Raro Kele Jihova Ẹkwoma Obọdẹ Ẹruọsa ọ Amọfa
1 Jihova họ oriruo nọ ọ mae rro ọrọ ọnọ o dhesẹ obọdẹ ẹruọsa ọ amọfa. Wọhọ Osu-Okpehru Ehrugbakpọ, o wo ẹgwọlọ emama ohwo-akpọ riẹ họ iroro. (1 Pita 5:7) Jesu ọ tudu họ ilele riẹ awọ nọ a dhesẹ uruemu Ọsẹ riẹ, ọnọ o re ru ọre vatha gbe oso rrọ te ahwo nọ i kiẹrẹe gbe enọ i kiẹrẹe he. (Mat. 5:45) Whọ rẹ sae raro kele Jihova ẹkwoma edhesẹ obọdẹ ororokẹ rọkẹ amọfa—whọ vẹ ruẹrẹ oma họ re whọ ghale ovuẹ Uvie na kugbe ohwo kpobi nọ whọ nyaku. Ẹkwoma ẹriẹ ziezi ọrọ ibroshọ nọ a bi ro ruiruo evaọ odibọgba na evaọ etoke July, ere whọ sae te rọ rehọ obufihọ ẹzi kẹ amọfa. Ezọhọfihọ nọ e rọ obotọ na e kẹ iroro jọ kpahe epanọ whọ sae rọ ruẹrẹ oma họ kẹ iweze ọsosuọ jẹ rehọ ozihebro ẹruoke lele isiuru na.
2 Okenọ who bi ti fi ibroshọ na “Kọ Ọghẹnẹ Ọ Be Ghinẹ Daezọ Mai?” họ ada, whọ rẹ sae ta nọ:
◼ “Kọ who roro no ẹdẹjọ kpahe oware nọ o soriẹ nọ Ọghẹnẹ ọ jẹ kuvẹ re ahwo-akpọ a ruẹ uye otẹrọnọ ọ be ghinẹ daezọ rai? [K’uvẹ kẹ uyo.] Ibroshọ ọnana orọnikọ uyo nọ o rẹ v’eva ọvo o kẹ rọkẹ onọ nana ha rekọ u dhesẹ re inọ Ọghẹnẹ ọ yeyaa nọ o ti si enwoma nọ ohwo-akpọ ọ wha se omobọ riẹ gbe akpọ riẹ no.” Se edhe-ẹme avọ 23 evaọ ẹwẹ-obe 27. Dhesẹ ifoto nọ o rọ obotọ riẹ, je se Olezi 145:16 no edhe-ẹme avọ 22 ze. Fi ibroshọ na họ ada evaọ unu azọhọ riẹ. Otẹrọnọ a rehọ ibroshọ na, nọ onọ nọ a rẹ sae kẹ uyo riẹ evaọ iweze n’otha, wọhọ: “Kọ whọ gwọlọ riẹ epanọ Ọghẹnẹ o ti ro ru ẹjiroro riẹ gba kpahe ẹghale ohwo-akpọ gbe akpọ na nọ o ti zihe ruọ aparadase?”
3 Okenọ who te bi zihe bru ahwo nọ who fi ibroshọ “Kọ Ọghẹnẹ Ọ Be Ghinẹ Daezọ Mai?” họ ada kẹ, whọ rẹ sae mu ẹmeọta ọfa họ evaọ edhere ọnana:
◼ “Oke ọsosuọ nọ mẹ nyaze, ma ta nọ Ọghẹnẹ ọ be ghinẹ daezọ mai gbe nọ o rọ ẹjiroro riẹ re o si enwoma kpobi nọ ohwo-akpọ ọ wha se omobọ riẹ gbe akpọ riẹ no.” Rovie ibroshọ na kpohọ ifoto nọ e rọ ewẹ-obe 2-3 jẹ ta nọ: “Ma rehọ onọ nana ku ẹmeọta mai họ, Oghẹrẹ vẹ Ọghẹnẹ o ti ro ru ẹjiroro riẹ gba kpahe ẹghale ohwo-akpọ gbe akpọ na nọ o ti zihe ruọ aparadase? Eme who roro?” K’uvẹ kẹ uyo. Rovie kpohọ ẹwẹ-obe 17, je se edhe-ẹme avọ 2 gbe Daniẹl 2:44. U te no oye no, se edhe-ẹme avọ 12 evaọ ẹwẹ-obe 18. Nọ ọnọ o wo uwou na sọ o rẹ te were iẹe re o lele owhẹ rri abọ 9 ibroshọ na. Otẹrọnọ ọ gwọlọ, wuhriẹe kugbei.
4 Onana yọ edhere jọ nọ a rẹ sae fihọ iruo evaọ efihọ ada ọ ibroshọ na “Okenọ Ohwo nọ Who You O te Whu.” Dhesẹ uke riẹ re whọ ta nọ:
◼ “Nẹnẹ na ma be ghale ibroshọ ọnana nọ ọ wha omosasọ gbe ẹruore se ima ahwo buobu nọ ahwo rai jọ nọ a you a whu no. Kọ whọ dina roro ẹsejọ no kpahe ẹruore nọ o rọ kẹ enọ i whu no? [K’uvẹ kẹ uyo.] Ebaibol o dhesẹ eyaa Ọghẹnẹ vevẹ kpahe ẹkparomatha.” Se Jọn 5:28, 29. Rovie ibroshọ na jẹ kpahe eme fihọ igogo-eme nọ e rọ edhe-ẹme urere evaọ ẹwẹ-obe 28 gbe edhe-ẹme ọsosuọ evaọ ẹwẹ-obe 31 na. Dhesẹ ifoto nọ i lele i riei. Fi ibroshọ na họ ada. Whọ rẹ sae gbẹ edhere kẹ ozihebro ẹkwoma onọ inọ, “Ẹvẹ o sae ro mu omai ẹro nọ ukuhọ riẹ a ti si uwhu no riẹriẹriẹ?”
5 Oria nọ who jo fi ibroshọ na “Okenọ Ohwo nọ Who You O te Whu” họ ada, whọ rẹ sae gwọlọ fi odhesẹvia ọnana họ iruo evaọ ozihebro:
◼ “Okenọ ma kake t’ẹme kugbe, ma ta kpahe ẹruore igbunu ẹkparomatha. Ibroshọ nọ mẹ nya seba k’owhẹ u dhesẹ oware nọ o soriẹ nọ u je mu omai ẹro nọ ukuhọ riẹ a ti si uwhu no riẹriẹriẹ. Kọ whọ gbẹ ruẹ nọ eyaa Ọghẹnẹ e rẹ kẹ omosasọ gbe imuẹro?” K’uvẹ kẹ uyo. Rovie kpohọ ẹwẹ-obe 31 evaọ ibroshọ na, je se edhe-ẹme avivẹ gbe ọrọ avesa, kugbe Eviavia 21:1-4. Ru ẹruore nọ ma wo vevẹ ọrọ ẹriọ awere uzuazọ ababọ uwhu. Oghẹrẹ nọ isiuru nọ a dhesẹ o rọ gbe eyero oke oyena, whọ rẹ sae dhesẹ uwuhrẹ Ebaibol evaọ obe Eriariẹ na hayo nọ onọ ọfa re u rovie edhere kẹ ozihebro ọfa.
6 Whọ rẹ sae ta ẹme obotọ na okenọ who te bi fi ibroshọ na “Eme Họ Ẹjiroro Uzuazọ? Ẹvẹ Whọ Sai Ro Duku Ei?” họ ada:
◼ “Ahwo buobu a roro kpahe oware nọ ẹjiroro uzuazọ o rọ no. A nọ omobọ rai no inọ: ‘Fikieme mẹ jẹ rọ etenẹ? Bovẹ mẹ be nya? Eme o rọ obaro k’omẹ?’ Diẹse who roro nọ ma rẹ jọ duku iyo na? [K’uvẹ kẹ uyo.] Muẹrohọ oware nọ Ebaibol ọ ta. [Se Olezi 36:9.] Kọ u gbe w’iroro re ma kuei họ nọ Ọnọma ohwo-akpọ ọye họ ọnọ o te nọ ọ sai dhesẹ oware nọ ma jẹ rọ etenẹ? [K’uvẹ kẹ uyo.] Ibroshọ ọnana u dhesẹ ẹjiroro ogbunu nọ Ọghẹnẹ o wo k’omai.” Rovie kpohọ ewẹ-obe 20-21, se uzoẹme na, jẹ kpahe ẹme fihọ ifoto na; fi ibroshọ na họ ada evaọ unu azọhọ riẹ. Otẹrọnọ a tẹ rehiẹe, nọ inọ: “Ẹvẹ o sai ro mu omai ẹro nọ o gbẹ rọ ẹjiroro Ọghẹnẹ re ohwo-akpọ ọ rria bẹdẹ bẹdẹ evaọ Aparadase ọ otọakpọ?”
7 Otẹrọnọ who fi ibroshọ na “Eme Họ Ẹjiroro Uzuazọ? Ẹvẹ Whọ Sai Ro Duku Ei?” họ ada, whọ rẹ sae ta enẹ okenọ who te zihe:
◼ “Evaọ iweze ọsosuọ mẹ, mẹ ghinẹ reawere ẹmeọta kugbe owhẹ kpahe eriwo Ebaibol na inọ uzuazọ ohwo-akpọ u ghine wo ẹjiroro.” Dhesẹ ifoto nọ o rọ ẹwẹ-obe 31 jẹ nọ inọ, “Ẹvẹ o sai ro mu omai ẹro nọ o gbẹ rọ oreva Ọghẹnẹ re ohwo-akpọ ọ rria bẹdẹ bẹdẹ evaọ Aparadase ọ otọakpọ?” Se edhe-ẹme avọ 3 evaọ ẹwẹ-obe 20. Ta igogo-eme nọ e rọ otọ uzoẹme na, “O gbẹ rọ Ẹjiroro Ọghẹnẹ,” evaọ ẹwẹ-obe 21. Rovie kpohọ uke ibroshọ na, je se kpahe edhesẹ obe uwuhrẹ Ebaibol ọvọvẹ. Dhesẹ obe Eriariẹ na, jẹ vuẹe nọ whọ gwọlọ dhesẹ epanọ ma rẹ rehiẹe ruiruo wọhọ obufihọ ewuhrẹ Ebaibol.
8 Odibọgba mai u re dhesẹ obọdẹ isiuru nọ ma wo re ma fiobọhọ kẹ ahwo udu oruọzewọ re “a ze te riẹ uzẹme na.” (1 Tim. 2:4) Fikiere, ru oke evaọ oma iruo ra re who zihe bru omomọvo nọ who fi ibroshọ na họ ada kẹ. Edhesẹ obọdẹ ororokẹ ra kẹ ae o rẹ sae whai ze nọ whọ jẹ sai fiobọhọ kẹ ahwo nọ a bi dimẹ je bi bo fiki eware oma-uzue nọ a bi ru evaọ egagọ erue, re a kpoka họ ae kẹ usiwo. (Izik. 9:4, 6) Whọ te jẹ ruẹ oghọghọ gbe edẹro nọ i re no ẹriẹ inọ whọ be raro kele Jihova ẹkwoma obọdẹ ẹruọsa ọ amọfa.—Wawo Ahwo Filipai 2:20.