẹhọ kẹ ẹjiroro nana evaọ okokohọ ubrotọ.

¹⁸ Isukulu Giliad: Ahwo nọ a rẹ salọ kẹ isukulu nana họ inievo-emezae gbe inievo-emetẹ nọ e re rọo ho, gbe ezae-avọ-eyae nọ e rọo no, nọ e rẹ ta Oyibo jẹ rrọ iruo odibọgba oke-kpobi obọdẹ. A rẹ jọ ahwo nọ a te sai fiobọhọ fi ajọwha họ iruo usi uwoma ota na je ru nọ iruẹru uwou ogha e rẹ rọ nya kpatiẹ. A rẹ jọ ahwo nọ a dhesẹ via no inọ a rẹ rọ evawere gbodibo kẹ inievo rai jẹ sae rọ edhere owowou fiobọhọ kẹ amọfa re a wuhrẹ je lele oware nọ Ebaibol gbe ukoko na e ta. Ogbẹgwae Uwou Ogha o rẹ ta kẹ ahwo nọ a rri nọ a te re a fi obe họ. A re vi ahwo nọ a nwrotọ no isukulu nana ze kpohọ usi uwoma ota hayo uwou ogha evaọ orẹwho ofa hayo orẹwho obọrai.

IRUO EBẸTẸLE

¹⁹ Re a ruiruo evaọ Ebẹtẹle yọ obọdẹ uvẹ-ọghọ. Otofa Ebẹtẹle họ “Uwou Ọghẹnẹ,” yọ odẹ nana u gine fo eria nana nọ a be jọ ru iruo Ọghẹnẹ na. Inievo nọ i bi ruiruo evaọ Ebẹtẹle a bi ru iruo nọ i wuzou, nọ i bi fiobọhọ evaọ ekere, efafa, gbe ẹghale ebe nọ a re ro wuhrẹ Ebaibol na. Iruo rai i wuzou gaga kẹ Utu Ẹruorote na nọ o be sẹro jẹ kpọ ikoko nọ e rrọ otọakpọ na soso. Ibuobu ahwo uviuwou Ebẹtẹle nọ e rrọ efefafa a be rria je bi ru iruo rai evaọ ewho nọ a be jọ ta ẹvẹrẹ nọ a be fa na evaọ ẹkwotọ uwou ogha rai. Onana u bi fiobọhọ kẹ ai yo oghẹrẹ nọ ahwo a be ta ẹvẹrẹ na kẹdẹ kẹdẹ. A sae jẹ ruẹ sọ ahwo a bi wo otoriẹ epanọ a be fa ẹvẹrẹ na evaọ ebe mai.

²⁰ Iruo buobu nọ a be jọ Ebẹtẹle ru yọ iruo nọ a rẹ rọ ẹgba ru. Fikiere, ahwo nọ a re se kpohọ Ebẹtẹle a rẹ mae jọ inievo-emezae nọ e roma mudhe jẹ họ-ame no, nọ e gbẹ maha, nọ i wo omokpokpọ jẹ goma. Otẹrọnọ uwou ogha nọ o be rẹrote orẹwho ra o gwọlọ ahwo, yọ whọ gwọlọ jọ Ebẹtẹle ruiruo, whọ sae riẹ eware efa nọ a gwọlọ mi ohwo mi ekpako ukoko ra.

IRUO EBABỌ

²¹ Ebabọ Egwa Uvie, Egwa Okokohọ, gbe eria itieye na efa yọ abọjọ iruo Ọghẹnẹ, onọ o wọhọ iruo nọ a ru okenọ a rọ bọ etẹmpol Solomọn. (1 Iv. 8:13-18) Inievo buobu a bi dhesẹ nọ a wo ọwhọ kẹ iruo Jihova ẹkwoma oke gbe ugho gbe ekwakwa rai nọ a be rọ tha iruo nana uke.

²² Kọ whọ sai fiobọhọ evaọ iruo nana? Whọ tẹ rrọ owhowho-uvie nọ ọ họ-ame no yọ whọ gwọlọ nọ who re wobọ evaọ iruo itieye, o te were inievo nọ e be rẹrote ebabọ na evaọ ubrotọ rai re who fiobọhọ, yọ a ti wuhrẹ owhẹ iruo na otẹrọnọ whọ riẹ kpahe ebabọ họ. Kọ whọ gbẹ ta kẹ ekpako ukoko ra kpahe iroro ra na? Iwhowho-uvie jọ nọ e họ-ame no nọ i te a tubẹ fialoma via no kẹ iruo ebabọ Egwa Uvie, Egwa Okokohọ, gbe eria itieye na efa evaọ erẹwho efa.

²³ Uvẹ sa-sa e riẹ nọ a sai ro wobọ evaọ iruo ebabọ. Iwhowho-uvie nọ e họ-ame no nọ e rrọ emamọ oriruo, nọ e dina riẹ kpahe iruo ebabọ e sai ru iruo evaọ ebabọ Egwa Uvie hayo Egwa Okokohọ, hayo eria itieye efa nọ a bi ru kẹle oria rai, yọ a re se ai Local Design/Construction volunteers. Efa e rẹ sai wobọ evaọ iruo ebabọ nọ i thabọ no oria rai omojọ evaọ umuo oke jọ, yọ uwou ogha o rẹ rehọ ai mu re a jọ ahwo nọ a fialoma via kẹ ebabọ (construction volunteers) evaọ eka ivẹ rite emera esa. A re se ahwo nọ a ro mu re a jọ iruo na ribri idibo ebabọ (construction servants). Odẹ nọ a re se odibo ebabọ nọ a vi kpohọ orẹwho ofa nyai ru iruo họ, odibo ebabọ nọ o no orẹwho ofa ze (expatriate construction servant). Utu Ebabọ nọ idibo ebabọ avọ ahwo nọ a fialoma via kẹ ebabọ a rrọ o rẹ rẹrote iruo ebabọ kpobi nọ a bi ru, yọ inievo nọ a re se Local Design/Construction volunteers avọ ahwo nọ a fialoma via evaọ ikoko nọ a be bọ kẹ na a rẹ tha iruo na uke. Ahwo Itu Ebabọ a re no iruo jọ ruọ ọfa evaọ ẹkwotọ uwou ogha.

DIDI ITEE WHO FIHỌ EVAỌ EGAGỌ JIHOVA?

²⁴ Otẹrọnọ whọ rehọ uzuazọ ra mudhe kẹ Jihova no, kiyọ whọ gwọlọ gọe bẹdẹ bẹdẹ. Rekọ didi itee who fihọ nọ who bi le? Who te fi itee họ nọ who re le evaọ ukoko na u re fiobọhọ kẹ owhẹ rehọ ẹgba gbe eware efa nọ who wo ruiruo avọ areghẹ. (1 Kọr. 9:26) Itee itieye nọ who re fihọ e rẹ lẹliẹ owhẹ wo ẹnyaharo evaọ ukoko na je fiobọhọ kẹ owhẹ tẹrovi eware nọ e mae roja nọ whọ be daoma re who te kẹ uvẹ-iruo efa na.​—Fil. 1:10; 1 Tim. 4:15, 16.

²⁵ Pọl ukọ na o fi emamọ oriruo hotọ kẹ omai nọ ma rẹ rọ aro kele nọ ma be gọ Ọghẹnẹ na. (1 Kọr. 11:1) Pọl ọ dawo ẹgba riẹ kpobi evaọ egagọ Jihova. O vuhumu nọ Jihova o rovie uvẹ buobu fihọ kẹe. Pọl o kere se inievo obọ Kọrint nọ: “A rovie uvẹ ulogbo orọ iruo fihọ kẹ omẹ no.” Kọ ogbẹrọnọ ere o rrọ kẹ omai re? Ee, ma wo iruo buobu nọ ma re ru kẹ Jihova evaọ ukoko na, maero evaọ ewhowho usi uwoma Uvie na. Rekọ wọhọ epanọ o jọ kẹ Pọl, ma re lele “otu ọwọsuọ buobu” muabọ nọ ma be rehọ “uvẹ ulogbo” nana ruiruo na. (1 Kọr. 16:9) U no Pọl eva ze re ọ ta họ omariẹ obọ. Muẹrohọ ẹme nọ ọ ta: “Mẹ be gba oma mẹ je bi su ei wọhọ ọrigbo.” (1 Kọr. 9:24-27) Kọ ma wo oghẹrẹ iroro evo yena?

²⁶ Ma be tuduhọ ohwo kpobi awọ re o wo itee nọ o re le evaọ ukoko na wọhọ epanọ uyero riẹ o rrọ. Ahwo buobu a rrọ abọjọ iruo odibọgba oke-kpobi na nẹnẹ keme a kaki fi itee na họ evaọ uzuazọ. Makọ okenọ a gbẹ jọ emaha, esẹgbini rai gbe amọfa a tuduhọ ai awọ re a ru ere. Fikiere a be reawere obọdẹ iruo evaọ egagọ Jihova, yọ a be vioja vievie he. (Itẹ 10:22) Emamọ itee efa nọ ma rẹ sai fihọ họ usi uwoma ota nọ ma re kpohọ koka koka, obe-uwuhrẹ Ebaibol nọ ma re muhọ kugbe ohwo jẹ hae nyai wuhrẹ iẹe, hayo oke nọ ma rẹ raha ziezi rọ ruẹrẹ oma họ kẹ iwuhrẹ. Oware nọ u wuzou họ, ma re dikihẹ ga ẹsikpobi ma ve ru iruo odibọgba mai gba. Ma te ru ere, ma te wha orro se Jihova jẹ nyate utee mai nọ o mae rro, oye họ re ma gọe bẹdẹ bẹdẹ.​—Luk 13:24; 1 Tim. 4:7b, 8.