Ghale Usi Uvie ọrọ Avọ 35 na Kẹkẹre
1 October gbe November e te jọ emerae iruo buobu k’omai kpobi. Evaọ etoke edẹ 11 ọsosuọ erọ October na, ma ti ru ahwo vi Awake! hayo Uwou-Eroro Na hayo emagazini ivẹ na. Kẹsena, no umuo Ẹdoka, October 12, rite Ẹdoka, November 16, ma ti kuomagbe evaọ akpọ na soso ghale Usi Uvie ọrọ Avọ 35 na. O te jọ ọghọ mai re ma rehọ ovuẹ nọ u w’uzou ro se ahwo kpobi evaọ okogho mai. Oye họ uyo kẹ onọ na, “Kọ Ẹdẹjọ Ọ te jọ nọ Ahwo Kpobi A ti ro You Ohwohwo?” Evaọ etoke usi ovravra obọdẹ onana, ma te ghale Usi Uvie ọrọ Avọ 35 na evaọ edẹ-oka. Evaọ urere-oka, fiba ẹghale Usi Uvie na, ma ti ru ahwo vi emagazini ọ Uwou-Eroro gbe Awake! Oria nọ a jọ rọwo vi hi, ma sai fi emagazini ọvuọvo họ ada.
2 Ono Ọ Sai Wo Obọ? Wọhọ epaọ anwẹdẹ, ekpako na a te k’obaro evaọ iruo na. Ohwo kpobi ọ rẹ reawere ẹghale Usi Uvie na, yọ ababọ avro iwhowho-uvie buobu gbidigbidi a ti fi odẹ h’otọ wọhọ ekobaro ubroke evaọ etoke amara hayo emerae ivẹ ọ usi-ovravra na. Iwhowho-uvie efa a te gwọlọ raha oke buobu evaọ odibọgba vi epaọ ọsosuọ.
3 Kọ who wo ọmọ-uwuhrẹ Ebaibol nọ ọ nya thabọ no evaọ uwuhrẹ obe ọ Eriariẹ na ọnọ o ti te kẹ usiuwoma ota kẹle? Ẹsejọhọ evaọ umutho oke, ọ sae jọ owhowho-uvie nọ ọ te họ-ame he re o wo abọ evaọ usi-ovravra ọ Usi Uvie na. Ẹme ọlọlọhọ ọvo o gwọlọ re a sai dhesẹ omobe-ovẹvẹ na. Wọhọ oriruo, ohwo ọ sae ta nọ: “Ovuẹ onana u w’uzou te epanọ a be rọ jọ akpọ na soso ghale iẹe evaọ evẹrẹ 169. Mẹ gwọlọ re who wo orọ obọ ra.” Makọ emaha dede a rẹ sai wo abọ ziezi evaọ iruo evawere ọnana.
4 Iwuhrẹ ọ obe ukoko na a rẹ tudu họ ahwo nọ a rọ utu rai kpobi awọ re a wo abọ evaọ ẹghale Usi Uvie ọrọ Avọ 35 na. Iwhowho-uvie nọ i dhẹmu no nọ e rẹ sae wariẹ jaja vi evaọ iruo na a sae jariẹ re otẹrọnọ a kẹ rai uduotahawọ. Re etoke usi-ovravra na u te te, ekpako na a re weze bru omomọvo enana re a ruẹ oware nọ a sai ru ro fiobọhọ kẹ ae re a lele iwhowho-uvie nọ i wo ona evaọ abọ odibọgba ọnana.
5 Okevẹ Ma Sai ro Kokohọ kẹ Usiuwoma Ota? Iruẹru enana kpobi e gwọlọ ọruẹrẹfihotọ kẹ isẹri-ise ọ utu nọ i re kiehọ-oma je w’iruo. Oria kpobi nọ o jọ lọhọ, a rẹ m’oma ọ omakugbe kẹ usiuwoma ota rọ kẹ edẹ-oka na kpobi, evaọ urere-oka na, gbe evaọ owọwọ. A re ru ai evaọ oke nọ u re fiobọhọ kẹ iwhowho-uvie gbe ekobaro rehọ uvẹ etoke isẹri-ise ruiruo vọvọ. A rẹ sai je ru eruẹrẹfihotọ re a kokohọ evaọ akọ-owọwọ rọ kẹ erere ọ emọ isukulu, iruiruo nọ i re nwene oke, gbe amọfa. Ọsẹro iruo usiuwoma ota ọ rẹ ruẹ nọ ẹkwotọ buobu e riẹ rọkẹ usiuwoma ọ n’uwou ruọ uwou gbe ọrọ oria akiruo re ohwo kpobi ọ sai wo abọ vọvọ evaọ iruo na. Oria nọ iwhowho-uvie e rọ buobu, a re dhesẹ areghẹ kpahe unu ọ ahwo nọ a re ruiruo evaọ ẹkwotọ kpobi.
6 Kọ Ẹvẹ Kpahe Ahwo nọ A Dihọ Uwou Ho? Ma gwọlọ nọ ma rẹ r’unu mai t’ẹme kẹ enọ i wo iwou te epanọ o rẹ lọhọ te kpobi re ma dhesẹ oware nọ u je fo nọ a re se Usi Uvie ọrọ Avọ 35 na. Fikiere otẹrọnọ ohwo ọvo ọ rọ uwou evaọ okenọ whọ rọ nya ha, kere adrẹse na re whọ wariẹ zihe evaọ etoke ọfa evaọ ẹdẹ ọfa. Otẹrọnọ evaọ oka urere usi-ovravra na whọ te nya ku enọ i wo iwou enana ghele he, whọ sae nya siọ Usi Uvie ọvo jọ ba unuẹthẹ evaọ oria nọ ahwo nọ a be nya vrẹ a rẹ jọ rue riẹ hẹ. Evaọ oria iwou nọ a rẹ rria, jaja aro vi re whọ rọ Usi Uvie na rọ kẹ ahwo nọ a rẹ nya evaọ iyẹrẹ na. Nọ who te bi ruiruo evaọ oria nọ u rovie aro ho gbe oria nọ ekwotọ nọ a re ru evaọ etoke usi-ovravra na e jẹ rọ buobu, a rẹ sae nya siọ Usi Uvie jọ ba kẹ ahwo nọ e rọ uwou ho evaọ iweze ọsosuọ na.
7 Eme họ Ẹjiroro Mai? Ikoko a rẹ daoma re a rehọ Usi Uvie nọ a vi sai kpobi na ro ru ẹkwotọ rai re no taure usi-ovravra na u te ti kuhọ evaọ November 16. Otẹrọnọ ẹkwotọ ukoko nọ a ghale k’owhẹ ọ rẹ ruaro, yọ o rọ ababọ imuozọ re whẹ ọvo whọ nya usu viukpọ ọrivẹ, o sai kiehọ k’owhẹ re who ru ere. Onana u ti fiobọhọ k’owhẹ re whọ rọ emamọ usi na nya te ahwo buobu oma. (Mat. 10:11) O rẹ sai wo erere re who kru umutho emebe-evẹvẹ jọ họ obọ je fiọ Ebaibol họ ẹkpa-ewu hayo ẹkpa-usiobọ ra, viukpenọ whọ rẹ wha ẹkpa ologbo. Ruẹ nọ who kere odẹ ahwo nọ a dhesẹ isiuru fihọ otọ ziezi.
8 Kọ Whọ Ruẹrẹ Oma Kpahe no re Who Muhọ? Ekpako na a re roro unu emagazini efa nọ ukoko na a rẹ te gwọlọ a vẹ rehọ ere vi. U du fo nọ a re vi Usi Uvie ọrọ Avọ 35 ho, keme a ti vi ai se ikoko kpobi. Ekobaro obọdẹ, oke-kpobi, gbe erọ obufihọ, omomọvo o ti wo 60 nọ a rẹ ghale, yọ iwhowho-uvie ukoko omomọvo o ti wo 20. Ma ghale iruo mai k’oma mai no. Kọ o r’owhẹ oja re who wo abọ evaọ iruo isiuru enana? Ababọ avro o rọ ere. Joma rehọ ẹghale nọ ọ mae kẹre kpobi kẹ ovuẹ ọghaghae Ebaibol nọ o rọ Usi Uvie Avọ 35 na!