Epanọ A rẹ Rehọ Iriruo Usi Uwoma Ota na Ro Ruiruo

Anwọ amara Ọvo 2018 ze ma be hae jọ uke Obe Ewuhrẹ Uzuazọ Oleleikristi gbe Usi Uwoma Ota Mai na ruẹ iriruo usi uwoma ota. Oghẹrẹ vẹ a sae rọ rehọ ai ruiruo?

Nọ Who te bi Ru Ẹme nọ Ọmọ-Isukulu O re Ru Evaọ Obọ Ewuhrẹ: U fo nọ whọ rehọ onọ, oria ikere, gbe ẹme nọ a rẹ ta jẹhọ nọ o rrọ oriruo usi uwoma ota na ro ru ẹme ra na. Ghele na, orọnikọ eme ividio oriruo usi uwoma ota na dẹẹ who re rri ro ru ẹme ra ha. Whọ sae rehọ oghẹrẹ ọfa ro ru ẹme ra na. Wọhọ oriruo, whọ sae rehọ oghẹrẹ ẹkeria-ẹmeọta ọfa, eme emuhọ ọfa, hayo nọ oghẹrẹ enọ efa dede. Whọ sae jẹ kẹ ohwo na obe jọ evaọ Ẹkpẹti Ekwakwa Ewuhrẹ mai na, o tẹ make rọnọ a ta nọ who ru ere evaọ ẹme ra na ha.

Nọ Whọ tẹ Rrọ Usi Uwoma Ota: A ru iriruo usi uwoma ota na re i fiobọhọ kẹ omai riẹ ẹme nọ ma rẹ ta. Otẹrọnọ ohwo jọ o dhesẹ isiuru, whọ sae rehọ eme oriruo ozihebro na gbẹ ta ẹme na haro. Yọ whọ sai nwene oriruo usi uwoma ota na hayo ta kpahe oware ofa. Otẹrọnọ uzoẹme amara jọ nọ o vrẹ hayo oria ikere ọfa jọ o rẹ mai si ahwo ẹkwotọ ra urru, whọ sae rehọ iẹe ta usi uwoma. Kọ o rẹ mae were ahwo nọ a rrọ ẹkwotọ ra re a ta kpahe usi eware nọ e via? Whọ sae rehọ iriruo usi uwoma ota na ta usi uwoma evaọ idhere sa-sa. Rekọ woi họ iroro inọ who re “ru eware kpobi fiki usi uwoma na, re [whọ] sai whowho iei kẹ amọfa.”​—1Kọ 9:22, 23.