Oware nọ Ma je bi Dhe Eziezihe

1. Onọ vẹ o roma via kpahe iruo usiuwoma ota mai?

¹ Evaọ eria buobu, ma re ru ẹkwotọ mai re no kpere-kpere. Ma re zihe kpohọ iwou evona ezezihe nya, o tẹ make rrọ nọ ahwo na a ta k’omai nọ a wo isiuru hu. Fikieme ma be hai ro zihe bru ahwo nọ a dhesẹ isiuru hu evaọ oke nọ o vrẹ?

2. Ugogo ẹjiroro vẹ ma bi ro thihakọ evaọ odibọgba na?

² Uyoyou kẹ Jihova gbe Ahwo: Ugogo ẹjiroro nọ ma bi ro thihakọ evaọ odibọgba na họ uyoyou nọ ma wo kẹ Jihova. Udu mai o be w’omai ruabọhọ ẹta kẹ amọfa kpahe Ọghẹnẹ ologbo mai. (Luk 6:45) Uyoyou nọ ma wo kẹ Jihova o be w’omai koko izi riẹ je fiobọhọ kẹ amọfa ru epọvo na. (Itẹ 27:11; 1 Jọn 5:3) Akothiho mai evaọ iruo nana orọnikọ o roma wha ezọ nọ ahwo a be gaviẹ k’omai hi. Makọ okenọ a je kpokpo Ileleikristi ikpe-udhusoi ọsosuọ na dede, a ruabọhọ usiuwoma ota na. (Iruẹru 5:42) Nọ ahwo a gbẹ kezọ k’omai hi, ukpenọ ma kuvẹ re oyena o wha oyẹlẹ h’omai oma, ma re dikihẹ ga, ma vẹ rọ ere dhesẹ uvi uyoyou gbe ẹmeoyo mai kẹ Jihova.

3. Ẹvẹ uyoyou nọ ma wo kẹ ahwo u re ro fiobọhọ k’omai ruabọhọ usiuwoma ota?

³ Ẹjiroro ọfa nọ ma bi ro thihakọ evaọ usiuwoma ota họ fikinọ ma you erivẹ mai. (Luk 10:27) Jihova ọ gwọlọ nọ a raha uvumọ ohwo ho. (2 Pita 3:9) Makọ evaọ ekwotọ nọ ma rẹ jọ ta usiuwoma kpere-kpere, ma gbẹ be jarai duku ahwo nọ a gwọlọ gọ Jihova. Wọhọ oriruo, evaọ ukoliko Guadeloupe, nọ omọvo evaọ usu ahwo 56 kpobi e jẹ rrọ Isẹri Jihova, ahwo 214 a họ-ame evaọ ukpe nukpo. Enwenọ ahwo 20,000 a kpohọ Ekareghẹhọ na, oware wọhọ omọvo evaọ usu ahwo 22 kpobi evaọ ukoliko yena!

4. Evaọ idhere jọ vẹ iyero ẹkwotọ i re ro nwene?

⁴ Inwene Evaọ Ẹkwotọ: Iyero ẹkwotọ ukoko mai i re nwene noke ruoke. Nọ ma tẹ wariẹ kpohọ oria nọ ma nya no vẹre nọ ahwo a jọ dhesẹ isiuru hu, omọfa evaọ uviuwou na—ẹsejọhọ no o ri yo ovuẹ mai vẹre he—ọ sae kezọ k’omai. Hayo, ma sae nyaku ahwo ọkpokpọ nọ a kua ziọ oria na nọ a wo isiuru. Emọ nọ i wo esẹgbini nọ e jẹ kezọ kẹ usiuwoma na ha, a rẹ rro a ve je no uwou no. Ahwo otiọye na a sai wo isiuru kẹ ovuẹ Uvie na.

5. Eme ọ rẹ sae lẹliẹ ahwo gaviezọ ziezi?

⁵ Ahwo a re nwene re. Pọl ukọ na ọ jọ ohwo nọ o je “zu eme họ, kpokpo, jẹ ta emeẹso.” (1 Tim. 1:13) Epọvo na re, ahwo buobu nọ a be gọ Jihova nẹnẹ na a jọ ahwo nọ a wo isiuru kpahe uzẹme na vẹre he. Ejọ dede e tubẹ wọso emamọ usi na evaọ okejọ. Nọ iyero akpọ i bi nwene na, ahwo ọwọsuọ jọ hayo enọ e jẹ kezọ vẹre he a sai mu ezọ họ ẹgaviẹ. Amọfa a rẹ sae kezọ nọ oware okpẹtu jọ o tẹ via kẹ ai, wọhọ oriruo, nọ ohwo uviuwou rai jọ o te whu, nọ a te si ai no iruo, nọ a te wo ẹbẹbẹ ugho, hayo nọ ẹbẹbẹ ẹyao o te te ai.

6. Fikieme ma jẹ rọ ọwhọ ruabọhọ usiuwoma ota na?

⁶ Uyero akpọ nana u bi te ekuhọ no, rekọ iruo usiuwoma ota mai e be nyaharo kpata kpata. (Aiz. 60:22) Fikiere, ma rẹ rọ ọwhọ ruabọhọ iruo usiuwoma ota na. Ẹsejọhọ omọfa nọ ma te wariẹ ta usiuwoma kẹ ọ te gaviezọ. U fo re ma ruabọhọ ẹta usiuwoma na! ‘Ẹkwoma enẹ oruo ma re ro siwi oma mai gbe ahwo nọ a be kezọ ẹme mai.’—1 Tim. 4:16.