Usi-Uwhowho Obọdẹ Orọ Omobe-Ovẹvẹ, No January 19 Rite February 15, 2009!
1 Muhọ no Ẹdọvo-Oka, January 19, rite February 15, 2009, ma te ghale omobe-ovẹvẹ okpokpọ nọ u wo uzoẹme na Kọ Whọ Gwọlọ Riẹ Uzẹme Na? Ma bi rẹro inọ usi-uwhowho obọdẹ nana nọ a te jọ akpọ-soso ru na o te lẹliẹ ahwo buobu wo isiuru kpahe Ẹme Ọghẹnẹ, Ebaibol na.—Jọn 17:17.
2 Omobe-ovẹvẹ na o kẹ iyo enọ ezeza jọ nọ i wuzou rono Ebaibol na ze vevẹ: “Kọ Ọghẹnẹ ọ be ginẹ daezọ mai?” “Kọ ẹmo gbe uye-oruẹ i ti kuhọ ẹdẹjọ?” “Eme ọ rẹ via k’omai nọ ma te whu?” “Kọ ẹruore jọ ọ rrọ kẹ ahwo nọ a whu no?” “Ẹvẹ mẹ sae rọ lẹ nọ Ọghẹnẹ o je yo olẹ mẹ?” gbe “Ẹvẹ mẹ sai ro wo evawere evaọ uzuazọ?” Ichọche Kristẹndọm a re sae kẹ igogo iyo enọ nana ha. Makọ ibuobu ahwo jọ nọ e rrọ Ileleikristi hi a nọ enọ itieye na no dede, rekọ o sae jọnọ a riẹ hẹ inọ a rẹ sae jọ Ebaibol na duku iyo egbagba kpahe enọ yena. Fikiere, ma bi rẹro inọ ovuẹ nọ o rrọ omobe-ovẹvẹ nana o te were ahwo buobu.
3 Wha Ru Ẹkwotọ Rai Re: Wha daoma ghale omobe-ovẹvẹ na te iwou kpobi nọ e rrọ ẹkwotọ rai. Otẹrọnọ ẹkwotọ rai ọ rẹ ruaro, ekpako na a sae ta kẹ owhai re wha nyase omobe-ovẹvẹ na jọ ba iwou nọ wha di ahwo họ họ evaọ iweze ọsosuọ. Kareghẹhọ re whọ rehọ ọvo jọ kẹ ahwo nọ wha gbẹ rọ okegbe, imoni ra, ibe iruiruo hayo ibe emọ-isukulu ra, gbe amọfa nọ who re lele tẹme ẹsikpobi. Whọ sae jẹ m’oma enẹna re who ru ọkobaro obufihọ evaọ amara January hayo February 2009. Kọ who wo ọmọ hayo ọmọ-uwuhrẹ Ebaibol nọ o bi wo ẹnyaharo abọ-ẹzi, nọ ọ rẹ sai te owhowho-uvie nọ ọ re họ-ame he, re o kuomagbe omai evaọ usi-uwhowho nana? Otẹrọnọ ọjọ ọ riẹ, vuẹ ekpako na.
4 Ẹme nọ Whọ rẹ Ta: Re whọ sae wha ovuẹ na te ahwo buobu oma, o rẹ mai woma re whọ ta ẹme na kpẹkpẹe. Nọ ohwo nọ whọ be rehọ iẹe kẹ na onọ jọ evaọ usu enọ ezeza nọ e rrọ uke omobe-ovẹvẹ na, who ve dhesẹ oria nọ uyo na o rrọ evaọ omobe na kẹe. Onana u ti fiobọhọ kẹ iwhowho-uvie kpobi nọ a sai ro nwene ẹme rai lele uyero ahwo ẹkwotọ rai. Nọ ohwo jọ o te dhesẹ isiuru, kere odẹ riẹ fihọ obe re who je zihe bru ei oke-ofa. Evaọ urere-oka, whọ rẹ sai ku omobe-ovẹvẹ na kugbe emagazini fihọ ada. Nọ usi-uwhowho na u te kuhọ no evaọ February 15, ma ti fi obe ọ Si Kẹle Jihova na họ ada. Wha rẹ rehọ omobe-ovẹvẹ okpokpọ nana nọ u kiọkọ kpobi ro ruiruo wọhọ emebe-evẹvẹ efa.
5 To Obe-Uwuhrẹ Ebaibol Họ: Ẹjiroro nọ a mai ro kere omobe-ovẹvẹ nana họ re u fiobọhọ kẹ omai to ebe-iwuhrẹ Ebaibol họ. Nọ who te zihe bru ohwo nọ o dhesẹ isiuru, whọ sae nọe inọ, uwuhrẹ Ebaibol jọ vẹ evaọ enọ e rrọ omobe nana o kẹ riẹ omosasọ? Dhesẹ uke obemu omobe-ovẹvẹ na nọ a jọ ta kpahe ọruẹrẹfihotọ obe-uwuhrẹ Ebaibol kẹ ohwo na, whọ vẹ rehọ obe ọ Ebaibol Wuhrẹ na jọ kẹe. O tẹ lọhọ, rehọ omoke jọ se edhe-ẹme ọvo hayo ivẹ rono otọ uzoẹme nọ o ta ẹme ziezi kpahe ẹme nọ ọ salọ na ze.
6 Enọ e rẹ rehọ “ẹzi gbe uzẹme” rọ gọe họ ahwo nọ Jihova ọ be gwọlọ. (Jọn 4:23) Jọ omai kpobi ma wobọ evaọ usi-uwhowho obọdẹ nana re ma rọ ere fiobọhọ kẹ amọfa te riẹ uzẹme na!