Epanọ Ma Sae rọ Rehọ Emebe-Evẹvẹ Mu Usi Uwoma Ota Họ

Anwọ Ọvo 2018 ze a bi ro fi iriruo usi uwoma ota họ uke Obe Ewuhrẹ Uzuazọ gbe Usi Uwoma Ota na. A be hae tuduhọ omai awọ nọ ma daoma ta usi uwoma kẹ ahwo viukpọ ebe nọ ma rẹ kẹ ae ọvo. Re iwhowho-uvie e sai nwene onaa usi uwoma ota rai, a be hae jọ ividio iriruo usi uwoma ota na dhesẹ epanọ ma sae rọ rehọ Ebaibol na mu usi uwoma ota họ. Kọ onana u dhesẹ nọ ma rẹ rọ ebe kẹ ahwo ho nọ ma tẹ rọ usi uwoma ota n’uwou ruọ uwou? Vievie! Wọhọ oriruo, a sae rọ emebe-evẹvẹ mai na mu usi uwoma ota họ lọlọhọ. Iriruo nọ e rrọ obotọ na e rẹ sai fiobọhọ kẹ omai rọ emebe-evẹvẹ na mu usi uwoma ota họ:

1. Nọ onọ nọ o rrọ uke omobe-ovẹvẹ na.

2. Kẹsena who ve dhesẹ uyo nọ Ebaibol na ọ kẹ nọ o rrọ obehru ẹwẹ-obe avọ ivẹ na kẹe. Otẹrọnọ oke o gbẹ riẹ, se jẹ ta kpahe eme nọ e rrọ obeva omobe-ovẹvẹ na.

3. Kẹ ohwo nọ whọ be ta usi uwoma kẹ na omobe-ovẹvẹ na jẹ vuẹe nọ ọ daoma se abọ nọ u kiọkọ na.

4. Taure whọ tẹ te nyavrẹ, dhesẹ oria “Roro Kpahe Onọ Nana” kẹe je ru ọruẹrẹfihotọ nọ who ti ro zihe nyae rehọ Ebaibol kuyo onọ na ẹdẹfa.

Nọ who te zihe, ta kpahe uyo na jẹ nọ onọ jọ fihotọ nọ wha te ta kpahe oke ofa. Whọ sae salọ onọ jọ evaọ oria evuẹ itanẹte mai hayo obe nọ a fodẹ evaọ uke omobe-ovẹvẹ na. Evaọ oke ofa, ta kpahe ibroshọ na Emamọ Usi nọ U No Obọ Ọghẹnẹ Ze! hayo obe ọfa nọ ma re ro wuhrẹ ahwo evaọ Ẹkpẹti Ekwakwa Ewuhrẹ na.