Ma te Ghale Usi Uvie avọ 38 na Kẹ Ahwo Evaọ January
1. Didi enọ ahwo a rẹ nọ kpahe ahwo nọ i whu no, kọ ẹvẹ ma te rọ kiyo enọ nana evaọ January?
1 Makọ oware nọ ohwo ọ rọwo kẹhẹ, uwhu yọ ọwegrẹ ohwo kpobi. (1 Kọr. 15:26) Ahwo buobu a rẹ nọ inọ: Bovẹ ahwo nọ a whu no na a rrọ? Kọ ma te wariẹ ruẹ e rai ẹdẹjọ? Fikiere, evaọ amara soso, ikoko nọ e rrọ akpọ na kpobi a te rehọ Usi Uvie avọ 38 na kẹ ahwo. Uzoẹme riẹ họ, “Kọ Ahwo nọ A Whu no A Sae Ginẹ Wariẹ Ziọ Uzuazọ?” Ma ti mu omobe nana họ ẹghale evaọ January 1. Nọ ma tẹ ghale Usi Uvie avọ 38 na no evaọ amara yena, ma ve ti mu ei họ ẹrọkẹ ahwo epanọ ma be hae rehọ ebe evẹvẹ edekọ kẹ ahwo na.
2. Ẹvẹ a ru Usi Uvie avọ 38 na?
2 Oghẹrẹ nọ A Ru Rie: A ru Usi Uvie avọ 38 na evaọ oghẹrẹ nọ a sai ro kpiri iei re uzoẹme na o jọ obaro riẹ, whọ vẹ jẹ ruẹ eme nana: “Kọ whọ te ta nọ . . . Ee? ijo? mẹ sae ta gbiae he?” Nọ ohwo o te rovie Usi Uvie na, ọ rẹ ruẹ uyo nọ Ebaibol na ọ kẹ kpahe uzoẹme na gbe epanọ eyaa nọ e rrọ Ebaibol na e sai ro fi obọ họ kẹe. Ọ te jẹ ruẹ oware nọ ọ sai ro fievahọ ẹme nọ Ebaibol na ọ ta. Obọdẹ onọ jọ o rrọ uke Usi Uvie na nọ u ti fi obọ họ kẹ ohwo na gwọlọ wuhrẹ haro.
3. Ẹvẹ ma te rọ ghale Usi Uvie avọ 38 na?
3 Oghẹrẹ nọ Ma te rọ Ghale iẹe: Oghẹrẹ nọ ma be hae rọ ghale ebe-uzizie Ekareghẹhọ Emu Owọwọ gbe erọ okokohọ ubrotọ na ma te rọ ghale omobe nana. Ekpako ukoko a re dhesẹ epanọ a te rọ ghale iẹe evaọ ẹkwotọ rai lele ithubro nọ e rrọ ileta ọ April 1, 2013 na. Ikoko nọ ẹkwotọ rai ọ rro tere he a sae ta kẹ ikoko efa nọ e kẹle rai sọ a sai lele ai ru ẹkwotọ rai. Nọ whọ tẹ be rehọ Usi Uvie avọ 38 na, enọ whọ rẹ sae ghale re evaọ ẹkpoka whọ rẹ rehọ. Evaọ amara nọ ma te ghale omobe na, nọ wha tẹ ghale iẹe n’uwou ruọ uwou no, wha rẹ sae ghale iẹe evaọ usiuwoma ota ẹgbede re. Otẹrọnọ wha ghale erọ ukoko rai re no taure amara na o te ti re, wha vẹ kẹ ahwo ebe nọ wha te rọ kẹ ahwo evaọ amara nọ ọ kẹle riẹ. Evaọ Ẹdẹ-Ọmaha ọsosuọ amara yena, omobe na ma te rọ kẹ ahwo viukpenọ ma re mu ebe-iwuhrẹ Ebaibol họ. Evaọ Ẹdẹ-Ọmaha gbe Ẹdoka, ma sai fi emagazini ba omobe na rọ kẹ ahwo. Kọ who mu oma họ ẹruẹrẹ kpahe no re who w’obọ ziezi evaọ ẹghale omobe nana?