Izoge—Eme Wha te Rọ Izuazọ Rai Ru?

“M Ẹ GWỌLỌ wo erere nọ ọ mae rro no uzuazọ mẹ ze.” Ere ọmọtẹ ikpe ikpegbọ jọ ọ ta. Ababọ avro ere whọ gwọlọ re. Rekọ ẹvẹ whọ sai ro wo “erere nọ ọ mae rro” no uzuazọ ze? Ekwakwa awhusi gbe egbẹnyusu ra, ẹsejọhọ tubọ iticha ra dede, a sae ta nọ re whọ rria uzuazọ nọ o rẹ kẹ erere, who re wo igho buobu jẹ jọ iruo ilogbo jọ—ohwo nọ a riẹ odẹ!

Rekọ Ebaibol na ọ vẹvẹ emoha unu inọ ele efe eyero iwo yọ ‘ofou olele họre.’ (Ọtausiwoma Na 4:4) Ẹjiroro jọ nọ o rọ rrọ ere họ, umutho emoha gheghe ọvo a bi ghine wo efe gbe orro na t’obọ. Enọ i wo rai t’obọ a be hae ruẹ nọ uvumọ evawere o riẹ hẹ. Ọmoha Britain jọ nọ o kpohọ isukulu gaga ọ ta nọ: “Efe eyero iwo ọ wọhọ ugbogbo ufofe. Who te rri eva riẹ, eghogho ọvo whọ rẹ ruẹ.” Uzẹme, ẹsejọ iruo e sae kẹ efe gbe odẹ. Rekọ e sai ru “ẹgwọlọ abọ-ẹzi” ra gba ha. (Matiu 5:3, NW ) U te no ere no, 1 Jọn 2:17 o vẹvẹ unu nọ ‘akpọ na ọ be vrẹ.’ Whọ tẹ maki le efe eyero iwo t’obọ evaọ akpọ nana, ubroke ọvo o te jọ.

Ọtausiwoma Na 12:1 o tuduhọ emoha awọ nọ: “Kareghẹhọ ọnọ ọ ma owhẹ evaọ oke ọmoha ra.” Ẹhẹ, edhere nọ ọ rẹ mae kẹ erere nọ whọ rẹ rọ rehọ uzuazọ ra ruiruo họ evaọ iruo Jihova Ọghẹnẹ. Rekọ who re te tao re whọ tẹ sae jọ iruo Ọghẹnẹ. Ẹvẹ whọ sai ro ru ere? Kọ eme uzuazọ evaọ iruo Ọghẹnẹ o gwọlọ?

Ete re A Jọ Osẹri Jihova

Orọ ọsosuọ, who re wo isiuru nọ whọ rẹ rọ gọ Ọghẹnẹ—yọ isiuru yena e rẹ nyaze kpregede he, o tẹ make rrọ nọ ọsẹ gbe oni ra a rrọ Ileleikristi. Who re wo usu obọ ra kugbe Jihova hrọ. Uzoge ọmọtẹ jọ ọ ta nọ: “Olẹ u re fiobọhọ k’owhẹ wo usu obọ ra kugbe Jihova.”—Olezi 62:8; Jemis 4:8.

Ahwo Rom 12:2 o fodẹ owọ ofa nọ whọ rẹ jẹ. O ta nọ: “Wha dhesẹ oreva Ọghẹnẹ via [kẹ omarai], o nọ uwoma nọ a jẹrehọ nọ ojẹ gbunu.” Kọ avro kpahe eware nọ a wuhrẹ owhẹ o ruọ owhẹ eva no ẹdẹjọ? Koyehọ who re lele uduotahawọ Ebaibol na re ‘who dhesẹ kẹ oma ra’ nọ eware nana uzẹme! Ru ekiakiẹ k’omobọ ra. Se Ebaibol gbe ebe nọ a kere no Ebaibol ze na. Rekọ ewuhrẹ kpahe Ọghẹnẹ orọnikọ ewuhrẹ uzou gheghe he. Rehọ oke re who roro kpahe eware nọ who se na re e nyate udu ẹwoho ra ziezi. Onana u ti ru uyoyou ra kẹ Ọghẹnẹ rro.—Olezi 1:2, 3.

Ofariẹ, daoma rọ eme nọ who bi wuhrẹ na t’ẹme kugbe amọfa, ẹsejọhọ kugbe ibe isukulu ra. Usiuwoma ota n’ẹthẹ ruọ ẹthẹ họ owọ nọ u re lele iei. Whọ sae rọ ọthobọ nyaku ibe isukulu nọ whọ be ta usiuwoma na, yọ onana o sae lẹliẹ udu n’owhẹ awọ evaọ oke ọsosuọ. Rekọ Ebaibol na ọ tudu họ omai awọ nọ ma “vuọoma usiuwoma na ha.” (Ahwo Rom 1:16) Whọ be wha ovuẹ uzuazọ gbe ẹruore! Eme whọ jẹ vuoma riẹ?

Whaọ, ọsẹ gbe oni ra a tẹ rrọ Ileleikristi, ẹsejọhọ who bi lele ae kpohọ usiuwoma no vẹre. Rekọ whọ be sai ru vi edikihẹ unuẹthẹ na ababọ ẹmeọta hayo efihọ ada emagazini gbe omobe-ovẹvẹ ọvo? Kọ whẹ ọvo whọ be sae jọ unuẹthẹ t’ẹme, rọ Ebaibol wuhrẹ ọnọ o wo uwou na? O gbẹ rrọ ere he, wo obufihọ mi ọsẹ gbe oni ra hayo omọfa nọ ọ kpako no evaọ ukoko na. Ru ei họ ute re who te wọhọ owhowho-uvie emamọ usi na nọ ọ re họ-ame he!

Oke o be nyaharo na, oma o te w’owhẹ roma mudhe—y’eyaa kẹ Ọghẹnẹ nnọ whọ te gọe no umuo inẹnẹ vrẹ. (Ahwo Rom 12:1) Rekọ, omarọkẹ o rrọ ẹme idhere gheghe he. Ọghẹnẹ ọ gwọlọ nọ ahwo kpobi a ru ‘odhesẹvia ẹgbede kẹ esiwo.’ (Ahwo Rom 10:10) Eva oke ame-ọhọ, whọ rẹ kake rọ unu whowho ẹrọwọ ra via. Ame-ọhọ o ve lele iei. (Matiu 28:19, 20) Uzẹme o rrọ inọ ame-ọhọ yọ owojẹ ulogbo. Rekọ who si uke kpemu hu fikinọ who roro nọ who ti kie. Whọ tẹ rẹroso Ọghẹnẹ kẹ ẹgba, ọ te k’owhẹ “ogaga ulogbo nọ othesiwa” re u fiobọhọ k’owhẹ dikihẹ ga.—2 Ahwo Kọrint 4:7; 1 Pita 5:10.

Eva oke ame-ọhọ, who re zihe ruọ omọvo Isẹri Jihova. (Aizaya 43:10) Onana u ti kpomahọ epanọ who re yere uzuazọ ra gaga. Omarọkẹ họ ‘ẹvro omobọ ra.’ (Matiu 16:24) Whọ rẹ sae vro itee gbe ilale obọ ra jọ whọ vẹ ‘kake gwọlọ uvie Ọghẹnẹ.’ (Matiu 6:33) Fikiere omarọkẹ gbe ame-ọhọ i re rovie uvẹ buobu k’owhẹ nọ who re ro ru ere. Joma roro kpahe ejọ rai.

Uvẹ nọ A rẹ rọ Gọ Ọghẹnẹ Oke-Kpobi

● Iruo-ọkobaro yọ uvẹ utioye na jọ. Owhowho-uvie ọkobaro yọ Oleleikristi oriruo nọ ọ họ-ame no ọnọ ọ tamu re ọ raha oware wọhọ euwa 70 k’amara k’amara evaọ iruo usiuwoma ota. Ẹraha oke buobu evaọ usiuwoma ota u ti fiobọhọ k’owhẹ ru ona usiuwoma ota gbe ewuhrẹ ra woma viere. Ekobaro buobu a ruẹ oghọghọ ọ obufihọ kẹ emọ-uwuhrẹ Ebaibol rai re a zihe ro Isẹri nọ e họ-ame no. Iruo egọmeti vẹ e rẹ mere oma jẹ kẹ evevọwẹ ere?

Re a sae rẹrote oma rai, ekobaro buobu a wo iruo ubroke. Ahwo buobu a rẹ ruẹrẹ oma họ kẹ owha-iruo nana ẹkwoma ewuhrẹ iruo jọ evaọ isukulu hayo mi ọsẹ gbe oni rai. Otẹrọnọ whẹ avọ ọsẹ gbe oni ra a roro nọ u ti fiobọhọ re who gbe wuhrẹ haro omojọ evaọ okenọ who te nwrotọ no ekọleji no, jọ u mu owhẹ ẹro nnọ iroro ra họ orọnikọ re who fe he rekọ re whọ sae rẹrote oma ra evaọ odibọgba ra jẹ tubẹ sai ruiruo wọhọ ọgbodibo oke-kpobi.

Rekọ oware nọ ọkobaro ọ rẹ t’ovao vi họ orọnikọ iruo riẹ hẹ rekọ odibọgba riẹ—fiobọhọ kẹ amọfa wo uzuazọ! Eme jabọ who gbe fi iruo-ọkobaro họ ute ra ha? Iruo-ọkobaro i re su kpohọ uvẹ-ọghọ efa. Wọhọ oriruo, ekobaro a rẹ kwa kpohọ eria nọ ẹgwọlọ rọkẹ iwhowho Uvie ọ mae jọ rro. Efa i re wuhrẹ ẹvẹrẹ ọfa a vẹ kwa kpohọ oria nọ a be jọ ta ẹvẹrẹ na hayo kpohọ orẹwho ofa dede. Ẹhẹ, iruo-ọkobaro yọ edhere uzuazọ nọ o rẹ kẹ erere!

● Iruo imishọnare yọ uvẹ iruo ofa jọ re. Anwọ 1943, Isukulu Ebaibol ọ Giliad ọrọ Watchtower na ọ kẹ ekobaro uwuhrẹ obọdẹ orọ iruo imishọnare no. A re vi enọ i no rie nwrotọ kpohọ ekwotọ efa wọhọ etausiuwoma. Evaọ ekwotọ nana buobu, uzuazọ o lọhọ tere he, fikiere omokpokpọ gbe ẹgba e r’oja kẹ iruo imishọnare. Ghele na, uzuazọ imishọnare o vọ avọ omawere gbe edẹro.

● Isukulu Ewuhrẹ Odibọgba na yọ onọ a ro mu re u wuhrẹ ekpako gbe idibo iruiruo nọ e re rọo ho nọ i te. Ewuhrẹ eka eree ọgaga nana o re dhobọte izoeme wọhọ ewha-iruo ekpako gbe idibo iruiruo, ekokohọ eware, gbe ẹmeọta ẹgbede. A re vi ejọ kpohọ iruo evaọ erẹwho obọ rai. A re vi efa kpohọ iruo evaọ ekwotọ efa.

● Iruo Ebẹtẹle o gwọlọ iruo nọ a re ru wọhọ ahwo unevaze eva uwou ogha Isẹri Jihova jọ. Ahwo uviuwou Ebẹtẹle jọ a re ruiruo evaọ ekporo ebe nọ a kere no Ebaibol ze. Efa i re ruiruo nọ i re fiobọhọ eva ekporo ebe na, wọhọ ẹruorote iwou gbe ekwakwa hayo ẹruorote ẹgwọlọ ugboma ọrọ ahwo uviuwou Ebẹtẹle na. Iruo na kpobi yọ uvẹ-ọghọ orọ iruo efuafo kẹ Jihova. Fibae, enọ e rrọ Ebẹtẹle a wo oghọghọ ẹriẹ inọ oware kpobi nọ a bi ru, o rrọ erere kẹ inievo rai buobu nọ e rrọ akpọ na kpobi.

Ẹsejọ a re zizie inievo nọ i wo obọdẹ ona iruo re a ruiruo evaọ Ebẹtẹle. Rekọ Ebẹtẹle a re jo wuhrẹ ibuobu. Enọ e rrọ Ebẹtẹle a bi ruiruo fiki efe he rekọ emu gbe uwou avọ umutho ugho ọ araha rai nọ a be kẹ ae o be dae ẹro. Ọmoha uviuwou Ebẹtẹle jọ o dhesẹ iruo riẹ enẹ: “U siuru gaga! Iruo na e rẹ gaga, rekọ mẹ jọ etenẹ wo eghale buobu no.”

● Iruo akpọ-soso e rẹ kẹ ohwo uvẹ w’obọ evaọ ebabọ iwou-ogha gbe Egwa Uvie. Idibo ebabọ akpọ-soso, wọhọ epanọ a re se ai na, a re kpohọ erẹwho efa re a fiobọhọ evaọ iruo ebabọ. Onana yọ iruo efuafo, onọ u tho iruo ahwo nọ a bọ etẹmpol Solomọn na. (1 Ivie 8:13-18) Ọruẹrẹfihotọ kẹ ẹruorote iruiruo akpọ-soso o wọhọ orọ ahwo uviuwou Ebẹtẹle. Dai roro uvẹ-ọghọ nọ inievo nana a wo nọ a bi ruiruo evaọ abọ nana rọkẹ ujiro Jihova na!

Rọ Ẹwẹ-Kpobi Gọ Jihova

Ẹgọ Jihova họ edhere uzuazọ nọ o mai woma. Eme jabọ who gbe roro kpahe efihọ ute obọ ra ọrọ ẹgọ Ọghẹnẹ oke-kpobi hi? Rehọ iruo usiuwoma ota oke-kpobi jiroro kugbe ọsẹ gbe oni ra, ekpako ukoko ra, gbe ọsẹro okogho ra. Who te wo isiuru kpahe Ebẹtẹle, Giliad, hayo Isukulu Ewuhrẹ Odibọgba, kpohọ ẹgwae enọ i wo isiuru kẹ iruo nana nọ a rẹ gba eva ikokohọ okogho gbe ilogbo na.

Uzẹme, orọnikọ ohwo kpobi o re te hayo ọ rẹ sai ruiruo ọkobaro ho. Ẹsejọ ẹyao, ẹbẹbẹ ugho, gbe ewha-iruo uviuwou e sai bru oware nọ ma rẹ sai ru dhe. Ghele na, Ileleikristi nọ e roma mudhe no kpobi a re yoẹme kẹ ujaje Ebaibol na: “Whọ rẹ rehọ eva ra kpobi, gbe ẹzi ra kpobi, gbe iroro ra kpobi, you Ọnowo na Ọghẹnẹ ra.” (Matiu 22:37) Jihova ọ gwọlọ nọ whọ dawo uthoma ra. Fikiere epanọ uyero ra o rrọ kpobi, fi ẹgọ Jihova họ oware ọsosuọ eva uzuazọ ra. Fi emamọ itee Uvie họ. Ẹhẹ, “kareghẹhọ ọnọ ọ ma owhẹ evaọ oke ọmoha ra”—who ve ti wo eghale bẹdẹ bẹdẹ fiki ere oruo!

Ajokpa nọ a dhesẹ ofa jọ, isase ọ Ikereakere na nọ a se eva obe onana a rehọ e rai no Ebaibol Ẹri Na ze.