Fikieme Ma Jẹ Ruabọhọ Usiuwoma Ota?

¹ Kọ a jọ ẹwho ra ru iruo usiuwoma ota Uvie na lehie no? (Mat. 24:14) O tẹ rrọ ere, whọ sai roro nnọ a ru ẹkwotọ ukoko na reno ziezi. Enẹna whọ tẹ be ta usiuwoma, ẹsejọhọ ahwo buobu nọ whọ nya ku a bi se ovuẹ Uvie na gboja ha. O tẹ make rrọ ere, muẹrohọ ẹme nọ a ta kpahe ilele uzẹme Jesu evaọ ẹwẹ-obe avọ 141 ọrọ obe ọ Isaiah’s Prophecy II na: “Evaọ eria jọ, o rẹ wọhọ nọ iyẹrẹ odibọgba rai i tulo ho a tẹ rehọ ae wawo iruo gbe omodawọ nọ a ru fihọ iẹe. Ghele na, a bi thihakọ.” Rekọ fikieme ma jẹ ruabọhọ usiuwoma ota?

² Kareghẹhọ Jerimaya: Ithihakọ mai evaọ iruo usiuwoma ota na e rẹ roma hwa sọ ahwo a gaviezọ k’omai hayo a gaviezọ ha ha. Jerimaya ọ ta usiuwoma te ikpe 40 evaọ ẹkwotọ ọvona dede nọ umutho ahwo ọvo a gaviezọ kẹe yọ ibuobu e wọso ovuẹ riẹ. Kọ fikieme Jerimaya o je thihakọ? Fikinọ o je ru iruo nọ Ọghẹnẹ o jie kẹe nọ o ru gbe eriariẹ nọ o wo kpahe oware nọ o te via evaọ obaro o gba riẹ họ nọ ọ rẹ ruabọhọ ẹta.—Jeri. 1:17; 20:9.

³ Epọvo na uyero mai o rrọ re. Jesu o “fi uzi họ kẹ omai re ma vuẹ ahwo je se isẹi nọ [ọnana] họ ọnọ Ọghẹnẹ o ro mu obruoziẹ enọ erọ uzuazọ gbe iwhuowhu.” (Iruẹru 10:42) Ovuẹ nọ ma be wha na yọ ẹme uwhu gbe azọ kẹ enọ i yo rie. Owọ nọ ahwo a jẹ kpahe emamọ usi na a ti ro gu ai ẹdhọ. Nọ o rrọ ere na, owha-iruo mai họ re ma ru epanọ a jie k’omai nọ ma ru na dẹẹ. Ahwo a tẹ make se nnọ a rẹ gaviezọ, onana o rẹ k’omai uvẹ nọ ma re ro dhesẹ epanọ uyoyou nọ ma wo kẹ ae gbe omarọkẹ Jihova mai u diwi te, ẹkwoma ẹdadamu eruo oware nọ o gbahọ nọ ma re ru na. Rekọ o jọ etẹ kuhọ họ.

⁴ Ma bi Wo Erere: Eruo oreva Ọghẹnẹ, makọ owọ nọ ahwo a jẹ evaọ ẹkwotọ na, o rẹ kẹ omai udhedhẹ, evevọwẹ, gbe evawere, enọ a rẹ sae ruẹ evaọ edhere ọfa ha. (Ol. 40:8) Izuazọ mai i re wo uvi otofa gbe ẹjiroro. Epanọ ma w’obọ te evaọ odibọgba na, ere udu gbe iroro mai e rẹ tọvi ẹruore gbe oghọghọ ẹrria evaọ akpọ ọkpokpọ Ọghẹnẹ na te. Eroro kpahe eyaa Ikereakere nana u re ru edikihẹ abọ-ẹzi mai woma viere je ru usu mai kugbe Jihova ga.

⁵ Ma gbẹ make ruẹ iyẹrẹ ẹsiẹsiẹ evaọ iruo usiuwoma ota mai hi, ẹsejọhọ ma kọ ubi uzẹme jọ fihọ udu ohwo jọ no nọ o te dhẹ via evaọ ẹruoke Jihova. (Jọn 6:44; 1 Kọr. 3:6) Mai ọvuọvo ọ riẹ epanọ amọfa nọ a te gbẹ riẹ kpahe Uvie na ẹkwoma omodawọ ahwo Jihova a ti bu te he, makọ evaọ obonẹ hayo evaọ akpọ na soso.

⁶ Vi epaọ anwẹdẹ kpobi, ma re yo uthubro Jesu na: “Wha yọrọ oma, wha roro; keme wha riẹ ezi nọ oke na u re te he. Ẹme nọ mẹ ta kẹ owhai na, ahwo kpobi mẹ ta kẹ: Wha roro.” (Mak 13:33, 37) Fikiere, jomai kpobi ma ruabọhọ ewhowho emamọ usi Uvie na, ru udu Jihova ghọghọ nọ ma bi w’obọ evaọ erufuọ odẹ ulogbo orọ ẹri riẹ na.