A Gwọlọ Inievo Emezae Efa Evaọ Iruo Ọkobaro Na
1 Pọl ọ ta k’omai nọ ‘kẹse kẹse ma hẹ jọ owhreze iruo Ọnowo na.’ (1 Kọr. 15:58) Rọ kẹ ahwo buobu, onana u dhesẹ ẹrehọ iruo ọkobaro na. Evaọ amara August ọnana nọ o kpo na, bu vi 460 eye i kuomagbe otu ekobaro evaọ Nigeria!
2 Obọnana unu ekobaro nọ e mae bu evaọ orẹwho nana họ inievo emetẹ. (Ol. 68:11) Ẹvẹ o rẹ jọ oware oghọghọ kẹ ukoko na te otẹrọnọ inievo emezae efa a sae kuomagbe otu egbodibo oke-kpobi! (Ol. 110:3) Ma riẹ nọ inievo emezae buobu a rẹ rẹro te owha-iruo ogbẹgbẹdẹ iviuwou. Efa a re ru iruo egaga re a rẹro te ẹgwọlọ ẹzi ukoko na. Ma wo ovuhumuo kẹ ahwo enana nọ e be họra fiki Uvie na.—1 Tim. 4:10.
3 Omake rọ ere ghele na, kọ whai inievo emezae wha gbẹ sae rehọ iruo ọkobaro na? Otẹrọnọ aye ra o bi ru iruo ọkobaro, kọ whọ gbẹ sae kuomagbei? Otẹrọnọ whọ kpako vi iruo no, u gbe mu owhẹ ẹro nọ edhere nọ o rẹ mai veva nọ whọ rẹ rọ raha oke ra họ evaọ odibọgba oke-kpobi? Otẹrọnọ who nwotọ no isukulu obọ, kọ whọ rehọ oma olẹ roro kpahe iruo ọkobaro wọhọ owọ-ọsosuọ rọkẹ ọkwa-iruo ọfa no?—Ẹf. 5:15-17.
4 Oniọvo ọmọzae jọ ọ zẹ eki riẹ nọ o jẹ kẹe erere buobu no ọ tẹ rehọ iruo ubroke re ọ sae ruiruo ọkobaro. Avọ emamọ oriruo riẹ, emọ esa evaọ udevie emọ ene riẹ a tẹ ruọ iruo ọkobaro nọ a nwani nwotọ no isukulu no. Ọrọ avene o je muọwhọ re o kuomagbe ai. Oniọvo ọmọzae ọnana avọ uviuwou riẹ a wo eghale buobu no.
5 Ẹthẹ Ologbo O Rovie Fihọ: Iruo ọkobaro o rẹ sae rovie ‘ẹthẹ ologbo nọ u re su kpohọ iruo.’ (1 Kọr. 16:9) A rẹ sae rehọ inievo emezae nọ e rọ ekobaro ruiruo gaga evaọ ukoko na. Iruo ajọwha usiuwoma ota rai u re fiba orro ẹzi rai o rẹ jẹ zọhọ kugbe ẹnyaharo iruo Ọghẹnẹ rai. Iruo ọkobaro u re rovie edhere kẹ ọkwa iruo efa. Nọ ukpe ọsosuọ iruo ọkobaro o tẹ vrẹ no, oghale ekpohọ Isukulu Ekobaro ọ riẹ. Ekpako gbe idibo iruiruo nọ e re rọo ho a rẹ sai te kẹ ekpohọ Isukulu Ewuhrẹ Odibọgba. Uwhremu na inievo emezae a sae te kẹ iruo ọnyawariẹ na. Ẹhẹ, iruo ọkobaro na u re rovie ẹthẹ kẹ ekwa-iruo enana evaọ ukoko Jihova.
6 Inievo emezae nọ e rẹ sae ru uvẹ kẹ iruo ọkobaro oke kpobi a rẹ sae wo oghọghọ ulogbo nọ u re lele ẹkẹ buobu.—Iruẹru 20:35.