Rehọ iẹe Ruiruo Evaọ Oke Kpobi
1. Eme ma rẹ sae rehọ omobe-ovẹvẹ ọ Riẹ Uzẹme Na ru?
1 A ru omobe-ovẹvẹ na Kọ Whọ Gwọlọ Riẹ Uzẹme Na? re ma sae rehọ iẹe to ebe-iwuhrẹ Ebaibol họ. Ma rẹ sae jẹ rehọ iẹe vaha ibi uzẹme na fihọ eria sa-sa. (Ọtausi. 11:6) Ithubro jọ nọ i re fi obọ họ kẹ omai ru onana e rrọ obotọ na.
2. Ẹvẹ ma sae rọ rehọ omobe-ovẹvẹ na mu ẹmeọta họ?
2 Ma Sae Rehọ iẹe Mu Ẹmeọta Họ: Whọ sae rehọ iẹe kẹ ohwo nọ whọ nyaku, who ve dhesẹ enọ ezeza nọ e rrọ uke riẹ na kẹe jẹ nọe nọ: “Onọ vẹ evaọ usu enana who roro kpahe no?” Ọ tẹ kpahe ẹme no, whọ vẹ jọ omobe na dhesẹ epanọ Ebaibol ọ rọ kuyo onọ ohwo na jọ, je se oria ikere ọvo jọ nọ a jariẹ fodẹ. Se hayo ta kpẹkpẹe kpahe eme nọ e rrọ obemu omobe-ovẹvẹ na, je fi obe ọ Ebaibol Wuhrẹ na họ ada kẹe. Ọ gbẹ make rehọ obe na ha, omobe-ovẹvẹ na o sai fi obọ họ ru uzẹme na tei udu.—Mat. 13:23.
3. Nọ ohwo o gbe wo uvẹ hẹ, eme ma rẹ sai ru?
3 Nọ Ohwo na O Gbe Wo Uvẹ Hẹ: Whọ sae ta nọ: “Nọ orọnọ who wo uvẹ hẹ na, mẹ gwọlọ nyasiọ omobe-ovẹvẹ nana ba kẹ owhẹ. Ugogo enọ ezeza jọ nọ mai ibuobu e be nọ e riẹe eva, a tẹ jẹ jariẹ kẹ uyo rai vevẹ no Ebaibol na ze. Nọ me te zihe ze ẹdẹfa, mẹ te gwọlọ riẹ oware nọ who roro kpahe ae.”
4. Eme ma rẹ sae ta nọ ma te bi fi omobe-ovẹvẹ na họ ada?
4 Whọ tẹ be Jọ Iyẹrẹ Ta Usiuwoma: Who te yere ohwo na no, whọ sae ta nọ: “Kọ whọ nọ onọ jọ evaọ usu enọ nana no ẹdẹjọ? [Kuvẹ kẹ uyo.] Omobe-ovẹvẹ nana o kẹ iyo ivevẹ nọ e rẹ veva no Ebaibol na ze.” Ohwo na o gbe bi ru ugidi hi, whọ sae ta kpahe onọ ọvo jọ no omobe-ovẹvẹ na ze je tube fi obe ọ Ebaibol Wuhrẹ na họ ada kẹe.
5. Ẹvẹ ma sae rọ rehọ omobe-ovẹvẹ na ruiruo ẹsejọ evaọ iwou nọ a di ahwo họ họ?
5 Ahwo nọ A Di Họ Uwou Hu: Evaọ eria jọ, iwhowho-uvie a rẹ nyasiọ ebe ba iwou nọ a di ahwo họ họ evaọ oghẹrẹ nọ amọfa a rẹ rọ ruẹ ebe na ha. Otẹrọnọ wha wo ọruẹrẹfihotọ yena evaọ ukoko rai, kọ wha gbẹ hae nyasiọ omobe-ovẹvẹ ọ Riẹ Uzẹme Na ba ẹsejọ? Nọ who te zihe, whọ sae ta nọ: “Kẹle na nọ ma nyaze, ma di owhẹ họ uwou hu, ma tẹ nyasiọ omobe-ovẹvẹ nana ba unuẹthẹ ra. Enọ vẹ evaọ usu enana whọ gwọlọ nọ ma kẹ uyo rai?”
6. Eme u ru omobe-ovẹvẹ ọ Riẹ Uzẹme Na rrọ obọdẹ obe nọ ma rẹ rọ ta usiuwoma?
6 A jọ omobe-ovẹvẹ ọ Riẹ Uzẹme Na dhesẹ uzẹme Ebaibol na lọlọhọ vevẹ. O rẹ sae were oghẹrẹ ahwo kpobi. A rẹ sae rehọ iẹe kẹ ahwo lọlọhọ; makọ emaha gbe iwhowho-uvie ekpokpọ a sai fi ei họ ada. Kọ whọ be rehọ iẹe ruiruo evaọ oke kpobi nọ u kiehọ?