Uzizie Ekareghẹhọ na U ti Muhọ Evaọ March 17
1. Uzizie vẹ u ti muhọ evaọ March 17?
1 Eruo Ekareghẹhọ na kukpe kukpe yọ edhere nọ ma rẹ rọ ta kẹ amọfa kpahe uwhu Jesu. (1 Kọr. 11:26) Fikiere, ma gwọlọ nọ amọfa a jariẹ re a yo kpahe ẹtanigbo nọ Jihova o ru lọhọ na. (Jọn 3:16) Enukpe nana, uzizie na u ti muhọ evaọ March 17. Kọ who bi rẹro epanọ who ti ro wobọ ziezi evaọ uzizie na?
2. Ma tẹ be kẹ ohwo obe-uzizie na, eme ma rẹ sae ta?
2 Eme Ma rẹ Sae Ta: O rẹ mai woma re ma ta umutho ẹme. Who te yere ohwo na no, whọ sae ta nọ: “Mẹ nyaze ti zizie owhẹ avọ uviuwou ra kẹ ekareghẹhọ uwhu Jesu nọ ma ti ru evaọ April 5. A te kẹ ovuẹ jọ no Ebaibol ze nọ a te jọ ta kpahe oware nọ uwhu Jesu u ru lọhọ gbe iruo nọ Jesu o bi ru enẹna.” Kẹe obe-uzizie na re whọ jariẹ dhesẹ oria nọ wha kere oke gbe oria nọ a ti jo ru Ekareghẹhọ na họ kẹe. Nọ ma tẹ be ghale ebe-uzizie na evaọ Ẹdẹ-Ọmaha gbe Ẹdoka, ma rẹ sai je fi emagazini họ ada.
3. Ẹvẹ ma sai ro zizie ahwo buobu te epanọ o rẹ lọhọ te?
3 Daoma Zizie Ahwo Buobu: U fo re ma daoma zizie ahwo buobu te epanọ o rẹ lọhọ te. Fikiere, zizie emọ-uwuhrẹ Ebaibol ra, izihebro, imoni, ibe-iruiruo, ibe-emọ isukulu, ahwo nọ wha gbẹ rrọ ighẹ gbe egbẹrioma efa. Ekpako ukoko rai a te vuẹ owhai oghẹrẹ nọ wha ti ro ru ẹkwotọ rai. Kukpe kukpe, ahwo buobu nọ ma zizie a be hae nyaze ti kuomagbe omai. Ukpe nukpo aye jọ ọ rueva oria jọ nọ a jọ ru Ekareghẹhọ na, omọvo eruẹrẹahwohọ na ọ tẹ nọe ohwo nọ o zizie i rie re ọ gwọlọ iẹe kẹe. Rekọ, aye na ọ tẹ ta nọ ọ riẹ ohwo ọvo ho, gbe nnọ ohwo jọ nọ ọ jẹ ghale ebe-uzizie n’uwou ruọ uwou ọye ọ kẹ riẹ obe-zizie na ẹdẹdẹ yena
4. Fikieme ma jẹ rehọ ajọwha zizie ahwo ziọ Ekareghẹhọ na?
4 Ẹsejọhọ ohwo jọ nọ whọ kẹ obe-uzizie ọ te nyaze. Ohwo ọvo ọ gbẹ make nyaze he, yọ whọ rọ ere ta usiuwoma kẹ ai no. Ebe-uzizie nọ whọ te kẹ ahwo na i ti wuhrẹ ai inọ Jesu o zihe ruọ Ovie ologbo no. Ahwo nọ e te ruẹ owhẹ okenọ who ti zizie ahwo na, te iwhowho-uvie ukoko rai, jẹ maero kọ Jihova a te ruẹ nnọ ẹtanigbo na o da owhẹ ẹro fia.—Kọl. 3:15.