Obọdẹ Uzizie Jọ
1. Oke vẹ ma ti ro zizie ahwo kẹ okokohọ na?
1 Dae rehọ iẹe nọ whọ gwọlọ there obọdẹ emu jọ kẹ egbẹnyusu hayo ahwo uviuwou ra nọ o te rehọ oke gbe ugho mi owhẹ. Ababọ avro, whọ te rọ ọwhọ zizie ahwo na re a nyaze te re emu na. Epọvo na re, o rehọ omodawọ gaga re a ruẹrẹ eware nọ ma te reawere rai evaọ ikokohọ ubrotọ gbe erọ akpọ-soso nọ a ti ru evaọ ukpe 2014 na họ. Eka esa taure oke okokohọ mai o te ti te, ma ti zizie ahwo re a lele omai nya. Eme o ti fiobọhọ kẹ omai rọ ọwhọ zizie ahwo?
2. Eme ọ te wọ omai rọ ọwhọ zizie ahwo?
2 Nọ ma te roro kpahe irere nọ mai omomọvo o bi wo no eme ezi nọ Jihova o bi ro wuhrẹ omai evaọ ikokohọ ubrotọ ze, ma te rọ ọwhọ zizie ahwo ziọ okokohọ na. (Aiz. 65:13, 14) U fo nọ ma rẹ kareghẹhọ re inọ emamọ iyẹrẹ e be hai no uzizie na ze kukpe kukpe. Ahwo jọ nọ ma zizie a te ziọ okokohọ na. Te a nyaze te a nyaze he, omodawọ mai nọ ma ro zizie ai o te wha ajiri se Jihova je dhesẹ vevẹ nọ Jihova ọ rẹ kẹ okẹ.—Ol. 145:3, 7; Evia. 22:17.
3. Ẹvẹ ma te rọ ghale obe-uzizie na?
3 Ekpako ukoko a rẹ jiroro oghẹrẹ nọ ukoko rai o te rọ rehọ obe-uzizie na kẹ ahwo ẹkwotọ rai, sọ a rẹ sae jẹ nyase iẹe ba kẹ ahwo nọ a dihọ uwou hu hayo rehọ iẹe kẹ ahwo evaọ usiuwoma ota ẹgbede. Nọ a tẹ be ghale obe-uzizie na evaọ Ẹdẹ-Ọmaha gbe Ẹdoka, a rẹ sai ku emagazini gbei rọ kẹ ahwo. Otẹrọnọ Ẹdẹ-Ọmaha ọsosuọ amara na u kie fihọ etoke uzizie na, ẹghale obe-uzizie na wha rẹ mae tẹrovi viukpọ obe-uwuhrẹ Ebaibol nọ wha re muhọ. Nọ etoke uzizie na u te kuhọ no, eva e te were omai gaga inọ ma rọ ọwhọ zizie ahwo buobu re a kuomagbe omai re emu nọ Jihova ọ ruẹrẹhọ kẹ omai na.