Ma Wo Okwakwa Okpokpọ Nọ A re ro Mu Ebe Uwuhrẹ Họ!
1 Aye obọ America na o kru egagọ Kathọlik riẹ gaga. Ọ rẹ thọ iwuhrẹ ichọche na uke avọ oruọzewọ. O tube kpohọ erẹ-egagọ obọ Vatican na dede. Dede na, okenọ omọvo Isẹri Jihova jọ ọ ziọ uwou riẹ, ọ jẹ obe uwuhrẹ Ebaibol rehọ. Fikieme? Fikinọ ọ gwọlọ riẹ oware nọ Ebaibol ọ ta yọ ichọche riẹ i re ru obe uwuhrẹ Ebaibol obọ uwou hu. Eme onana u wuhrẹ omai? Inọ ma riẹ ohwo nọ ọ rẹ sae jẹ uwuhrẹ Ebaibol ọvọvẹ rehọ họ.—Ọtausi. 11:6.
2 Kọ who sioma-h’emu no ẹdẹjọ re whọ ta kẹ ahwo nnọ ma gwọlọ wuhrẹ Ebaibol na kugbe ohwo kpobi nọ o wo isiuru? Kọ ahwo kpobi nọ a rrọ ẹkwotọ ra a riẹ nnọ ma be kẹ ahwo uwuhrẹ ọvọvẹ nana? Ẹvẹ o sai ro mu omai ẹro nọ a riẹ? Enẹna ma wo okwakwa okpokpọ nọ a re ro ru ei no! Oyena họ omobe-ovẹvẹ uwowoma, orọ ewẹ-obe ezeza nọ uzoẹme riẹ o ta nnọ Kọ Whọ Gwọlọ Riẹ Kpahe Ebaibol na Viere? Joma rri eware nọ e rrọ omobe-ovẹvẹ onana, no uzoẹme-osese te uzoẹme-osese:
3 “Fikieme Who je Se Ebaibol Na?” Ẹjiroro nọ omobe-ovẹvẹ na o kẹ i siuru gaga. U dhesẹ nnọ Ebaibol na o wo “ithubro iyoyou nọ i n’obọ Ọghẹnẹ ze,” o dhesẹ epanọ a rẹ rọ nyabru ei evaọ olẹ gbe oghẹrẹ nọ a re ro wo okẹ uzuazọ ibẹdẹ bẹdẹ riẹ. (1 Tẹs. 2:13) Omobe-ovẹvẹ na o ta kpahe “izẹme [Ebaibol sa-sa] nọ i re rovie ohwo aro,” wọhọ oriruo, oware nọ o rẹ via nọ ma te whu gbe oware nọ o soriẹ nọ ebẹbẹ i je bu otọakpọ na t’enẹ. U dhesẹ “ehri-izi Ọghẹnẹ nọ e rọ Ebaibol na” nọ a te fi ai h’iruo e rẹ wha erere ugboma ze jẹ kẹ evawere, ẹruore, gbe ekwakwa isiuru efa evaọ okenọ a te fi ai h’iruo. Omobe-ovẹvẹ na o ta kpahe ẹjiroro ọfa jọ nọ a re ro se Ebaibol na—eruẹaruẹ kpahe obaro nọ i dhesẹ oware nọ o rrọ obaro mai kẹle.—Evia. 21:3, 4.
4 “Obufihọ Evaọ Ewo Otoriẹ Ebaibol Na”: Omobe-ovẹvẹ na o ta nọ: “Mai kpobi ma gwọlọ obufihọ re ma wo otoriẹ Ẹme Ọghẹnẹ.” U te dhesẹ idhere nọ ma re ro wuhrẹ Ebaibol na: “O rẹ mai woma re a rehọ igogo iwuhrẹ na mu Ebaibol họ ewuhrẹ othotha.” Bi dhesẹ vevẹ inọ “oware nọ Ebaibol na ọ ta a rẹ rehọ,” o fodẹ ibroshọ Gwọlọ na dẹẹ wọhọ oware jọ nọ u re fiobọhọ kẹ ọmọ-uwuhrẹ “wo otoriẹ eria Ikereakere kpahe izoeme buobu sa-sa.” Uzoẹme-osese nọ o kẹle riẹ o kpare onọ ulogbo jọ.
5 “Kọ O Ruọ Owhẹ re Whọ Raha Oke k’Oka k’Oka ro Wo Otoriẹ Ebaibol Na?” A ru rie vevẹ inọ a rẹ sae ruẹrẹ uwuhrẹ Ebaibol na fihọ oke gbe oria nọ u kiehọ ọmọ-uwuhrẹ na oma, evaọ obọ uwou obọriẹ hayo makọ ẹkwoma ifonu dede. Ono ọ rẹ sai kuomagbe uwuhrẹ na? Omobe-ovẹvẹ na o k’uyo nọ: “Uviuwou ra kpobi. Egbẹnyusu kpobi nọ whọ gwọlọ zizie kugbe oma a sae jariẹ. Hayo u te j’owhẹ, a sai ru uwuhrẹ na kugbe owhẹ ọvo.” Ẹvẹ ohwo o re wuhrẹ lehie te? O ta nọ: “Ibuobu e rẹ raha auwa ọvo k’oka k’oka ro wuhrẹ Ebaibol na. Otẹrọnọ whọ rẹ sae raha oke viere hayo whọ rẹ sae raha tere he k’oka k’oka, Isẹri na e sae nya ze ti fiobọhọ k’owhe.” Oware nọ o r’oja na oye! U no omai eva ze re ma nwene lele iyero ọmọ-uwuhrẹ kpobi.
6 “Uzizie re Who Wuhrẹ”: A kẹ ẹmẹwẹ-obe ayare nọ ohwo nọ o mi omobe-ovẹvẹ na ọ rẹ sae rọ yare ibroshọ Gwọlọ na hayo yare iweze re a ruẹsi dhesẹ ọruẹrẹfihotọ obe uwuhrẹ Ebaibol mai kẹe ziezi. A dhesẹ uke ibroshọ Gwọlọ na fihọ iẹe dẹẹ. Kọ whọ gbẹ ruẹ oware nọ omobe-ovẹvẹ nana o jẹ tuduhọ ahwo udu-oruọzewọ efa awọ re a jẹ obufihọ mai rehọ? Kọ ẹvẹ ma sae rọ rehọ omobe-ovẹvẹ onana ro ruiruo nọ e rẹ kẹ erere ologbo?
7 Ono Whọ rẹ Sae Rehọ Omobe-Ovẹvẹ na Kẹ? A rẹ sae rehọ omobe-ovẹvẹ na kẹ ohwo hayo a rẹ sae nya se iẹe ba iwou ahwo nọ a dihọ uwou hu. A rẹ sae ghale iẹe n’uwou ruọ uwou, evaọ iyẹrẹ, gbe evaọ eria enu-iruo. Rehọ iẹe kẹ ahwo makọ a rehọ ebe mai hayo a se rai. Fi ei họ eva emagazini hayo ebe efa nọ who bi fihọ ada. Vi ei lele ileta nọ who bi kere. Vi ei se ahwo nọ who lele t’ẹme evaọ ifonu. Ejọ e hae j’owhẹ obọ ẹsikpobi nọ whọ rẹ ghale evaọ okenọ whọ tẹ be dẹ eware, whọ tẹ ruọ omoto ofa, gbe okenọ uvẹ u te rovie re who se isẹri ọnyakuo. Rehọ iẹe kẹ ohwo kpobi nọ o te unuwou ra. Rehọ iẹe kẹ imoni ra, erivẹ, ibe-iruiruo, ibe-isukulu, gbe egbẹrioma efa. Daoma re whọ rehọ omobe-ovẹvẹ onana kẹ ohwo kpobi nọ whọ nyaku! Kọ eme ọfa?
8 Otẹrọnọ A Nwane j’Owọ: Ahwo jọ a te nwane j’owọ ta nnọ a gwọlọ obe uwuhrẹ Ebaibol. Fikiere, oke kpobi nọ whọ tẹ rrọ usiuwoma, ruẹ nnọ ibroshọ gwọlọ na ivẹ e rọ owhẹ obọ ẹsikpobi—ojọ rọkẹ ọmọ-uwuhrẹ na odekọ na rọkẹ oma ra. U te no ohwo na eva ze, nwani mu uwuhrẹ na họ ovavo evaọ etẹe. Rovie kpohọ obeva ọ ẹwẹ-obe uke na, re who se oria “Epanọ A Rẹ Rehọ Ibroshọ Onana Ruiruo.” Who ve kpohọ uwuhrẹ 1 na ovavo, re who dhesẹ epanọ a re ru uwuhrẹ na. Kọ oware jọ o rẹ lọhọ vi enẹ?
9 Otẹrọnọ Ọnọ Ọ Kezọ k’Owhẹ na Ọ Gwọlọ Oke nọ O re ro Roro Kpahe Iẹe: Jọ u lehie hrọ họ re whọ tẹ wariẹ nya bru ei. Who te zihe bru ei, ruẹ nnọ whọ wha ibroshọ Gwọlọ na lele oma re whọ sai dhesẹ eware nọ e riẹ eva na kẹe evaọ obeva ọ ẹwẹ-obe uke na. Jọ o se uhie izoẹme na re ọ salọ uwuhrẹ nọ o mai si ei urru. Rovie kpohọ iẹe, re wha mu uzoẹme nọ ọ salọ na họ ewuhrẹ.
10 Nya lele Emagazini Nọ Who Fihọ Ada: Otẹrọnọ whọ rehọ omobe-ovẹvẹ na kugbe emagazini kẹ ohwo, whọ rẹ sai zihe evaọ edhere otiọnana: “Oke ẹdẹ nọ mẹ nya ze, o were omẹ nọ mẹ rọ nya siọ emagazini Uwou-Eroro na ba k’owhẹ. Ẹsejọhọ who muẹrohọ nnọ uzoẹme emagazini na soso họ Uwou-Eroro Na Nọ U Bi Whowho Uvie Jihova. Nẹnẹ na mẹ gwọlọ dhesẹ oware nọ Uvie nana o rrọ gbe oware nọ u ti ru k’owhẹ avọ uviuwou ra.” Who ve rovie ibroshọ Gwọlọ na kpohọ uwuhrẹ avọ 6. Muhọ no edhe-ẹme ọsosuọ na ze, ru isase gbe uwuhrẹ lele epanọ ọnọ o wo uwou na o wo uvẹ te. Kẹsena who ve ru ọruẹrẹfihotọ nọ who re ro zihe ẹdẹ ọfa re wha ru uwuhrẹ na re.
11 Jọ Emebe-Evẹvẹ na I Reno Owhẹ Obọ Họ: Ọsẹro iruo usiuwoma ota gbe inievo nọ e be rẹrote ebe na a re ru re omobe-ovẹvẹ ọ Riẹ Ebaibol Na o hae jariẹ buobu ẹsikpobi evaọ ukoko na. Fi ejọ họ ẹkpa ewu ra hayo ẹkpa-usiobọ ra, omoto ra, obọ oria iruo ra, obọ isukulu, kẹle ẹthẹ uwou ra—oria kpobi nọ a jẹ rue rai tọlọ vẹrẹ vẹrẹ. Ẹhẹ, fi ejọ họ ẹkpa usiuwoma ota ra rọkẹ okenọ whọ rẹ nya ku ohwo nọ whọ rẹ sai lele t’ẹme kpahe Ebaibol na.
12 Jọ Jihova Ọ Ghale Omodawọ Mai: Ute oghaghae jọ nọ o rrọ kẹ Ileleikristi kpobi họ re a wuhrẹ omọfa uzẹme na. (Mat. 28:19, 20) Kọ who bi ru obe uwuhrẹ Ebaibol jọ enẹna? Otẹ rrọ ere, kọ whọ sai duku oke nọ who re ro ru ofa evaọ omaa ẹkpako ra? Otẹrọnọ who bi ru obe uwuhrẹ enẹna ha, ababọ avro, whọ gwọlọ nọ who re ru obe uwuhrẹ jọ. Lẹ kẹ Jihova re ọ ghale omodawọ ra re who duku ohwo jọ nọ whọ rẹ sai wuhrẹ. Who ve ru lele elẹ eyena.—1 Jọn 5:14, 15.
13 Ma wo okwakwa okpokpọ nọ ma re ro mu ebe iwuhrẹ họ! Riẹ eware nọ e riẹe eva ziezi. Ghale iẹe te oria kpobi. Dawo ẹgba ra kpobi “re [who] ru ewoma re [who] fe eva iruo iwoma, eva efuafo avọ ọghọ-oruo” ẹkwoma oware nọ who wuhrẹ kpahe Ẹme Ọghẹnẹ nọ whọ rẹ ghale kẹ amọfa.—1 Tim. 6:18.
[Box on page 4]
UVẸ NỌ A RẸ RỌ GHALE OMOBE-OVẸVẸ NA
◼ Ẹmeọta ikẹdẹ kẹdẹ
◼ Okenọ ohwo ọ tẹ rehọ obe mai
◼ Nọ a gbe di uvumọ ohwo họ uwou hu
◼ Okenọ ma tẹ rrọ izihebro
◼ Okenọ ma te zere ohwo evaọ iyẹrẹ
◼ Okenọ ma te bi se-isẹri evaọ eria enu-iruo
◼ Okenọ ma tẹ be ta usiuwoma ọnyakuo
◼ Okenọ ma te bi kere ileta
◼ Okenọ ma tẹ rrọ omoto ofa
◼ Okenọ ohwo ọ tẹ ziọ uwou mai
◼ Okenọ ma tẹ be t’ẹme kugbe imoni mai, erivẹ, ibe-iruiruo, ibe-isukulu, gbe egbẹrioma efa