Uzizie Ekareghẹhọ na U ti Muhọ Evaọ March 1
1. Oke vẹ ma ti ro mu ahwo họ ezizie kẹ Emu Owọwọ na, kọ fikieme uzizie ukpe nana u je ti kri vrẹ orọ anwẹdẹ?
1 Ma ti mu ahwo họ ezizie kẹ Emu Owọwọ na evaọ Edisoi-Oka March 1. Nọ orọnọ March 26 ma ti ro ru Emu Owọwọ na, koyehọ uzizie na u ti kri vrẹ epaọ anwẹdẹ. O te whae ze nọ ma ti ro zizie ahwo bu vi epaọ anwẹdẹ otẹrọnọ ukoko mai u te wo ẹkwotọ ologbo.
2. Oghẹrẹ vẹ ma te rọ rehọ ebe-uzizie na, je ru ẹkwotọ mai?
2 Epanọ Ma ti ro Ru Ei: Ekpako na a ti dhesẹ epanọ wha ti ro ru ẹkwotọ rai, jẹ vuẹ owhai sọ wha te hai dhe obe-uzizie na họ ẹthẹ ohwo nọ wha di họ uwou ho. Nọ a te ru ẹkwotọ na kpobi re no yọ ebe-uzizie i gbe kiọkọ, wha vẹ rọ kẹ ohwo kpobi nọ wha nya ku. Ọsẹro usiuwoma na ọ rẹ ruẹ nọ a fi ebe-uzizie nọ a kere eme fihọ no họ oria nọ a rẹ jọ rehọ ebe na, re iwhowho-uvie a hae jọ etẹe rehọ, rekọ a re fi aikpobi họ iẹe ẹsiẹvo ho. Utho nọ ma te rọ kẹ ahwo evaọ ẹkpoka ọvo ma rẹ rehọ.
3. Eme ma rẹ kareghẹhọ nọ ma tẹ be kẹ ahwo ebe-uzizie na?
3 Eme Ma te Ta? U fo nọ ma ta ẹme buobu hu, re ma sae nya te ahwo buobu oma. Whọ rẹ sai nwene oriruo usiuwoma ota nọ ọ rrọ ẹwẹ-obe avọ 4 na fihọ ẹme obọra. Ma tẹ ruẹ ohwo nọ ọ gwọlọ nọ ma ta usiuwoma kẹe hayo nọ o wo enọ, ma rẹ rọ ọwhọwhọ nyase iẹe ba ha. Nọ ma tẹ be rehọ ebe-uzizie na kẹ ahwo evaọ Ẹdẹ-Ọmaha hayo Ẹdoka, ma rẹ kẹ ae emagazini kugbe. Ebe-uzizie na ọvo ma te ghale evaọ Ẹdẹ-Ọmaha March 2, ukpenọ ma re mu ebe-uwuhrẹ ekpokpọ họ.
4. Fikieme ma jẹ rehọ ajọwha zizie ahwo ziọ Emu Owọwọ na?
4 Ma bi rẹro nọ ahwo buobu a te nyaze Emu Owọwọ na. Ovuẹ nọ a te kẹ, o te ta ẹme kpahe oghẹrẹ ohwo nọ Jesu ọ ginẹ rrọ. (1 Kọr. 11:26) Ofariẹ, a te ta ẹme te erere nọ ma re wo no uwhu riẹ ze. (Rom 6:23) U ti je dhesẹ oware nọ u je fo re ma kareghẹhọ Jesu. (Jọn 17:3) Fikiere, joma rehọ ajọwha zizie ahwo ziọ Emu Owọwọ na!