Rehọ Emebe-Evẹvẹ Muọ Ẹmeọta Họ
1 Kọ whọ gbẹ rọwo inọ emamọ isẹri nọ a rẹ kẹ o mae roma hwa owọ nọ whọ rẹ jẹ re who muọ ẹmeọta họ? Use-abọ na họ re whọ t’ẹme jọ nọ o re si ohwo na urru re ọ kpahe ẹme. Rekọ ẹvẹ a sai ro ru onana ziezi?
2 Iwhowho-uvie buobu a ruẹ no nnọ avọ umutho eme jọ nọ a nabe salọ ziezi, ẹkẹ emebe-evẹvẹ mai jọ nọ a kere no Ebaibol ze na o rẹ sai mu ẹmeọta họ. Izoẹme na i re siuru, yọ iwoho na i wo emamọ ekọlọ avọ ona nọ u re siuru. Omobe-ovẹvẹ u re fu ohwo enu hu, nọ o rẹ lẹliẹ ohwo na roro nọ evuẹ buobu e riẹ nọ a re se. Ghele na, evuẹ ekpẹkpẹe nọ e rọ emebe-evẹvẹ na e rẹ da ruọ oma yọ e rẹ sai su kpohọ uwuhrẹ Ebaibol.
3 Enẹ o jọ Osẹri jọ oma: “Evaọ akpọ ogigidi ọnana, ahwo a rẹ gwọlọ rehọ oke buobu kẹ isase he, rekọ emebe-evẹvẹ na e nwane rọ umumuo epanọ e rẹ rọ kẹ ovuẹ obọdẹ rekọ nọ i re fu ohwo enu hu. Me se emebe-evẹvẹ na buobu, uwhremu na mẹ tẹ rọ ere te riẹ uzẹme na.” Who rri ẹgba Ẹme Ọghẹnẹ nọ a ru vevẹ evaọ evuẹ ekpẹkpẹe enana nọ a kporo na vo ho.—Hib. 4:12; wawo Zekaraya 4:10; Jemis 3:4, 5.
4 Owọjẹ Elọlọhọ Ene: Ahwo buobu a reawere obokparọ no ẹkwoma eroruiruo umutho eme. (1) Dhesẹ emebe-evẹvẹ na jọ kẹ ohwo na re whọ nọe onọ o were riẹ. (2) Nọ ohwo na ọ tẹ rehọ ọvo jọ no, whọ vẹ nọ uvi onọ jọ nọ u duobọhọ ugogo ẹme jọ evaọ omobe-ovẹvẹ na. (3) Evaọ uyo rọkẹ onọ na, se edhe-ẹme nọ o fo hayo ikereakere jọ no omobe-ovẹvẹ na ze. (4) Ohwo na ọ tẹ riẹ ẹme kpahe, ta eme nọ e rọ omobe-ovẹvẹ na haro hayo riobọhọ uwuhrẹ jọ evaọ ibroshọ Gwọlọ na hayo uzoẹme jọ evaọ obe Eriariẹ na nọ o ta kpahe ẹme na viere. Evaọ edhere nana, whọ rẹ sai su ohwo na kpohọ uwuhrẹ Ebaibol. Ẹjiroro nọ e rọ obotọ na i ti fiobọhọ k’owhẹ ruẹrẹ oware nọ whọ rẹ ta kpahe emebe-evẹvẹ ene jọ.
5 Uzoẹme ọ omobe-ovẹvẹ na “Ono O Bi Ghine Su Akpọ Na?” yọ onọ isiuru:
◼ Otẹrọnọ ohwo nọ who bi lele t’ẹme na ọ kuyo onọ na nnọ “Ọghẹnẹ” hayo “mẹ riẹ hẹ,” se ihie-eme ivẹ ọsosuọ na evaọ ẹwẹ-obe avọ 2 gbe edhe-ẹme ọsosuọ evaọ ẹwẹ-obe avọ 3 na. Fielo họ 1 Jọn 5:19 gbe Eviavia 12:9. Makọ ohwo na ọ vro hayo ọ rọwo ẹrria Setan Ẹdhọ na hayo obọ nọ o wo evaọ esuo akpọ na, whọ rẹ sae t’ẹme kpahe iroro nọ e rọ otọ uzoẹme na “Imuẹro Eware Nọ Evia No Eyero Akpọ Ze” ro le ẹme na haro. Whọ tẹ ruẹ isiuru, vuẹe nọ whọ gwọlọ dhesẹ oria nọ Ẹdhọ o no ze kẹe, avọ obufihọ eme nọ e rọ ẹwẹ-obe avọ 3 gbe 4 ọrọ omobe-ovẹvẹ na.
6 Omobe-ovẹvẹ na “What Hope for Dead Loved Ones?” o sae kpare isiuru idudhe: Whọ rẹ sae kpare ẹmeọta ze ẹkwoma ẹnọ inọ:
◼ “Kọ who roro nọ ma te wariẹ ruẹ iyoyou mai nọ i whu no ẹdẹjọ?” Ohwo na ọ tẹ kpahe ẹme no, riobọ kpohọ edhe-ẹme avọ ivẹ evaọ ẹwẹ-obe avọ 4 ọrọ omobe-ovẹvẹ na je se Jọn 5:28, 29. Je ru ei vẹ nnọ u re fiobọhọ re ma wo otoriẹ “Uwhu, gbe Oware nọ O Rẹ Via Okenọ Ma te Whu,” onọ o rọ uzoẹme ọsosuọ evaọ omobe-ovẹvẹ na. Ta kẹe nọ wha gbẹ t’ẹme na haro.
7 Omobe-ovẹvẹ na “Reawere Uzuazọ Uviuwou” o rọ oware isiuru kẹ iviuwou akpọ-soso: Whọ rẹ sae rehọ iẹe ruiruo ta nnọ:
◼ “Ẹsejọhọ whọ te rọwo nnọ uviuwou o rọ otọ ẹbẹbẹ nẹnẹ. Eme who roro nọ a rẹ sai ru re a bọ ọgbakugbe uviuwou na ga?” Ohwo na ọ tẹ kuyo no, si ẹjiroro riẹ kpohọ igogo-eme nọ e rọ edhe-ẹme ọsosuọ evaọ ẹwẹ-obe avọ 6 na. Salọ ikereakere jọ nọ a fodẹ evaọ ẹwẹ-obe avọ 4 gbe 5 ọrọ omobe-ovẹvẹ na, je ru ei vẹ. Jẹ fodẹ nnọ rọwo kugbe ẹjiroro nọ omobe-ovẹvẹ na o kẹ na, whọ gwọlọ kẹe obe uwuhrẹ Ebaibol ọvọvẹ.
8 Omobe-ovẹvẹ na “Why You Can Trust the Bible” o sai ruiruo ẹkwoma ẹta eme nana:
◼ “Ahwo buobu a yo ikuigbe Keni avọ Ebẹle no, onọ o rọ obe ọsosuọ Ebaibol na. Ikuigbe nọ e rọ Emuhọ na e ta kpahe aye Keni re. Kọ who roro no ẹdẹjọ kpahe oria nọ aye riẹ na o no ze?” Rehọ edhe-ẹme urere nọ o rọ ẹwẹ-obe avọ 2 omobe-ovẹvẹ na kuyo na. Dhesẹ nnọ omobe-ovẹvẹ na o ta kpahe obọdẹ eme nọ Ebaibol na ọ ta kpahe oware nọ obaro mai u kru. Muhọ rono edhe-ẹme avọ esa evaọ ẹwẹ-obe avọ 5, ta ẹme na haro, jẹ rehọ ikereakere na ruiruo.
9 Ẹghale emebe-evẹvẹ Ebaibol yọ obọdẹ edhere nọ a rẹ rọ ta usiuwoma na. Fikinọ e rrọ kakao jẹ lọhọ ẹwha lele oma, whọ rẹ sae rehọ ae ruiruo ziezi evaọ iruẹru n’ẹthẹ ruẹthẹ na avọ isẹri ọnyakuo. Emebe-evẹvẹ na i wo emamọ obọ evaọ orugba odibọgba mai. Jọ u mu owhẹ ẹro nnọ whọ wha oghẹrẹ sa-sa buobu lele oma jẹ rehọ ae muọ ẹmeọta họ.—Kọl. 4:17.