Ebe-Uzizie Ekareghẹhọ Nọ Ma te Ghale Evaọ Akpọ Soso!
1. Usi-uwhowho obọdẹ vẹ ma ti ru taure ma te ti ru Ekareghẹhọ na?
1 “Wha ru onana roro omẹ.” (Luk 22:19) Evaọ ẹmeoyo kẹ ujaje Jesu nana, Isẹri Jihova gbe amọfa nọ i dhesẹ isiuru a ti kuomagbe ru ekareghẹhọ uwhu Jesu evaọ March 30, 2010. Ma te jọ akpọ na soso rehọ obe-uzizie obọdẹ ro zizie ahwo ziọ Ekareghẹhọ na no March 13 rite March 30.
2. Oghẹrẹ vẹ ma sae rọ rehọ obe-uzizie na zizie ahwo?
2 Oghẹrẹ nọ Ma ti ro Zizie Ahwo: Whọ sae rehọ obe-uzizie na kẹ ohwo nọ whọ nyaku re o rri uwoho nọ a ru fihọ iẹe, whọ vẹ ta nọ: “Evaọ owọwọ Edivẹ-Oka March 30, ima ahwo buobu wariẹ akpọ na họ a ti kuomagbe ru ekareghẹhọ uwhu Jesu. Mẹ nyaze ti zizie owhẹ avọ uviuwou ra re wha nyaze ti kuomagbe omai ru Ekareghẹhọ nana. Egbẹnyusu ra a sai lele owhẹ nyaze re. Iviena muẹrohọ oke gbe oria nọ a ti jo ru Ekareghẹhọ nana.” Ohwo na o te wo uvẹ, whọ sai se Luk 22:19 nọ o t’ẹme kpahe Ekareghẹhọ na. Rekọ, kareghẹhọ inọ oke nọ ma wo kẹ uzizie na u tulo ho, fikiere ru ẹmeọta ra kpẹre re wha sai ru ẹkwotọ rai re.
3. Amono ma re zizie?
3 Otẹrọnọ ẹkwotọ ukoko rai ọ rẹ ruaro, ekpako na e rẹ sae jiroro nọ wha nyasiọ ebe-uzizie na ba iwou nọ wha di ahwo họ họ evaọ iweze ọsosuọ na. Nọ u te kiehọ, wha re fi emagazini họ ada kugbe obe-uzizie na. Daoma zizie ahwo nọ a rrọ izihebro ra, emọ-uwuhrẹ Ebaibol, ibe-iruiruo, ibe-emọ isukulu, imoni, ahwo nọ wha gbẹ rrọ ighẹ gbe egbẹrioma efa.
4. Ovuhumuo kẹ oware nọ Jihova o ru k’omai ẹkwoma ẹtanigbo na o rẹ wọ omai ru eme?
4 Thoma Kpahe re Who W’obọ Vọvọ?: Ezi Ekareghẹhọ na yọ obọdẹ oke nọ ma re ro fiba iruo odibọgba mai. Kọ whọ sae ruẹrẹ oke ra họ re who ru ọkobaro obufihọ? Kọ who wo emọ hayo emọ-uwuhrẹ Ebaibol nọ i bi wo ẹnyaharo ziezi? O tẹ rrọ ere, ta kẹ ekpako na re a jiroro sọ a te enọ i re kuomagbe usi-uwhowho na wọhọ iwhowho-uvie nọ e re họ-ame he. Ovuhumuo kẹ uyoyou nọ Jihova o dhesẹ k’omai ẹkwoma ẹtanigbo na o te wọ omai kpohọ Ekareghẹhọ na je zizie ahwo nọ ma rẹ sai zizie kpobi re a kuomagbe omai.—Jọn 3:16.