“Odu-Ikpe Ọkpokpọ Na —Eme Obaro na O Kru kẹ Owhẹ?”
1 Onọ oyena o rọ iroro ahwo evaọ otọakpọ na soso. Dede nọ ahwo-akpọ a ru eware buobu no evaọ ikpe-udhusoi buobu nọ e vrẹ no na, ahwo a rọ eheho enẹna keme uzedhe ebẹbẹ nọ i bi kpokpo ahwo-akpọ anwọ idu-ikpe na kpobi na e gbẹ riẹ. (Job 14:1; Ol. 90:10) Diẹse ahwo-akpọ a sai jo duku ifue?
2 Evaọ etoke emerae October gbe November, ma ti wo uvẹ obọdẹ nọ ma te rọ kẹ erivẹ mai uyo rọkẹ onọ oyena. Evaọ edhere vẹ? Ẹkwoma ẹghale Usi Uvie ọrọ Avọ 36 na. Uzoẹme riẹ họ “Odu-Ikpe Ọkpokpọ Na—Eme Obaro na O Kru kẹ Owhẹ?” Evaọ abọ ọsosuọ October, ma ti fi emagazini Uwou-Eroro gbe Awake! na họ ada. Kẹsena no Ẹdọvo-Oka, October 16, rite Edisoi-Oka, November 17, ma vẹ te rọ ọwhọ ghale Usi Uvie ọrọ Avọ 36 na. Evaọ etoke usi ovravra obọdẹ onana, ma te tẹrovi ẹghale Usi Uvie ọrọ Avọ 36 na eva edẹ-oka. Evaọ urere-oka, ma vẹ ghale iẹe avọ emagazini ekpokpọ nọ e riẹ.
3 Kọ Who ti w’Obọ Vọvọ? Ekpako, idibo iruiruo, gbe ekobaro a rẹ k’obaro evaọ usi ovravra onana, keme ae a rọ obaro iruo na. Iwhowho-uvie buobu a ru inwene evaọ iyero rai no re a ruẹsi fi odẹ h’otọ wọhọ ekobaro obufihọ evaọ etoke amara hayo emerae ivẹ ọ usi ovravra na. Amọfa a be m’omaa re a raha oke buobu evaọ odibọgba na vi epaọ anwẹdẹ.
4 Iwuhrẹ ọ Obe Uwuhrẹ Ukoko a rẹ sai fiobọhọ evaọ uduotahawọ nọ a rẹ rọ kẹ ahwo kpobi evaọ utu rai re a w’obọ vọvọ evaọ ẹghale Usi Uvie ọrọ Avọ 36 na. Ẹsejọhọ iwhowho-uvie jọ nọ i dhẹmu no evaọ iruo usiuwoma ota na e riẹ. Ekpako na i re weze bru enana re a ruẹ oware nọ a sai ru ro fiobọhọ kẹ ae. Ẹsejọhọ a rẹ sai ru ọruẹrẹfihotọ re iwhowho-uvie nọ i wo ona a lele omomọvo ahwo nana ruiruo evaọ etoke odibọgba emerae nana. Odhesẹvia ọlọlọhọ ọrọ Usi Uvie ọrọ Avọ 36 na o sae jọ oware nọ a nwane gwọlọ re o wariẹ jaja iwhowho-uvie enana.
5 Onana o te jọ uvẹ obọdẹ kẹ emọ-uwuhrẹ Ebaibol nọ i wuhrẹ obe Eriariẹ na thabọ no gbe enọ i te wọhọ iwhowho-uvie nọ e te ho-ame he re a mu abọ họ ewo evaọ odibọgba na. Makọ emaha na dede a rẹ sai w’obọ ziezi evaọ iruo omosasọ nana.
6 Odhesẹvia ọlọlọhọ họ oware kpobi nọ a gwọlọ. Whọ sae ta nọ:
◼ “U no omẹ eva ze re mẹ rehọ oke mẹ wha ovuẹ nana nọ u wuzou gaga na ro se uviuwou kpobi evaọ [odẹ okpẹwho hayo orẹwho]. Ọnana yọ ọra. Iviena sei.” O rẹ sae were ahwo jọ re a siọ ẹkpa usiuwoma ba ẹwha evaọ okenọ a tẹ be ghale Usi Uvie ọrọ Avọ 36 na.
7 Iwuhrẹ kẹ Usiuwoma Ota nọ A Ruẹrẹhọ Ziezi: Ekpako na a rẹ ruẹ nọ eruẹrẹfihotọ kẹ usiuwoma ota i kiehọ jẹ rọ enọ a re fihọ iruo. Ọsẹro usiuwoma ota na ọ rẹ ruẹ nọ ẹkwotọ ọrọ n’uwou ruọ uwou gbe eria enu iruo e riẹ ziezi re ahwo kpobi a sai w’obọ vọvọ evaọ iruo na. Oria nọ o jọ lọhọ kpobi, jọ a ruẹrẹ iwuhrẹ kẹ usiuwoma ota họ evaọ edẹ-oka kpobi, urere-oka na, gbe etoke owọwọ. A sai ru ọruẹrẹfihotọ re a kokohọ evaọ akọ-owọwọ rọkẹ erere emọ isukulu, enọ i bi ruiruo, gbe amọfa.
8 Oware nọ A re Ru Kpahe Ahwo nọ A Dihọ Uwou Hu: Ute mai họ re ma t’ẹme kẹ enọ i wo iwou te epanọ o rẹ lọhọ te kpobi. Otẹrọnọ uvumọ ohwo ọ rọ uwou evaọ okenọ whọ rọ nya ha, kere adrẹse na re whọ wariẹ zihe evaọ ẹruoke ọfa. Otẹrọnọ evaọ oka urere usi ovravra na whọ re nya ku enọ i wo iwou enana ghele he, whọ sae nya siọ Usi Uvie ọrọ Avọ 36 ọvo jọ ba kẹ ae evaọ oria nọ ahwo nọ a be nya vrẹ a rẹ jọ rue riẹ hẹ. Ekpako na a sae ta kẹ ukoko na nnọ a nya siọ Usi Uvie ọrọ Avọ 36 jọ ba kẹ ahwo nọ e rọ uwou hu evaọ iweze ọsosuọ na nọ a te bi ruiruo evaọ eria imivu gbe eria nọ ẹkwotọ nọ a bi ru evaọ etoke usi ovravra na e jẹ rọ buobu.
9 Joma Ruiruo Ziezi! Ikoko e rẹ daoma re a ru ẹkwotọ rai reno taure usi ovravra na u te ti kuhọ evaọ November 17. Otẹrọnọ ẹkwotọ rai ọ rẹ ruaro, iwhowho-uvie jọ omomọvo a sai ruiruo evaọ oria nọ o rẹ jọ lọhọ jẹ kare ozọ. Ọruẹrẹfihotọ nana o ti ru ei lọhọ re a nya te ahwo nọ a te buobu oma. Ruẹ nọ whọ nabi kere odẹ ahwo nọ a dhesẹ isiuru kpobi fihọ otọ.
10 Ekpako na a re roro unu emagazini efa nọ ukoko na o rẹ te gwọlọ a vẹ rehọ ere vi. U du fo re a vi Usi Uvie ọrọ Avọ 36 na ha, keme a ti vi ai se ikoko kpobi. Ekobaro obọdẹ, erọ oke-kpobi, gbe erọ obufihọ, omomọvo rai o ti wo 128 nọ a rẹ ghale, yọ iwhowho-uvie ukoko omomọvo o ti wo 48. Fikiere, kọ whọ ruẹrẹ oma họ no je wo ajọwha re who ruiruo ziezi evaọ iruo obọdẹ nana? Ẹvẹ o rọ uvẹ-ọghọ k’omai te re ma vuẹ erivẹ mai kpobi kpahe oware nọ Ọghẹnẹ ọ yeyaa riẹ kẹ obaro na kẹle na!