Emebe-Evẹvẹ Ekpokpọ nọ A Ru Onaa Họ

1. Eme a ru obọdẹ onaa họ nọ ma be rọ ta usiuwoma?

¹ A jọ okokohọ ubrotọ ọrọ 2013 nọ uzoẹme riẹ o rrọ “Ẹme Ọghẹnẹ Họ Uzẹme” na siobọno emebe-evẹvẹ isoi. Ma te je wo Usi Uvie avọ 38 nọ uzoẹme riẹ o rrọ, “Kọ Ahwo nọ A Whu no A Sae Ginẹ Wariẹ Ziọ Uzuazọ?” A ru obọdẹ onaa họ emebe-evẹvẹ ezeza nana. Fikieme a ro ru ai ere? Nọ ma tẹ be rehọ ae kẹ ahwo evaọ usiuwoma, ẹvẹ ma sae rọ rehọ ae ruiruo ziezi?

2. Fikieme a ro ru onaa họ emebe-evẹvẹ na?

² Ẹjiroro nọ A ro Ru Onaa Họ Ae: Re ma sae ta usiuwoma na ziezi, ma re ru eware ene nana: (1) Ma rẹ nọ ohwo na onọ. (2) Se oria Ebaibol jọ. (3) Kẹ ohwo na obe nọ o re se. (4) Ma rẹ nọ onọ jọ fihọ otọ, je fi oke họ nọ ma re ro zihe. Emebe-evẹvẹ ekpokpọ nọ a ru onaa họ na i ti fi obọ họ kẹ omai ru eware ene nana.

3. Ẹvẹ ma sae rọ rehọ emebe-evẹvẹ na kẹ ohwo evaọ usiuwoma?

³ Oghẹrẹ nọ Ma rẹ rọ Rehọ Ae Kẹ Ahwo: (1) Nọ who te yere ohwo na no, who ve dhesẹ onọ nọ o rrọ uke omobe-ovẹvẹ na kẹe, whọ vẹ nọe re ọ ta onọ o roro. (2) Rovie kpohọ oria “Oware nọ Ebaibol na Ọ Ta” na. O tẹ lọhọ, jọ Ebaibol se oria Ikereakere nọ a fodẹ na. Otẹrọnọ ohwo na o wo oke, ta kpahe oria “Irere nọ I re Te Owhẹ” na. (3) Kẹ ohwo na omobe-ovẹvẹ na, whọ vẹ ta kẹe re o se eria nọ i kiọkọ kẹ omariẹ. (4) Re whọ tẹ te nyavrẹ, dhesẹ onọ nọ o rrọ otọ “Roro Kpahe Onọ Nana” nọ o rrọ uke omobe-ovẹvẹ na kẹe, kẹsena wha ve fi oke họ nọ who ti ro zihe ze te kẹ uyo onọ na.

4. Nọ ma te zihe bru ohwo, ẹvẹ ma sae rọ rehọ emebe-evẹvẹ ekpokpọ na ta ẹme kugbei?

⁴ Oware nọ who re ru nọ who te zihe bru ohwo na o bẹ hẹ. Rehọ eria Ebaibol nọ a fodẹ evaọ uke omobe-ovẹvẹ na rọ kẹ uyo onọ nọ whọ nọ kpahotọ na. Re whọ tẹ nyavrẹ, dhesẹ ifoto ibroshọ ọ Emamọ Usi nọ ọ rrọ uke omobe-ovẹvẹ na kẹ ohwo na, kẹsena whọ vẹ rehọ ibroshọ na lahwe je dhesẹ uwuhrẹ nọ o ta kpahe ẹme nọ wha ta na kẹe, whọ vẹ kẹe ibroshọ na. Ọ tẹ rehọ iẹe, wha ve fi oke họ nọ who re ro zihe re wha wuhrẹ ibroshọ na. Who te ru enẹ, yọ who mu uwuhrẹ-Ebaibol họ no. Hayo nọ wha tẹ ta kpahe omobe-ovẹvẹ ọsosuọ na no, whọ sae kẹe omobe-ovẹvẹ ọfa, wha ve fi oke họ nọ who re ro zihe re wha ta kpahe iẹe.

5. Ẹvẹ emebe-evẹvẹ i wo iruo te evaọ usiuwoma?

⁵ O vrẹ ikpe udhozeza gbe ikpe (130) no nọ ma be rọ rehọ emebe-evẹvẹ ta usiuwoma. Dede nọ oghẹrẹ nọ a ru rai o be hai nwene n’oke t’oke, i duobọte ahwo buobu no evaọ usiuwoma ota na. Jọ mai kpobi ma rehọ emebe-evẹvẹ nana nọ a ru onaa họ na rọ ta usiuwoma evaọ oria kpobi.—Itẹ 15:7a.