Uzizie Ekareghẹhọ na U ti Muhọ Evaọ Edẹ 22 Asa

Ukpe nana, ma ti mu ahwo họ ezizie kẹ Ekareghẹhọ na evaọ Ẹdẹ-Ọmaha, edẹ 22 Asa. Ma tuduhọ ohwo kpobi awọ re o w’obọ ziezi. Nọ ma tẹ be kẹ ahwo obe-uzizie na evaọ Ẹdẹ-Ọmaha gbe Ẹdoka, ma sae kẹ ae emagazini amara yena re. Evaọ Ẹdẹ-Ọmaha ọsosuọ Ane, obe-uzizie na ọvo ma te ghale ukpenọ ma re mu ebe-iwuhrẹ họ. Rekọ, otẹrọnọ ma ruẹ ohwo nọ o dhesẹ obọdẹ isiuru, ma sai mu obe-uwuhrẹ họ kugbei. Ọsẹro usiuwoma ota na ọ rẹ sai rri sọ o gwọlọ nọ a rẹ rọ obe-uzizie na kẹ ahwo evaọ usiuwoma ota ẹgbede re a sai te ahwo buobu oma evaọ ẹkwotọ na. Jọ oke nana kere edẹ ahwo nọ whọ gwọlọ zizie fihotọ, wọhọ imoni ra, ahwo nọ wha gbẹ rrọ iruo, ibe emọ isukulu ra, gbe izihebro ra, whọ vẹ kẹ ae obe-uzizie na nọ ma te mu ei họ ẹghale no. Ma rẹro nọ ahwo buobu a te nyaze Ekareghẹhọ na nọ ma te jọ ruẹ oghẹrẹ nọ Jihova avọ Jesu a ro dhesẹ uyoyou ulogbo kẹ omai.—Jọn 3:16; 15:13.