Gbẹ Hae Ta Usiuwoma Na!
1 O rrọ oreva Ọghẹnẹ inọ “ahwo kpobi a wo usiwo, re a ze te riẹ uzẹme na.” (1 Tim. 2:4) Fiki onana, ọ kẹ omai owha-iruo re ma vuẹ emamọ usi na. (Mat. 24:14) Ma te wo ovuhumuo oware nọ o soriẹ nọ ma jẹ ruabọhọ usiuwoma ota, oware elọhoma hayo orọ awhaha kpobi nọ ma rẹriẹ aro ku o rẹ whaha omai hi.
2 Fikieme Ma Jẹ Ruabọhọ Iẹe? Eware awhaha buobu e rrọ akpọ na nọ e rẹ lẹliẹ eware nọ ma be ta kẹ ahwo na thọrọ ae ẹro hayo nọ a je rri rai vovovo. Fikiere ma rẹ gbẹ hae kareghẹhọ ae ovuẹ usiwo Ọghẹnẹ hrọ. (Mat. 24:38, 39) Ofariẹ, iyero uzuazọ ahwo i bi nwene ẹsikpobi. Makọ iyero akpọ dede e rẹ sai nwene gaga aso-hẹrioke. (1 Kọr. 7:31) Odẹ n’ọtha, oka n’otha, hayo amara n’ọtha, ahwo nọ ma ta usiuwoma kẹ a rẹ sae rẹriẹ aro ku ebẹbẹ hayo eware ọdawẹ ekpokpọ nọ e rẹ lẹliẹ ae roro kpahe emamọ usi nọ ma be wha se ai na gaga. Kọ whọ gbẹ kẹ uyere inọ Osẹri nọ ọ wha uzẹme na s’owhẹ ọ ruabọhọ iẹe?
3 Re Ma Raro Kele Ohrọ Ọghẹnẹ: Jihova ọ rọ odiri kuvẹ no re oke jọ o vrẹ taure o te ti bruoziẹ kpe ahwo omuomu na. Ẹkwoma mai ọ gbẹ be ta kẹ ahwo udu oruọzewọ re a kurẹriẹ bru ei ze re a ruẹse zọ. (2 Pita 3:9) Ma rẹ reabe azẹ otẹrọnọ ma gbẹ ruabọhọ ewhowho ovuẹ ohrọ Ọghẹnẹ kẹ ahwo ho jẹ vẹvẹ ai unu hu kpahe ẹdhoguo Ọghẹnẹ nọ o bi ti te ahwo kpobi nọ a kurẹriẹ no idhere iyoma rai hi. (Izik. 33:1-11) Dede nọ a re dede ovuẹ mai rehọ ẹsikpobi hi, ma re rolobọ họ evaọ omodawọ kpobi nọ ma re ro fiobọhọ kẹ ahwo eva-ezi wo ovuhumuo kẹ ohrọ ulogbo Ọghẹnẹ.—Iruẹru 20:26, 27; Rom 12:11.
4 Re Ma Dhesẹ Uyoyou Mai: Jihova Ọghẹnẹ họ ọnọ ọ rọ ẹkwoma Jesu Kristi kẹ ujaje na inọ a vuẹ emamọ usi na evaọ otọakpọ na kpobi. (Mat. 28:19, 20) Ahwo a tẹ make se nọ a rẹ gaviezọ, ma wo uvẹ nọ ma re ro dhesẹ uyoyou gbe omorọkẹ Ọghẹnẹ mai ẹkwoma ẹdadamu eruo oware ogbagba.—1 Jọn 5:3.
5 Joma gbae mu re ma ruabọhọ usiuwoma ota na! Joma ru ere avọ ọwhọ nọ o gbẹ rrọ “ẹdẹ usiwo” Jihova na.—2 Kọr. 6:2.