Usi-Uwhowho Obọdẹ nọ Ma Ti ro Zizie Ahwo Kpohọ Ekareghẹhọ Na!
1. Eme iwhowho-uvie kpobi a ti ru muhọ no March 21, 2009 vrẹ, kọ fikieme?
1 Evaọ Edene-Oka April 9, 2009, idibo Jihova wariẹ akpọ na họ a ti kokohọ ru ekareghẹhọ ọrọ uyoyou ulogbo nọ Jihova o dhesẹ kẹ ahwo-akpọ. (Rom 5:6-8) Ma be rọ ọwhọ rẹro inọ ima ahwo buobu nọ a wo isiuru a ti kuomagbe omai ru Ekareghẹhọ uwhu Jesu na. Ma te jọ akpọ na soso ghale obe-uzizie obọdẹ kẹ Ekareghẹhọ na muhọ no March 21, 2009 vrẹ.
2. Eware vẹ who re wo họ iroro nọ whọ tẹ be rehọ obe-uzizie kẹ ohwo?
2 Eware nọ Ma re Wo Họ Iroro: Rehọ iwoho, enọ, gbe Ikereakere nọ e rrọ obe-uzizie na ro ruiruo ziezi. Wọhọ oriruo, whọ sai si iroro ohwo kpohọ uwoho nọ o rrọ aro obe-uzizie na jẹ ta nọ: “Me bi zizie owhẹ re whọ nyaze ti kuomagbe omai ru Ekareghẹhọ uwhu Jesu, nọ ma ti ru evaọ Edene-oka, April 9, 2009.” Kẹsena whọ vẹ ta kpahe uzoẹme na gbe enọ nọ i lele i rie na. Muẹrohọ nọ whọ vuẹ ohwo nọ who bi zizie na inọ ọ sae wha ahwo uviuwou riẹ hayo amọfa nọ ọ gwọlọ lele oma ze.
3. Ẹvẹ whọ sae rọ bọ isiuru ahwo nọ who zizie kẹ Ekareghẹhọ na?
3 Otẹrọnọ ẹkwotọ ukoko rai o re logbo, ekpako ukoko rai a rẹ jiroro na sọ o gwọlọ nọ wha rẹ nyasiọ obe-uzizie ba inuẹthẹ ahwo nọ wha dihọ iwou hu. Evaọ urere-oka, wha re fi emagazini họ ada kugbe obe-uzizie na. Daoma zizie ahwo nọ a rrọ izihebro ra, emọ-uwuhrẹ Ebaibol, imoni, ibe-emọ isukulu, ibe-iruiruo, ahwo okegbe ra gbe ahwo nọ wha gbẹ rrọ ighẹ. Evaọ ukpe n’ukpo, oniọvo-ọmọtẹ jọ o zizie imoni riẹ nọ i bu te 30, yọ ọ jẹ kareghẹhọ ai noke ruoke epanọ Ekareghẹhọ na i wuzou te. Eva were riẹ gaga nọ imoni 25 riẹ a ziọ Ekareghẹhọ na, yọ 4 evaọ usu rai a jẹ obe-uwuhrẹ Ebaibol rehọ.
4. Omaa vẹ ma re muhọ ẹ ma enẹna, kọ fikieme?
4 Ma Omaa Enẹna: Iwhowho-uvie buobu a te sai ru odibọgba rai kẹre evaọ amara Asa gbe Ane. Otẹrọnọ who wo emọ hayo emọ-uwuhrẹ Ebaibol nọ i bi wo ẹnyaharo ziezi, oke nana o sae jọ obọdẹ oke nọ a sai ro te iwhowho-uvie nọ e re họ-ame he. Enẹna họ oke nọ who re ro mu oma họ ẹruẹrẹhọ re who wobọ vọvọ evaọ usi-uwhowho nana nọ ma ti ro whowho Ekareghẹhọ ọrọ uyoyou ulogbo nọ Ọghẹnẹ avọ Jesu a dhesẹ kẹ omai.—Jọn 3:16; 15:13.