Usi-Uwhowho Obọdẹ February 19–March 18!
1 “Ekuhọ Egagọ Erue Ọ Kẹlino!” Oyehọ uzoẹme Usi Uvie Avọ 37 nọ a be ghale wariẹ akpọ na soso họ. Evaọ emuhọ amara February, ma ti fi obe ọ Si Kẹle Jihova na họ ada. Muhọ no Ẹdọvo-Oka, February 19, rite Ẹdoka, March 18, ma ti wobọ evaọ ẹghale Usi Uvie Avọ 37 kẹ ahwo kpobi. Evaọ urere-eka erọ etoke usi-uwhowho na, ma ti fi omobe-ovẹvẹ na họ ada kugbe emagazini.
2 Ahwo no A rẹ Sae Jọ Ewhowho na Wobọ: Ohwo kpobi nọ ọ rrọ owhowho-uvie ọ rẹ sae jọ ewhowho na wobọ vọvọ. Otujọ a te gwọlọ rehọ ọkobaro ubroke. Kọ who wo emọ hayo emọ-uwuhrẹ Ebaibol nọ i bi wo ẹnyaharo abọ-ẹzi? Fiobọhọ kẹ ae ta kẹ ekpako na sọ a te iwhowho-uvie nọ e re họ-ame he. Ekpako na a rẹ nya bru ahwo nọ a se usiuwoma ota ba no re a tuduhọ ae awọ re a wobọ evaọ usi-uwhowho obọdẹ na, a sai lele iwhowho-uvie nọ i wo ona ziezi nya-usu.
3 Ma bi vi Usi Uvie Avọ 37 buobu se ikoko kpobi re iwhowho-uvie gbe ekobaro a sai wo 50 o tẹ kawo. A sae rehọ isoi kẹ ahwo nọ a bi kuomagbe ukoko na nọ e re te jọ iwhowho-uvie he re a ghale kẹ ahwo uviuwou gbe egbẹnyusu rai. Jọ ahwo kpobi a kele unu nọ a fihọ ada re a kere unu na họ obemu obe iyẹrẹ-enẹ rai eva urere amara February avọ March. Okere-obe na o ti kele unu nọ ukoko na soso u fihọ ada kugbe o ve vi unu na se uwou-ogha eva urere amara ọvuọvo. A sae rehọ Usi Uvie na nọ i kiọkọ kpobi ro ruiruo evaọ kabọ kabọ odibọgba na nọ usi-uwhowho na u te kuhọ no.
4 Oware nọ Whọ rẹ Ta: Ta eme ra kpẹkpẹe, keme u ti ru nọ whọ te sae rọ nyate eria buobu. Whọ sae ta nọ: “Ma be ghale omobe-ovẹvẹ jọ nọ u wo ovuẹ nọ u wuzou kẹ ahwo kpobi wariẹ akpọ na họ. Miomẹ ẹkẹra. Iviena sei.” Muẹrohọ nọ who kere odẹ ahwo nọ a dhesẹ isiuru fihọ obe.
5 Epanọ Wha Sai ro Ru Ẹkwotọ Rai Re: Ukpenọ wha rẹ ghale Usi Uvie na evaọ usiuwoma iyẹrẹ, wha tẹrovi epanọ wha rẹ rọ jọ usiuwoma ota nuwou ruọ uwou gbe eria ekiọthuọ ru onana. Kere eria nọ who jo diọ ahwo họ uwou ha họ obe, jẹ daoma zihe evaọ oghẹrẹ oke sa hayo ẹdẹ ọfa ọrọ ẹkpoka na. No umuọ Monday, March 12 vrẹ, ma sae nyasiọ ọvo jọ ba uwou nọ ma diọ ahwo họ họ. Rekọ, otẹrọnọ ukoko na u wo ẹkwotọ nọ a rẹ sai ru re he evaọ etoke nọ a fihọ na, ekpako na a sae jiroro inọ a rẹ nyase Usi Uvie na ọvo ba uwou nọ a diọ ahwo họ họ evaọ etoke usi-uwhowho na soso.
6 Ọraha “Babilọn Ologbo” na o bi sikẹle kpata kpata. U fo nọ ahwo a dhẹ siẹ e ba taure a tẹ te raha iẹe no riẹriẹriẹ. (Evia. 14:8; 18:8) Ma omaa enẹna re who wo obọ vọvọ evaọ usi-uwhowho akpọ-soso nana nọ ma jẹ be j’ahwo kpobi riẹ nọ ekuhọ egagọ erue ọ kẹlino na!